អន្តរជាតិ
លោក មូន និងអាបេ នឹងមានជំនួបទ្វេភាគីនៅប្រទេសចិន នាយករដ្ឋមន្រ្តីជប៉ុន ស៊ិនហ្សូ អាបេ និងប្រធានាធិបតីកូរ៉េខាងត្បូង។ រូបភាព៖ AP
× វិមានរដ្ឋាភិបាលកូរ៉េខាងត្បូង Cheong Wa Dae នៅថ្ងៃទី២០ ខែធ្នូ បានប្រកាសថា ប្រធានាធិបតីកូរ៉េខាងត្បូងមូន ចេអ៊ីន និងនាយករដ្ឋមន្ត្រីជប៉ុន ស៊ិនហ្សូ អាបេ នឹងមានជំនួបមួយទល់នឹងមួយជាមួយគ្នា នៅក្នុងប្រទេសចិន ក្នុងជំនួបប្រជុំត្រីភាគី។
កិច្ចប្រជុំត្រីភាគី ចិន កូរ៉េខាងត្បូង ជប៉ុន នឹងចាប់ផ្តើមប្រារព្ធឡើងនៅថ្ងៃទី ២៤ ខែធ្នូ ដើម្បីជជែកពីបញ្ហាពាណិជ្ជកម្មសេរី បញ្ហាកូរ៉េខាងជើង និងទំនាក់ទំនងរវាងចិន និងជប៉ុនជាដើម។ ក្នុងជំនួបក្រៅកិច្ចប្រជុំត្រីភាគីនេះ ប្រធានាធិបតីកូរ៉េខាងត្បូង មូន ចេអ៊ីន និងនាយករដ្ឋមន្ត្រីជប៉ុន ស៊ិនហ្សូ អាបេ នឹងមានកិច្ចប្រជុំមួយទល់ជាមួយគ្នា ដើម្បីជជែកដោះស្រាយវិវាទរវាងកូរ៉េខាងត្បូង និងជប៉ុន។
ប្រាប់អ្នកកាសែត លោក Kim Hyun-chong អនុទីប្រឹក្សាសន្តិសុខជាតិកូរ៉េខាងត្បូង បានប្រាប់យ៉ាងដូច្នេះថា លោកមូន និងលោក អាបេ នឹងដោះដូរគំនិតគ្នា ជុំវិញបញ្ហាទំនាក់ទំនងរវាងទីក្រុងសេអ៊ូល និងទីក្រុងតូក្យូ។ បើតាមទីប្រឹក្សារូបនេះ ជំនួបរវាងលោកប្រធានាធិបតីកូរ៉េខាងត្បូង និងនាយករដ្ឋមន្ត្រីជប៉ុន គឺវាសំខាន់ណាស់ ដើម្បីដោះស្រាយ និងកែលម្អទំនាក់ទំនងប្រទេសទាំងពីរ។ នេះបើតាមការចុះផ្សាយរបស់ទីភ្នាក់ងារព័ត៌មានYonhap។
បើតាមការរំពឹងទុក លោកមូន នឹងលើកយកបញ្ហាការរឹតត្បិតការនាំចេញធាតុកម្របីប្រភេទរបស់ជប៉ុនទៅកូរ៉េខាងត្បូង និងបញ្ហាផ្សេងទៀត ទៅពិភាក្សាជាមួយលោកអាបេ។ ពិតណាស់ ការរឹតត្បិតធាតុកម្រនេះ គឺកើតចេញពីរឿងតុលាការកូរ៉េខាងត្បូង បានចេញសាលក្រមឲ្យក្រុមហ៊ុនជប៉ុន សងថ្លៃជំងឺចិត្តទៅជនរងគ្រោះកូរ៉េ ដែលត្រូវបានគេបង្វំឲ្យធ្វើការក្នុងសម័យអាណានិគមជប៉ុន។
សូមបញ្ជាក់ថា ទំនាស់នេះ បានបង្កឲ្យប្រទេសកូរ៉េខាងត្បូង ដកជប៉ុនចេញពីបញ្ជីពាណិជ្ជកម្មគួរឲ្យទុកចិត្ត។ ចំណែកជប៉ុនវិញ បានដកកូរ៉េខាងត្បូងចេញពីបញ្ជីពាណិជ្ជកម្មមួយនេះដូចគ្នា។ ប៉ុន្តែទើបតែមួយរយៈចុងក្រោយនេះទេ ទំនាក់ទំនងប្រទេសហាក់ដូចជាប្រសើរឡើងវិញ បន្ទាប់ពីកូរ៉េខាងត្បូងសម្រេច មិនផ្តាច់កិច្ចព្រមព្រៀងព័ត៌មានសំខាន់យោធាជាមួយជប៉ុន៕
Tag:
កូរ៉េខាងត្បូង
ជប៉ុន
© រក្សាសិទ្ធិដោយ thmeythmey.com