អន្តរជាតិ
ប្រធានាធិបតីតៃវ៉ាន់ ស្នើឲ្យសភាជជែកបន្ថែមលើសំណើច្បាប់ប្រឆាំងការជ្រៀតជ្រែកកិច្ចការផ្ទៃក្នុង លោកស្រីប្រធានាធិបតី Tsai Ing-wen នៅក្នុងកម្មវីធីមួយ។ រូបភាព៖ Reuters
× ប្រធានាធិបតីតៃវ៉ាន់លោកស្រី Tsai Ing-wen នៅថ្ងៃទី២៥ ខែធ្នូ បានជំរុញឲ្យរដ្ឋសភា ពិភាក្សាបន្ថែមទៀត ជុំវិញសំណើច្បាប់ស្តីពីការប្រឆាំងការជ្រៀតជ្រែតកិច្ចការផ្ទៃក្នុង ដើម្បីទប់ស្កាត់ឥទ្ធិពលរបស់ទីក្រុងប៉េកាំងក្នុងការបោះឆ្នោតប្រធានាធិបតីតៃវ៉ាន់នាថ្ងៃខាងមុខ។ សំណើច្បាប់នេះ ត្រូវបានគណបក្សប្រឆាំងជំទាស់ថា គ្រាន់តែជាឧបករណ៍នយោបាយ និងចាត់ទុកបក្សប្រឆាំងជាទីភ្នាក់ងាររបស់បក្សកុម្មយនិស្តចិន ។
គណបក្សប្រជាធិបតេយ្យជឿនលឿន (DPP) របស់តៃវ៉ាន់ បានជំរុញសំណើច្បាប់ស្តីការប្រឆាំងការជ្រៀតជ្រែកកិច្ចការផ្ទៃក្នុងជាថ្មី ទៅសភា ដើម្បីអនុម័ត។ គេរំពឹងថា សំណើច្បាប់អាចត្រូវបានរដ្ឋសភាអនុម័តមុនដំណាច់ឆ្នាំ ២០១៩នេះ។ ពោលគឺធ្វើយ៉ាងណាឲ្យសំណើច្បាប់មួយនេះ ត្រូវអនុម័ត មុនការបោះឆ្នោតប្រធានាធិបតីតៃវ៉ាន់ ក្នុងគោលបំណងទប់ស្កាត់ឥទ្ធិពលចិនជ្រៀតជ្រែកចូលកិច្ចការបោះឆ្នោតមួយនេះ។
ដោយនិយាយពីការទប់ស្កាត់ឥទ្ធិពលរបស់ចិនចំៗ លោកស្រី Tsai Ing-wen បានអះអាងថា ប្រទេសជាច្រើននៅលើពិភពលោក បានអនុម័តច្បាប់ស្តីពីការជ្រៀតជ្រែកកិច្ចការផ្ទៃក្នុង ដើម្បីការពារការពង្រីកឥទ្ធិពលរបស់ចិន ចំណែកតៃវ៉ាន់ក៏ដូចគ្នា។ ក្នុងពិធីធ្វើបទបង្ហាញគោលនយោបាយ ដែលចាក់ផ្សាយនៅលើកញ្ចក់ទូរទស្សន៍របស់តៃវ៉ាន់ ប្រមុខរដ្ឋលើកឡើងថា តៃវ៉ាន់ត្រូវតែមានច្បាប់នេះ ព្រោះទឹកដីមួយនេះ បានប្រឈមបញ្ហាដោយផ្ទាល់ជាច្រើនជាមួយចិនដីគោក។
ជុំវិញការរិះគន់ច្រើនជុំវិញសំណើច្បាប់ លោកស្រី Tsai បបន្តទៀតថា ប្រជាជនតៃវ៉ាន់មួយចំនួនគិតថា សំណើច្បាប់នេះ គឺជាការញុះញង់ និងប្រៀបប្រដូចទៅនឹងច្បាប់សង្គ្រាម ប៉ុន្តែវាមិនដូច្នេះទេ។ ដើម្បីឲ្យមនុស្សមួយចំនួនយល់ពីសំណើច្បាប់មួយនេះ កាន់តែលំអិត លោកស្រី Tsai បានជំរុញឲ្យប្រជាជនទាំងនោះ ចូលទៅក្នុងរដ្ឋសភា ដើម្បីពិភាក្សាឲ្យកាន់តែច្បាស់លាស់។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ចំណែកបក្សប្រឆាំង គូមិញតាង(Kuomintang) ដែលនិន្នាការចង់បានទំនាក់ទំនងល្អជាមួយទីក្រុងប៉េកាំងវិញ ក៏បានរិះគន់សំណើច្បាប់នេះផងដែរ។ បក្សគូមិញតាង បានជំទាស់ថា សំណើច្បាប់ស្តីពីប្រឆាំងការជ្រៀតជ្រែកកិច្ចការផ្ទៃនេះ គ្រាន់តែជាឧបករណ៍នយោបាយរបស់លោកស្រី Tsai និងគណបក្សរបស់លោកស្រីដើម្បីរកសំឡេងឆ្នោតនាថ្ងៃខាងមុខ និងលាបពណ៌បក្សគូមិញតាងថា ជាទីភ្នាក់ងាររបស់បក្សកុម្មុយនិស្តតែប៉ុណ្ណោះ ។
ប្រសិនគ្មានការប្រែប្រួលទេ រដ្ឋសភាតៃវ៉ាន់ នឹងបោះឆ្នោតអនុម័តលើសំណើច្បាប់ស្តីពីការប្រឆាំងការជ្រៀតជ្រែកកិច្ចការផ្ទៃក្នុងនេះនៅសប្តាហ៍ក្រោយ។ តាមរយៈសំណើច្បាប់មួយនេះ តៃវ៉ាន់នឹងហាមឃាត់សកម្មភាពនយោបាយ និងការទទួលមូលនិធិទាំងឡាយពីសំណាក់ប្រទេសជាសត្រូវ ៕
© រក្សាសិទ្ធិដោយ thmeythmey.com