អន្តរជាតិ
ប្រមុខការទូតជប៉ុននិងរស្ស៊ី បន្តជួបគ្នាដើម្បីដោះស្រាយបញ្ហាដែនកោះKuril ប្រមុខការទូតរុស្ស៊ី លោក Sergei Lavrov (ខាងស្តាំ) ចាប់ដៃគ្នាជាមួយ សមភាគីជប៉ុន លោក Toshimutsu Motegi នៅថ្ងៃទី១៩ ខែធ្នូ ឆ្នាំ២០១៩។ រូបភាព៖ Reuters
× ប្រមុខការទូតរុស្ស៊ី លោក Sergei Lavrov បានជួបចរចាជាមួយសមភាគីជប៉ុន លោក Toshimutsu Motegi នៅថ្ងៃទី១៩ ខែធ្នូ ដែលជាលើកទី៣ ក្នុងរយៈពេល ៤ខែ។ ជំនួបចរចានេះមានគោលដៅដោះស្រាយជម្លោះទាមទារទឹកដីកោះគូរីល ដែលនៅភាគខាងជើងកោះហុកកៃដូ (Hokkaido)។
រុស្ស៊ី ដែលពេលនោះ ត្រូវបានគេស្គាល់ថាជាសហភាពសូវៀត បានចូលទៅកាន់កាប់តំបន់យុទ្ធសាស្ត្រដែនកោះគូរីលនៅពេលបញ្ចប់សង្គ្រាមលោកលើកពីរ។ ដោយបានគ្រប់គ្រងដែនកោះមួយនេះ រុស្ស៊ីបានដាក់យោធាជាច្រើន ដើម្បីការពារពីការវាយប្រហារផ្សេងៗ។ ជាដែនកោះស្ថិតនៅភាគខាងជើងកោះហុកកៃដូKuril គឺជាឈ្មោះ ដែលរុស្ស៊ីបានដាក់ ស្របពេលជប៉ុន បានហៅកោះនេះថា ដែនដីភាគខាងជើង។
បន្ទាប់ពីជំនួបចរចា បានបិទបញ្ចប់ លោក Lavrov រដ្ឋមន្ត្រីការទូតរុស្ស៊ី បានលើកឡើងយ៉ាងដូច្នេះថា៖«កិច្ចចរចាប្រកបទៅដោយផ្លែផ្កា និងសំខាន់បំផុត»។ ក្នុងន័យនេះ ជំនួបរវាងភាគីទាំងពីរទំនងជាមានការឯកភាពគ្នាច្រើន លើការដោះស្រាយជម្លោះដែនកោះ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ដូចទៅនឹងការលើកឡើងរបស់រដ្ឋមន្ត្រីការបរទេសរុស្ស៊ី អ្នកនាំពាក្យក្រសួងការបរទេសជប៉ុន Atsushi Kaifu បានបញ្ជាក់ថា កិច្ចពិភាក្សារវាងប្រទេសទាំងពីរ បានទទួលផ្លែផ្កាយ៉ាងសមប្រកប។ បើតាមអ្នកនាំពាក្យរូបនេះ ជំនួបពិភាក្សារយៈពេលជាង៥ម៉ោង បានផ្តោតទៅលើសន្ធិសញ្ញាសន្តិភាពរុស្ស៊ី-ជប៉ុន។ ចាប់តាំងពីចប់សង្គ្រាមលោកលើកទី២មក ទីក្រុងតូក្យូ និងមូស្គូ មិនទាន់បានចុះហត្ថលេខាទេ ដោយសារភាគីទាំងពីរ មានជម្លោះដែនកោះនេះ។
បន្ទាប់ពីកិច្ចប្រជុំនេះ រដ្ឋមន្ត្រីការបរទេសទាំងពីរ អាចនឹងជួបគ្នាម្តងទៀត នាសន្និសីទសន្តិសុខ នាទីក្រុង មូនិក (Munich) ប្រទេសអាល្លឺម៉ង់ ។
ពីទីក្រុងមូស្គូ តាមរយៈសន្និសីទកាសែតប្រចាំឆ្នាំនៅថ្ងៃទី១៩ ខែធ្នូ ប្រធានាធិបតីរុស្ស៊ី វ៉ា្លឌីមៀ ពូទីន បានលើកឡើងថា អ្វីដែលសំខាន់ជាងគេ រុស្ស៊ីចង់ស្វែងរកដំណោះស្រាយនៃជម្លោះរវាងប្រទេសទាំងពីរ។ បើតាមលោកពូទីន ទីក្រុងមូស្គូមាន «ទំនាក់ទំនងដ៏ទុកចិត្ត» ជាមួយទីក្រុងតូក្យូ។
សូមបញ្ជាក់ថា បច្ចុប្បន្ន ដែនកោះមួយនេះ មានប្រជាជនរស់នៅប្រមាណជា ២ម៉ឺននាក់ ហើយរុស្ស៊ី បានដាក់មូលដ្ឋានយោធា និងប្រព័ន្ធខែលមីស៊ីលនៅលើកោះផងដែរ៕
© រក្សាសិទ្ធិដោយ thmeythmey.com