មនុស្ស៨នាក់ស្លាប់និងរាប់រយដេកពេទ្យ ក្រោយពុលស្រាទឹកដូងនៅហ្វីលីពីន

អន្តរជាតិ

មនុស្ស៨នាក់ស្លាប់និងរាប់រយដេកពេទ្យ ក្រោយពុលស្រាទឹកដូងនៅហ្វីលីពីន

23, Dec 2019 , 4:46 pm

រូបភាព

ដោយ:

មនុស្ស៨នាក់បានបាត់បង់ជីវិត និងរាប់រយត្រូវបានបញ្ជូនទៅកាន់មន្ទីរពេទ្យក្នុងប្រទេសហ្វីលីពីន ក្រោយផឹកស្រាទឹកដូង ដែលជឿថា មានផ្ទុកកម្រិតមេតាណុលខ្ពស់ពេក។ អាជ្ញាធរហ្វីលីពីន អះអាងបែបនេះ នៅថ្ងៃទី២៣ ខែធ្នូ។

ជនរងគ្រោះទាំងអស់ បានមានវត្តមានក្នុងពីធីជួបជុំមួយនៅពេលចុងសប្តាហ៍ក្នុងទីក្រុង Rizal ភាគអាគ្នេយ៍នៃរដ្ឋធានីម៉ានីល ។ បន្ទាប់មក ពួកគេបានអះអាងថាឈឺក្រពះ ក្រោយផឹកស្រាមួយប្រភេទ ដែលអ្នកក្នុងស្រុកហ្វីលីពីនស្គាល់ថា «lambanog»។

ប្រាប់ទីភ្នាក់ងារព័ត៌មាន AFP អ្នកនាំពាក្យមន្ទីរពេទ្យរដ្ឋមួយកន្លែងក្នុងរដ្ឋធានី ម៉ានីល បញ្ជាក់ថា ជនរងគ្រោះ៩នាក់ កំពុងស្ថិតក្នុងស្ថានភាពធ្ងន់ធ្ងរ។ ម្យ៉ាងវិញទៀត ប៉ូលិសហ្វីលីពីន អះអាងថា សរុបទៅ ជនគ្រោះ ៣០០នាក់ ត្រូវបានបញ្ជូនទៅកាន់មន្ទីរពេទ្យនានាក្នុងទីក្រុងម៉ានីល។ ហើយអ្នកទាំងនោះ បាននាំគ្នាផឹកស្រាប្រភេទដូចគ្នា ដែលបានទិញនៅក្បែរតំបន់នោះ។

មែនទែនទៅ រដ្ឋាភិបាលហ្វីលីពីន បានដាក់បម្រាមជាបន្ទាន់លើការលក់ភេសជ្ជៈប្រភេទនេះ ដែលមានតម្រូវការខ្ពស់នៅថ្ងៃឈប់សម្រាកបុណ្យណូអែល។ ភាគច្រើននៃស្រាទឹកដូងដែលមានដាក់លក់លើទីផ្សារ ត្រូវបានផលិតឡើងដោយប្រជាជនតំបន់នោះផ្ទាល់តែម្តង។ កន្លងទៅ រដ្ឋាភិបាល ធ្លាប់បានព្រមានប្រឆាំងនឹងការលក់ភេសជ្ជៈមានជាតិអាកុលដែលគ្មានចុះបញ្ជីត្រឹមត្រូវ។

តាមការចុះផ្សាយរបស់ទីភ្នាក់ងារព័ត៌មាន AFP វេជ្ជបណ្ឌិតហ្វីលីពីនម្នាក់ឈ្មោះថា Del Rosario បាននិយាយថា ការលាយច្របាច់គ្នារវាងទឹកដូង និងមេតាណុល អាចបង្កឲ្យមនុស្សស្លាប់ និងងងឹតភ្នែក។ ហើយ កាលពីឆ្នាំមុន មនុស្សជាង ១០នាក់បានស្លាប់ដោយសារតែផឹកស្រាទឹកដូង ដែលបានរកឃើញថា មានផ្ទុកជាតិមេតាណុលខ្ពស់ពេក៕