អន្តរជាតិ
អង្គការសហប្រជាជាតិ អនុម័តសេចក្តីសម្រេចស្តីពីសិទ្ធិមនុស្សកូរ៉េខាងជើងលើកទី១៥ឆ្នាំជាប់គ្នា
អគ្គរដ្ឋទូតកូរ៉េខាងជើង Kim Song មានវត្តមានក្នុងមហាសន្និបាតអង្គការសហប្រជាជាតិ, រូបភាព៖ Yonhap
×![]()
ដោយ: ធៀន ភារិន្ទ
មហាសន្និបាតអង្គការសហប្រជាជាតិ នៅថ្ងៃទី ១៨ ខែធ្នូ បានអនុម័តលើសេចក្តីសម្រេចមួយ ដែលស្នើឲ្យក្រុមប្រឹក្សាសន្តិសុខដាក់ទណ្ឌកម្មលើកូរ៉េខាងជើង ជុំវិញបញ្ហារំលោភបំពានសិទ្ធិមនុស្ស លើកទី១៥ ជាប់ៗគ្នា។ ការអនុម័តនេះ ត្រូវបានសម្រេចជាឯកច្ឆន្ទ។ ប៉ុន្តែអគ្គរដ្ឋទូតកូរ៉េខាងជើងប្រចាំនៅអង្គការសហប្រជាជាតិ បានទាត់ចោលសេចក្តីសម្រេចមួយនេះ និងអះអាងថាផ្ទុយពីការពិត។ 
តាមរយៈកិច្ចប្រជុំនៅថ្ងៃទី១៨ ខែធ្នូ មហាសន្និបាតអង្គការសហប្រជាជាតិ បានអនុម័តជាឯកច្ឆន្ទលើឯកសារមួយ ដែលទាមទារឲ្យទីក្រុងព្យុងយ៉ាងទទួលខុសត្រូវចំពោះសកម្មភាពរំលោភបំពានសិទ្ធិមនុស្សនៅក្នុងប្រទេសខ្លួន។
ដោយផ្អែកទៅតាមសេចក្តីព្រាងរបស់សមាជិកសហភាពអឺរ៉ុប មហាសន្និបាតអង្គការសហប្រជាជាតិ ថ្កោលទោសចំពោះសកម្មភាពរបស់កូរ៉េខាងជើង ដែលប្រព្រឹត្តអំពើរំលោភបំពានសិទ្ធិមនុស្សជាប្រព័ន្ធ ក្នុងនោះរួមបញ្ចូលទាំងការប្រព្រឹត្តបទឧក្រិដ្ឋប្រឆាំងមនុស្សជាតិផងដែរ។ ក្នុងន័យនេះ មហាសន្និបាតអង្គការសហប្រជាជាតិ បានទទូចឲ្យក្រុមប្រឹក្សាសន្តិសុខ (UNSC) ចាត់វិធានការសមស្របណាមួយ ដើម្បីដោះស្រាយបញ្ហានេះ។
ក្នុងចំណាត់ការនេះ មហាសន្និបាត បានស្នើឲ្យក្រុមប្រឹក្សាសន្តិសុខ ពិចារណាដាក់បញ្ហារំលោភសិទ្ធិមនុស្សកូរ៉េខាងជើងទៅ តុលាការព្រហ្មទណ្ឌអន្តរជាតិ (ICC) និងការដាក់ទណ្ឌកម្មលើជនដែលពាក់ព័ន្ធខ្លាំងជាងគេបំផុត។ ជនពាក់ព័ន្ធនេះ ទំនងជាសំដៅទៅដល់មេដឹកនាំកូរ៉េខាងជើង គីម ជុងអ៊ុន ផ្ទាល់តែម្តង។
ជាការឆ្លើយតប លោក គីម សុង (Kim Song) អគ្គរដ្ឋទូតកូរ៉េខាងជើងប្រចាំអង្គការសហប្រជាជាតិ បានទាត់ចោលសេចក្តីសេចក្តីសម្រេចមួយនេះ និងអះអាងថា ផ្ទុយពីការពិត។ បើតាមលោក គីម ការរំលោភសិទ្ធិមនុស្ស គឺជារឿងមិនពិតនៅក្នុងកូរ៉េខាងជើង ហើយសេចក្តីសម្រេចនេះទៀតសោត គ្រាន់តែធ្វើឡើង ដើម្បីបំផ្លាញមុខមាត់កូរ៉េខាងជើង និងរចនាសម្ពន្ធដឹកនាំរបស់ប្រទេសមួយនេះតែប៉ុណ្ណោះ។
សូមបញ្ជាក់ថា ការអនុម័តរបស់មហាសន្និបាតអង្គការសហប្រជាជាតិ ធ្វើឡើងតែមួយសប្តាហ៍ប៉ុណ្ណោះ បន្ទាប់ពីក្រុមប្រឹក្សាសន្តិសុខ បានបើកកិច្ចប្រជុំស្តីពីបញ្ហាកូរ៉េខាងជើង ស្របពេលទំនាស់រវាងអាមេរិក និងកូរ៉េខាងជើងចាប់ផ្តើមក្តៅឡើងវិញ ៕
Tag:
កូរ៉េខាងជើង
មហាសន្និបាតអង្គការសហប្រជាជាតិ
© រក្សាសិទ្ធិដោយ thmeythmey.com
