ជាតិ
សេដ្ឋកិច្ច
រដ្ឋាភិបាលចង់បានវិនិយោគឧស្សាហកម្មសំខាន់ពីរ គឺកែច្នៃកសិផល និងឧស្សាហកម្មប្រើជំនាញ រូបពីហ្វេសប៊ុកសម្ដេច ហ៊ុន សែន
× ភ្នំពេញ៖ សម្ដេចនាយករដ្ឋមន្ត្រី ហ៊ុន សែន បានចង្អុលបង្ហាញថា គោលនយោបាយឧស្សាហកម្មរបស់កម្ពុជា គឺទាក់ទាញការវិនិយោគលើវិស័យចំនួនពីរជាអាទិភាព គឺកែច្នៃកសិផល និងឧស្សាហកម្មប្រើជំនាញខ្ពស់។ ការលើកឡើងរបស់ប្រមុខរដ្ឋាភិបាលបែបនេះ គឺត្រូវបានធ្វើឡើងនៅក្នុងពិធីប្រគល់សញ្ញាបត្រដល់និស្សិតនៃសាកលវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច នៅថ្ងៃទី២៦ខែធ្នូ។
ប្រសាសន៍សម្ដេច ហ៊ុន សែន ៖
«គោលនយោបាយឧស្សាហកម្មរបស់យើងបន្ត គឺយើងចង់ទាក់ទាញលើផ្នែក២សំខាន់ ទី១ឧស្សាហកម្មកែច្នៃផលិតផលកសិកម្ម ដែលមិនទាមទារទុនធំពេកទេ សហគ្រាសធុនតូច និងមធ្យមត្រូវដំណើរការអាហ្នឹង ទាំងអ្នកក្នុងស្រុក និងអ្នកក្រៅស្រុក»។ នេះជាការគូសបញ្ជាក់របស់សម្ដេច ហ៊ុន សែន ។ សម្ដេចបន្តថា៖«រីឯការចង់បានទី២ គឺការវិនិយោគទៅលើឧស្សាហកម្មបច្ចេកវិទ្យា ទោះបីជាយើងនៅរក្សាឧស្សាហកម្មអតិពលកម្ម ដែលប្រើកម្លាំងច្រើនដូចជាវិស័យកាត់ដេរ ប៉ុន្តែបើយើងនៅទ្រឹងប៉ុណ្នឹងទៅមិនរួចទេ អ៊ីចឹងត្រូវទាញយកឧស្សាហកម្មជំនាញខ្ពស់»។
ប្រមុខរដ្ឋាភិបាល និងរបាយការណ៍របស់ធនាគារពិភលោកដែលចេញផ្សាយកន្លងមក លើកឡើងដូចគ្នា គឺកម្ពុជាកំពុងមានភាពទាក់ទាញការវិនិយោគរោងចក្រឧស្សាហកម្មមិនមែនកាត់ដេរ ដូចជាឧស្សាហកម្មដំឡើងយានយន្ត គ្រឿងបង្គុំអេឡិចត្រូនិក គ្រឿងបន្លាស់ជាដើម ពិសេសការវិនិយោគពីក្រុមហ៊ុនជប៉ុន។ ប៉ុន្មានឆ្នាំចុងក្រោយនេះ ការនាំចេញឧស្សាហកម្មប្រភេទនេះបានកាន់កាប់ទំហំនាំចេញរបស់កម្ពុជាកាន់តែធំដែលមានប្រមាណ១០ភាគរយនៃការនាំចេញសរុប បើធៀបនឹងទំហំមិនដល់២ភាគរយផងនៅឆ្នាំ២០១០។ ប៉ុន្តែបើតាមធនាគារពិភពលោក កម្ពុជាត្រូវពង្រឹងធនធានមនុស្ស កែលម្អបរិយាកាសធុរកិច្ច និងបញ្ចុះថ្លៃដើមផលិតកម្ម ដើម្បីភាពទាក់ទាញការវិនិយោគទាំងនោះ៕
Tag:
កែច្នៃកសិផល
ឧស្សាហកម្មជំនាញខ្ពស់
© រក្សាសិទ្ធិដោយ thmeythmey.com