ជាតិ
សារមន្ទីរកូរ៉េខាងជើងនៅសៀមរាប បិទទ្វារបណ្តោះអាសន្នតាំងពីថ្ងៃទី២៥ ខែវិច្ឆិកា ភ្ញៀវទេសចរជិះរ៉ឺម៉កកង់បីកាត់សារមន្ទីរសព្វទស្សន៍អង្គរនារសៀលថ្ងៃទី១៩ ធ្នូ ឆ្នាំ២០១៩
× សៀមរាប៖ សារមន្ទីរដ៏ធំស្កឹមស្កៃនិងទំនើបរបស់ប្រទេសកូរ៉េខាងជើង គឺសារមន្ទីរសព្វទស្សន៍អង្គរ ឬ Angkor PANORAMA Museum បានប្រកាសបិទទ្វារបណ្ដោះអាសន្ន ។ មិនមានការបញ្ជាក់ពីការបិទទ្វារនេះទេ តែគេសង្កេតឃើញថា មានក្រុមហ៊ុននិងអាជីវកម្មមួយចំនួនដែលកាន់កាប់ដោយកូរ៉េខាងជើង បានបិទទ្វារជាបន្តបន្ទាប់នៅក្រុងសៀមរាប។
សេចក្ដីប្រកាសព័ត៌មានរបស់សារមន្ទីរសព្វទស្សន៍អង្គរ ដែលបិទនៅមុខទ្វារចូលមានខ្លឹមសារយ៉ាងដូច្នេះថា៖« សារមន្ទីរត្រូវបានផ្អាកប្រតិបត្តិការអាជីវកម្មជាបន្ទាន់ និងបណ្ដោះអាសន្នចាប់ពីថ្ងៃទី២៥ ខែ វិច្ឆិកា នេះតទៅ»។ ក្នុងសេចក្ដីជូនដំណឹងនោះ ធ្វើឡើងដោយនាយកប្រតិបត្តិ លោក RI KYONG IL ។
សារព័ត៌មាន ThmeyThmey បានព្យាយាមទាក់ទងទៅមន្ត្រីពាក់ព័ន្ធដើម្បីសុំការបញ្ជាក់ពីរឿងរ៉ាវទាំងនេះ តែពុំមានចម្លើយ។ ប្រភពពីបុគ្គលដែលសុំមិនបញ្ចេញឈ្មោះបានឱ្យដឹងថា ក្រុមហ៊ុនកូរ៉េខាងជើងប្រកាសបិទសារមន្ទីរភ្លាមៗ និងប្រគល់ការគ្រប់គ្រងទាំងមូលទៅអាជ្ញាធរជាតិអប្សរាជាបណ្ដោះអាសន្ន។ បុគ្គលិកដែលបម្រើការងារក្នុងសារមន្ទីរទាំងអស់ ត្រូវបានផ្ទេរទៅធ្វើការនៅអាជ្ញាធរជាតិអប្សរាជាបណ្ដោះអាសន្ន រហូតសារមន្ទីរបើកដំណើរការឡើងវិញ។ ប្រភពបន្តថា សារមន្ទីរនេះនឹងបើកដំណើរការឡើងវិញនាពេលឆាប់ៗខាងមុខ។
សារមន្ទីរសព្វទស្សន៍អង្គរ បានបើកសម្ពោធជាផ្លូវការនៅថ្ងៃទី៤ ធ្នូ ឆ្នាំ២០១៥ មកដល់ពេលនេះគឺមានរយៈពេល៤ឆ្នាំគត់។ សារមន្ទីរនេះកសាងដោយក្រុមហ៊ុន ម៉ានសូឌេ របស់សាធារណរដ្ឋកូរ៉េ និងអាជ្ញាធរជាតិអប្សរា។ ក្រុមហ៊ុននេះបានចាប់ផ្តើមសាងសង់នៅខែ សីហា ឆ្នាំ២០១១ និងបញ្ចប់ជាស្ថាពរនៅខែ កញ្ញា ឆ្នាំ២០១៥។ ខុសពីសារមន្ទីរទូទៅ ឬរូបបដិមាទេ គឺជាសារមន្ទីរ 3D ដំបូងគេបង្អស់នៅកម្ពុជាដែលបំពាក់គ្រឿងបរិក្ខាទំនើបៗ។ ប្រវត្តិប្រាសាទ ប្រវត្តិព្រះមហាក្សត្រខ្មែរសម័យបុរាណ មានបញ្ចូលក្នុងម៉ាស៊ីនស្វ័យប្រវត្តិដែលអាចឱ្យអ្នកទស្សនាចុចមើល និងអានបានដោយងាយស្រួល។ល៕
Tag:
សារមន្ទីរកូរ៉េខាងជើង
សារមន្ទីរសព្វទស្សន៍អង្គរ
អប្សរា
© រក្សាសិទ្ធិដោយ thmeythmey.com