អត្ថបទពាណិជ្ជកម្ម
ក្រុមហ៊ុនសាណូហ្វី ដាក់សម្ពោធ អាំងស៊ុយលីនថ្មីឈ្មោះថា Toujeo នៅកម្ពុជា
× ក្រុមហ៊ុន អាលីយ៉ង់ហ្វាម៉ាកាំបូដ សហការជាមួយក្រុមហ៊ុន សាណូហ្វី បានដាក់សម្ពោធជាផ្លូវការ នូវផលិតផលឱសថថ្មីមួយ ឈ្មោះថា Toujeo (អាំងស៊ុយលីនក្លាជីន៣០០ឯកតា/១មល) នៅកម្ពុជា កាលពីថ្ងៃសៅរ៍ ទី២១ ខែធ្នូ ឆ្នាំ២០១៩។ Toujeo ជាប្រភេទអាំងស៊ុយលីនអាណាឡូក បាសាល់ជំនាន់ថ្មី មានសកម្មភាពយូរ ប្រើ១ដងក្នុង១ថ្ងៃ ដែលអាចគ្រប់គ្រងបញ្ចុះជាតិស្ករក្នុងឈាមបានល្អ សម្រាប់អ្នកជំងឺទឹកនោមផ្អែមប្រភេទទី១ និង២។
លោកវេជ្ជបណ្ឌិត កុយ វ៉ាន់នី ប្រធានសមាគមគ្រូពេទ្យទឹកនោមផ្អែមនិងក្រពេញកម្ពុជាបានមានប្រសាសន៍ថា ជំងឺទឹកនោមផ្អែមជាជំងឺរ៉ាំរ៉ៃ ដែលប៉ះពាល់ប្រជាជនខ្មែរ ប្រហែល២៤៦, ២០០នាក់ នៅឆ្នាំ២០១៧ ហើយចំនួននៅតែបន្តកើនឡើងជារៀងរាល់ឆ្នាំ។ តាមលោកវេជ្ជបណ្ឌិត កុយ វ៉ាន់នី ជំងឺនេះប៉ះពាល់យ៉ាងខ្លាំង ដល់ជីវិតរស់នៅប្រចាំថ្ងៃរបស់បុគ្គលម្នាក់ៗ ដូចនេះ ភាពងាយស្រួលក្នុងការព្យាបាល ពិតជាសំខាន់ណាស់ និងមិនគួរមើលរំលង ពីព្រោះវាអាចជួយអ្នកជំងឺ ឲ្យគ្រប់គ្រងស្ថានភាពជំងឺរបស់គាត់បានល្អ។
ថ្នាំគ្រាប់សម្រាប់ព្យាបាលជំងឺទឹកនោមផ្អែម នៅតែសំខាន់ និងជម្រើសដំបូង សម្រាប់អ្នកជំងឺទឹកនោមផ្អែមប្រភេទទី២។ ទោះជាយ៉ាងណាក៏ដោយ ក្នុងពេលណាមួយ អ្នកជំងឺទឹកនោមផ្អែមជាច្រើន នឹងជួបបញ្ហាដែលថ្នាំគ្រាប់ទាំងនេះមិនគ្រប់គ្រាន់ ក្នុងការគ្រប់គ្រងជាតិស្ករក្នុងឈាម ហើយគាត់នឹងត្រូវការប្រើបន្ថែមអាំងស៊ុយលីន ដើម្បីគ្រប់គ្រងជំងឺទឹកនោមផ្អែមរបស់គាត់។
លោកវេជ្ជបណ្ឌិត លឹម ហ៊ុយ ប្រធានកិច្ចការវេជ្ជសាស្ត្រ និងបទបញ្ញត្តិ របស់ក្រុមហ៊ុន អាលីយ៉ង់ហ្វាម៉ាកាំបូដ បានមានប្រសាសន៍ថា អាំងស៊ុយលីនបាសាល់ គឺជាជម្រើសដ៏ល្អ និងងាយស្រួលបំផុត សម្រាប់អ្នកជំងឺទឹកនោមផ្អែម ដែលត្រូវចាប់ផ្តើមព្យាបាល ដោយអាំងស៊ុយលីន។ លោកវេជ្ជបណ្ឌិត លឹម ហ៊ុយ ពន្យល់ថា Toujeo ជាអាំងស៊ុយលីនបាសាល់ ដែលមានសកម្មភាពយូរ លើសពី២៤ម៉ោង អាចបំពេញនូវតម្រូវការរបស់អ្នកជំងឺ ដែលអាចបញ្ចុះជាតិស្ករក្នុងឈាមបានពេញមួយថ្ងៃ។ «ការចុះទាបជាតិស្ករក្នុងឈាមជ្រុល គឺជាកង្វល់ដ៏ចម្បង ក្នុងចំណោមអ្នកប្រើអាំងស៊ុយលីន។ ប៉ុន្តែ Toujeo ត្រូវបានបង្ហាញថា មានប្រសិទ្ធភាពបញ្ចុះជាតិស្ករក្នុងឈាមបានល្អ ព្រមទាំងកាត់បន្ថយហានិភ័យ នៃការចុះទាបជាតិស្ករក្នុងឈាមជ្រុលទាំងពេលយប់ និងពេលថ្ងៃ។ ដូចនេះ គ្រូពេទ្យអាចចេញវេជ្ជបញ្ជា ដោយទំនុកចិត្ត នូវអាំងស៊ុយលីនជំនាន់ថ្មីនេះ ដល់អ្នកជំងឺរបស់គាត់ ដើម្បីទទួលបាននូវបទពិសោធន៍ផ្ទាល់»។ នេះជាការពន្យល់បន្ថែមរបស់លោកវេជ្ជបណ្ឌិត លឹម ហ៊ុយ ។
Toujeo ត្រូវបានអនុម័ត និងដាក់សម្ពោធដំបូងគេ នៅឆ្នាំ២០១៥ នៅប្រទេសអាមេរិក និងដាក់សម្ពោធជាបន្តបន្ទាប់ នៅពាសពេញពិភពលោក។ Toujeo ត្រូវបានផលិតឡើង ក្នុងទម្រង់ជាប៊ិចសូឡូស្តា ដែលមានការរចនាម៉ូតឡើងវិញ មានភាពសាមញ្ញ និងងាយស្រួលប្រើ (Toujeo SoloStar៖ ៤៥០ឯកតា/១ដើម ប្រៀបធៀបនឹង Lantus SoloStar៖ ៣០០ឯកតា ក្នុង១ដើម)៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com