អន្តរជាតិ
រុស្ស៊ីចោទប្រមុខ UN ថា មិនអើពើនឹងអាមេរិកដែលពន្យារពេលផ្ដល់ទិដ្ឋាការឲ្យមន្ត្រីខ្លួន
×![]()
ដោយ: តន ចាន់រិទ្ធារ៉ា
ទីក្រុងមូស្គូ នៅថ្ងៃទី២៥ ខែធ្នូ បានរិះគន់ប្រមុខអង្គការសហប្រជាជាតិ (UN) លោក អាន់តូនីញ៉ូ ហ្គូតេរ៉េស ដែលមិនចាត់វិធានការលើការតវ៉ារបស់រុស្ស៊ីប្រឆាំងអាមេរិកពាក់ព័ន្ធការអូសបន្លាយពេលផ្ដល់ទិដ្ឋាការសម្រាប់មន្ត្រីរុស្ស៊ីដែលត្រូវចូលរួមប្រជុំនៅបុរីញូវយ៉ក។ អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova និយាយថា មន្ត្រីរុស្ស៊ី ត្រូវរង់ចាំរាប់ខែដើម្បីទទួលបានទិដ្ឋាការពីអាមេរិក ទោះជាអាមេរិកមានកាតព្វកិច្ចផ្ដល់ការអនុញ្ញាតឲ្យបានលឿនក្ដី។ 
រុស្ស៊ី នៅតែមិនស្ងប់ចិត្តនឹងអាមេរិកដែលពន្យារពេលផ្ដល់ទិដ្ឋាការឲ្យមន្ត្រីខ្លួនដើម្បីធ្វើដំណើរទៅកាន់ទីស្នាក់ការអង្គការសហប្រជាជាតិនៅបុរីញូវយ៉ក។ រឿងរ៉ាវ ក៏ធ្លាយទៅដល់អង្គលេខាធិការអង្គការសហប្រជាជាតិ អាន់តូនីញ៉ូ ហ្គូតេរ៉េស ដោយមន្ត្រីក្រសួងការបរទេសរុស្ស៊ីចោទមន្ត្រីកំពូលរូបនេះថា ធ្វើជាខ្វាក់ភ្នែកចំពោះមុខទង្វើរបស់អាមេរិក។ នេះបើតាមទីភ្នាក់ងារព័ត៌មាន Reuters ។
អ្នកនាំពាក្យក្រសួងការបរទេសរុស្ស៊ី អ្នកស្រី Maria Zakharova លើកឡើងក្នុងសេចក្ដីថ្លែងការណ៍ថ្ងៃទី២៥ ខែធ្នូ ថា មន្ត្រីក្រសួងការពារជាតិរុស្ស៊ី ក៏ត្រូវធ្វើដំណើរទៅកាន់លេខាធិការដ្ឋានអង្គការសហប្រជាជាតិ ត្រូវរង់ចាំរាប់ខែឯណោះដើម្បីទទួលបានទិដ្ឋាការពីអាមេរិក។ បើតាមអ្នកនាំពាក្យដដែល រឿងដែលគួរឲ្យកត់សម្គាល់នោះ គឺអ្វីៗបានកើតឡើងដោយមិនមានការអើពើបន្តិចណាសោះពីសំណាក់អគ្គលេខាធិការ ហ្គូតេរ៉េស ដែលនោះមានន័យថា លោកក៏មិនខ្វល់ការបំពានធម្មនុញ្ញអង្គការសហប្រជាជាតិដោយអាមេរិកដែរ។
កន្លងទៅ ទីក្រុងមូស្គូ ចោទថា ទីក្រុងវ៉ាស៊ីនតោនមានចេតនាតែម្ដងក្នុងការអូសបន្លាយពេលផ្ដល់ទិដ្ឋាការសម្រាប់មន្ត្រីរុស្ស៊ីដែលមានភារកិច្ចនៅទីស្នាក់ការអង្គការសហប្រជាជាតិក្នុងខែកញ្ញាអំឡុពេលកិច្ចប្រជុំមហាសន្និបាត។ សកម្មភាពបែបនេះ ត្រូវបានរុស្ស៊ីអះអាងថា ជាកត្តាបន្ថែមនាំឲ្យទំនាក់ទំនងទ្វេភាគីដែលកំពុងល្អក់កករកាន់តែយ៉ាប់យ៉ឺនខ្លាំងទៀត។
ដោយសាររឿងនេះ រុស្ស៊ី ក៏កោះហៅមន្ត្រីការទូតជាន់ខ្ពស់អាមេរិកទៅសួរផងដែរ។ រុស្ស៊ីប្រាប់អាមេរិកថា ការពន្យារពេលផ្ដល់ទិដ្ឋាការបែបនេះ ជារឿងមិនអាចទទួលយកបានឡើយ។
ក្រោមកិច្ចព្រមព្រៀងជាមួយអង្គការសហប្រជាជាតិ អាមេរិកដែលជារដ្ឋម្ចាស់ផ្ទះ មានកាតព្វកិច្ចផ្ដល់ទិដ្ឋាការដល់មន្ត្រីមកពីប្រទេសសមាជិកអង្គការសហប្រជាជាតិទាំងអស់ ដែលត្រូវចូលរួមការប្រជុំនានានៅទីស្នាក់ការក្នុងទីក្រុងញូវយ៉ក ពិសេសកិច្ចប្រជុំមហាសន្និបាតដែលធ្វើរៀងរាល់ឆ្នាំ។ សូម្បីតែមន្ត្រីកូរ៉េខាងជើង ឬអ៊ីរ៉ង់ដែលអាមេរិកគ្មានទំនាក់ទំនងការទូតអ្វីនោះ ក៏មានសិទ្ធិទទួលបានទិដ្ឋាការដើម្បីជាន់ទឹកដីទីក្រុងញូវយ៉កនេះដែរ៕
Tag:
រុស្ស៊ី
UN
អាមេរិក
© រក្សាសិទ្ធិដោយ thmeythmey.com
