អន្តរជាតិ
រូបភាពតំណាង
×![]()
អំពើពុករលួយ ធ្វើឲ្យសេដ្ឋកិច្ចសកលលោកខាតបង់ដល់ទៅ ៣,៦ ទ្រីលានដុល្លារ ប្រចាំឆ្នាំ ។ លោកអគ្គលេខាធិការអង្គការសហប្រជាជាតិ António Guterres លើកឡើងបែបនេះក្នុងថ្ងៃ «ប្រឆាំងអំពើពុករលួយ» អន្តរជាតិ កាលពីថ្ងៃ ០៩ ធ្នូ ឆ្នាំ២០១៩ ។ លោក សង្កត់ធ្ងន់ថា លុយ១ទ្រីលានដុល្លារ ត្រូវបានបង់ក្នុងទម្រង់ជា «ស៊ីសំណូក សូកប៉ាន់» ជារៀងរាល់ឆ្នាំ ខណៈ២,៦ ទ្រីលានដុល្លារផ្សេងទៀត ត្រូវបានលួច ហើយទាំងអស់នេះ គឺមកពីអំពើពុករលួយ។
«ប្រយុទ្ធប្រឆាំងនឹងអំពើពុករលួយ គឺជាក្តីកខ្វល់ជាសកល ព្រោះថា អំពើពុករលួយ ត្រូវបានរកឃើញទាំងក្នុងបណ្តាប្រទេសអ្នកមាន និងប្រទេសក្រីក្រ ហើយភស្តុតាង បង្ហាញថា វាប៉ះពាល់ដល់ប្រជាពលរដ្ឋក្រីក្រយ៉ាងធំធេង»។ អង្គការសហប្រជាជាតិ បានសរសេរបែបនេះលើវេបសាយរបស់ខ្លួន ដោយបន្ថែមថា អំពើរលួយនេះ រួមចំណែកដល់អស្ថិរភាព និងភាពក្រីក្រ ហើយវាជាកត្ដាដ៏ចម្បងមួយក្នុងការបង្អក់ដំណើរការអភិវឌ្ឍប្រទេស។
«អំពើពុករលួយ» អាចធ្វើឡើងក្រោមទម្រង់ជាច្រើនដូចជា ការស៊ីសំណូកសូកប៉ាន់, ការកេងប្រវ័ញ្ច, ការលាងលុយកខ្វក់, ការគេចបង់ពន្ធ និងបក្ខពួកនិយម។ល។ ទោះកើតឡើងក្នុងទម្រង់បែបណាក៏ដោយ អំពើពុករលួយ តែងតែទាមទារឲ្យមានអ្នកបង់ខាត ហើយជារឿយៗវានាំឲ្យស្ថាប័នចុះខ្សោ, ខ្វះការរីកចម្រើន និងពុំអាចផ្តល់សេវាកម្មសាធារណៈប្រកបដោយប្រសិទ្ធភាពជាដើម។
អង្គការសហប្រជាជាតិ បានដាក់អំពើពុករលួយក្នុងបញ្ជី «ឧបសគ្គមួយក្នុងចំណោមឧបសគ្គធំបំផុត» ដើម្បីសម្រេច គោលដៅអភិវឌ្ឍន៍ប្រកបដោយចីរភាពឆ្នាំ២០៣០របស់ខ្លួន ដែលរួមមាន ការលុបបំបាត់ភាពអត់ឃ្លាន និងភាពក្រីក្រ ក៏ដូចជា ពង្រឹងការអប់រំ សុខុមាលភាព និងហេដ្ឋារចនាសម្ព័ន្ធ ជាដើម។ ម្ល៉េះហើយទើប កម្មវិធីអភិវឌ្ឍន៍របស់អង្គការសហប្រជាជាតិ (UNDP) និងការិយាល័យ UN ទទួលបន្ទុកឧក្រិដ្ឋកម្មនិងគ្រឿងញៀន បានបង្កើតយុទ្ធនាការអន្តរជាតិមួយដើម្បីបំពាក់បំប៉ន់មនុស្សគ្រប់គ្នា រាប់ពីអ្នកនយោបាយ ដល់មេសហជីពពាណិជ្ជកម្ម ជាមួយចំណេះដឹង និងបច្ចេកទេសប្រយុទ្ធនឹងអំពើពុករលួយក្នុងប្រទេសពួកគេ។
ម្យ៉ាងទៀត ការស្ទង់មតិឆ្នាំ២០១៧មួយរបស់អង្គការតម្លាភាពអន្តរជាតិ ដែលមានអ្នកចូលរួម (មនុស្សពេញវ័យ) ១៦១ ១៣៦ បានបង្ហាញថា ២៥ភាគរយនៃប្រជាជននៅទូទាំងពិភពលោក អះអាងថា ពួកគេ បានបង់ថ្លៃសំណូក នៅពេលប្រើសេវាកម្មសាធារណៈក្នុងពេល១២ខែចុងក្រោយ។ មិនជារឿងអ្វីដែលគួរឲ្យភ្ញាក់ផ្អើលឡើយ មនុស្ស ៥៧ភាគរយ បាននិយាយថា ការប្រយុទ្ធប្រឆាំងអំពើពុករលួយរបស់រដ្ឋាភិបាលពួកគេ គឺគ្មានប្រសិទ្ធភាពឡើយ។ ការស្ទង់មតិដដែល ក៏រកឃើញទៀតថា ប៉ូលិស និងមន្ត្រីសាធារណៈ ជាប់ចំណាត់ថ្នាក់ជាក្រុមដែលប្រព្រឹត្តអំពើពុករលួយខ្លាំងបំផុត បើផ្អែកលើ មធ្យមភាគជាសកល ។
ដំណឹងល្អ គឺថា ច្រើនជាងពាក់កណ្ដាលនៃអ្នកដែលបានចូលរួមផ្តល់មតិ បានលើកឡើងថា ពួកគេមានទំនុកចិត្តក្នុងការផ្លាស់ប្តូររបៀបរបបដ៏អាក្រក់មួយនេះ។ អារម្មណ៍នេះ គឺជាអ្វីដែលអង្គការសហប្រជាជាតិ សង្ឃឹមនឹងលើកកម្ពស់ នាពេលនេះ និងពេលខាងមុខ ។
មនុស្ស ច្រើនតែគិតថា អំពើពុករលួយ គឺជារបៀបរបបមួយនៃជីវិត ហើយពួកគេគិតថា ការប្រព្រឹត្តរឿងនេះ គឺជារឿងធម្មតា។ យ៉ាងណាមិញ គ្រប់សង្គម វិស័យ និងប្រជាជនទាំងអស់ នឹងទទួលបានអត្ថប្រយោជន៍ពីការរួមគ្នាប្រឆាំងនឹងអំពើពុករលួយក្នុងជីវភាពរស់នៅប្រចាំថ្ងៃរបស់ពួកគេ។ នេះការបញ្ជាក់របស់អង្គការសហប្រជាជាតិ៕
Tag:
អំពើពុករលួយ
អង្គការសហប្រជាជាតិ
សេដ្ឋកិច្ចសកល
© រក្សាសិទ្ធិដោយ thmeythmey.com
