អន្តរជាតិ
លោកនាយករដ្ឋមន្ត្រីថៃ ប្រាយុទ្ធ ចន្ទអូចា កំពុងលើកបង្ហាញប្រដាប់វាស់ជាតិអាកុល អំឡុងពិធីសម្ពោធចំណតរថយន្តក្រុង នៅថ្ងៃ ២៦ ខែ ធ្នូ ឆ្នាំ ២០១៩ ប្រភពរូប៖ សារព័ត៌មានថៃ The Nation
×![]()
ខណៈពិធីឆ្លងឆ្នាំសកល ២០២០ ខិតចូលមកដល់ លោកនាយករដ្ឋមន្ត្រីថៃ ប្រាយុទ្ធ ចន្ទអូចា នៅថ្ងៃទី២៦ ខែធ្នូ បានសំណូមពរដល់ប្រជាជនថៃ កុំឲ្យពិសាគ្រឿងស្រវឹង ហើយបើកបរ។ ទន្ទឹមនេះ មេដឹកនាំរូបនេះ ក៏បានលើកឡើងពីសសរស្តម្ភបី ដើម្បីទទួលបានសុភមង្គលផងដែរ។
ថ្លែងអំឡុងពិធីបើកសម្ពោធចំណតរថយន្តក្រុងថ្មីមួយកន្លែងក្នុងរាជធានីបាងកក លោក ប្រាយុទ្ធ លើកឡើងថា អំឡុងពេលឆ្លងឆ្នាំថ្មីខាងមុខនេះ លោកចង់ឲ្យមនុស្សគ្រប់គ្នាប្រុងប្រយ័ត្នលើដងផ្លូវកាត់បន្ថយការស្លាប់ និងគ្រោះថ្នាក់។
តាមការចុះផ្សាយរបស់សារព័ត៌មានថៃ The Nation លោកនាយករដ្ឋមន្ត្រី គូសបញ្ជាក់ពីសសរស្តម្ភចំនួន ៣ សម្រាប់សុភមង្គល ដោយលោកហៅពួកវាថា «3Ls» ដូចជា ស្រលាញ់ខ្លួនឯង (Love yourself), ស្រលាញ់គ្រួសារ (Love family) និងស្រលាញ់អ្នកដទៃ (Love others) ។ លោក បន្តថា៖ «នៅពេលគ្រោះថ្នាក់កើតឡើង សសរស្ដម្ភទាំងបីនេះត្រូវបាត់បង់ ដូច្នេះហើយ កុំសេពគ្រឿងស្រវឹង ហើយរក្សាល្បឿនបើកបរអ្នកទាបជាង ៨០ គីឡូម៉ែត្រក្នុងមួយម៉ោង»។
បើតាមលោក ប្រាយុទ្ធ រដ្ឋាភិបាលថៃ សង្ឃឹមថា អត្រាគ្រោះថ្នាក់ចរាចណ៍នឹងស្ថិតនៅអត្រាសូន្យភាគរយ ទោះបីជាវាពិបាកនឹងកើតឡើងក៏ដោយ។ ដោយចាត់ទុក ប៉ូលិស និងប្រជាជនថៃ ជាក្រុមគ្រួសារលោក មេដឹកនាំថៃរូបនេះចង់ឲ្យពួកគេមានសុវត្ថិភាពអំឡុងថ្ងៃឆ្លងឆ្នាំនេះ។
សូមបញ្ជាក់ថា មនុស្ស ១៣ ៦៩២នាក់ បានស្លាប់ និង៧៥៧ ០១០ នាក់រងរបួស ដោយសារគ្រោះថ្នាក់ចរាចរណ៍ក្នុងប្រទេសថៃ អំឡុងពេល១០ខែដំបូងនៃឆ្នាំ២០១៩នេះ ។ ជាមធ្យម គ្រោះថ្នាក់ចរាចរណ៍ សម្លាប់មនុស្ស ៤៥នាក់ក្នុងមួយថ្ងៃ។ នេះបើតាមរបាយការណ៍ចុងក្រោយ ចុះផ្សាយដោយកាសែតបាងកកប៉ុស្តិ៍។ បើតាមអង្គការសុខភាពពិភពលោក (WHO) ប្រទេសថៃ ជាប់ចំណាត់ថ្នាក់ជាប្រទេសលំដាប់ទី៨ ដែលមានអត្រាគ្រោះថ្នាក់ចរាចរណ៍អាក្រក់បំផុតលើពិភពលោក៕
Tag:
ថៃ
ប្រាយុទ្ធចន្ទអូចា
គ្រឿងស្រវឹង
ចរាចរណ៍
© រក្សាសិទ្ធិដោយ thmeythmey.com
