បទ បថ្យាវត្ត
ហ៊ានហក់ហ៊ានតោងហ៊ានឈោងហ៊ានឆាប
ហ៊ានក្រាញមិនក្រាបគ្រប់គ្រាជួបគ្រោះ
ហ៊ានរលាស់ប្រាណឈានដល់ខ្ពង់ខ្ពស់
ហ៊ានរៀនហ៊ានរស់សាងឈ្មោះឧត្តម។
ហ៊ានចែកហែកចាយកាយកប់សន្សំ
ហ៊ានឧបត្ថម្ភដល់ជនក្រខ្សត់
ហ៊ានចាត់ហាត់ចែងហ៊ានបែងហ៊ានបត់
ហ៊ានឈប់ពេលហត់តែអត់បោះបង់។
ហ៊ានកាត់ហាត់កែបង្វែរចំណង់
ធ្វើរឿងស្មោះត្រង់ដើម្បីសង្គម
ហ៊ានជូនយោបល់កុំខ្វល់គំនុំ
ហ៊ានជួបជំនុំហ៊ានជុំសិក្សា។
ហ៊ានថាខ្លួនខ្វះច្បាស់កើនបញ្ញា
មិនយូរអាត្មាពេញដោយវិជ្ជា
ហ៊ានឆ្លុះខ្លួនឯងនោះយើងគ្រប់គ្នា
អាចរស់សុខជាគ្រប់គ្រាទៅហោង៕