អន្តរជាតិ
ជប៉ុន នឹងបញ្ជូននាវានិងយន្តហោះទៅការពារកប៉ាល់ដឹកប្រេងខ្លួននៅមជ្ឈិមបូព៌ា
លោកនាយករដ្ឋមន្រ្តីជប៉ុនស៊ិនហ្សូ អាបេ។ រូបភាព៖ Reuters
×![]()
ដោយ: ធៀន ភារិន្ទ
គណៈរដ្ឋមន្ត្រីជប៉ុន នៅថ្ងៃទី២៧ ខែធ្នូ បានអនុម័តឯកសារមួយច្បាប់ ស្តីពីការបញ្ជូននាវាចម្បាំង និងយន្តហោះយាមល្បាតទៅកាន់តំបន់មជ្ឈិមបូព៌ា។ គម្រោងមួយនេះ ធ្វើឡើង ដើម្បីការពារកប៉ាល់ដឹកប្រេងរបស់ខ្លួនពីការវាយប្រហារណាមួយនៅក្នុងតំបន់នោះ។ 
តាមរយៈគម្រោង ដែលគណៈរដ្ឋមន្ត្រីជប៉ុនបានអនុម័ត នាវាចម្បាំងបំពាក់ដោយឧទ្ធម្ភាគចក្រ និងយន្តហោះយាមល្បាត P-3C ចំនួនពីរគ្រឿង នឹងត្រូវបានគេបញ្ជូនទៅតំបន់មជ្ឈិមបូព៌ា ដើម្បីការពារកប៉ាល់ដឹងប្រេងរបស់ជប៉ុន។ បើតាមគម្រោងមួយនេះ នាវាចម្បាំងP-3C គ្រោងនឹងដាក់ឲ្យប្រតិបត្តិការនៅខែមករា ខណៈពេលនាវាចម្បាំង នឹងដាក់ឲ្យប្រតិបត្តិការនៅខែកុម្ភៈ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ក្រៅពីការបញ្ជូននាវាចម្បាំង និងយន្តហោះយាមល្បាត ឯកសារមួយច្បាប់ខាងលើ ក៏បានកំណត់ពីតួនាទីរបស់រដ្ឋមន្ត្រី ដែលមានសិទ្ធិអំណាច ក្នុងការចេញបញ្ជាឲ្យបើកប្រតិបត្តិការ ក្នុងពេលអាសន្នផងដែរ។ ក្នុងនោះរដ្ឋមន្ត្រីការពារជាតិ នឹងចេញបញ្ជាពិសេសមួយ ដើម្បីអនុញ្ញាតឲ្យកងកម្លាំងចេញប្រតិបត្តិការពារកប៉ាល់ដឹកប្រេង ប្រសិនបើមានការវាយប្រហារណាមួយ។
យ៉ាងណាក៏ដោយ ការបញ្ជូននាវាចម្បាំង និងយន្តហោះយាមល្បាតនេះ មិនមែនជាប្រតិបត្តិការ នៅក្នុងច្រកសមុទ្រ Hormuz នោះឡើយ។ ប៉ុន្តែជប៉ុន នឹងបើកប្រតិបត្តិការនៅក្នុងឈូងសមុទ្រអូម៉ង់ ដែលស្ថិតនៅភាគខាងជើងឈូងសមុទ្រអារ៉ាប់ និង ឈូងសមុទ្រអាឌែន។ ការណ៍នេះ រដ្ឋាភិបាលជប៉ុន ទំនងជាមិនចង់បង្កើតទំនាក់ទំនងល្អក់កករជាមួយរដ្ឋាភិបាលអ៊ីរ៉ង់។
ដើម្បីជំរុញឲ្យប្រតិបត្តិការមួយនេះកាន់តែឆាប់រហ័ស និងរលូន នាថ្ងៃទី២០ ខែធ្នូ នាយករដ្ឋមន្ត្រី ស៊ិនហ្សូ អាបេ បានជួបជាមួយប្រធានាធបិតីអ៊ីរ៉ង់ ហាសាន់ រូហានី នាទីក្រុងតូក្យូ ដើម្បីជជែកពីគម្រោងនៃការបញ្ជូនកងកម្លាំងទៅតំបន់មជ្ឈិមបូព៌ា និងបញ្ហាមួយចំនួនផ្សេងទៀត។
បើទោះបីជាជប៉ុន ជាសម្ពន្ធមិត្តចាក់ទឹកមិនលិចជាមួយអាមេរិកក៏ពិតមែន ប៉ុន្តែទីក្រុងតូក្យូនៅតែរក្សាទំនាក់ទំនងដ៏ល្អជាមួយទីក្រុងតេហេរ៉ង់។ ជាក់ស្តែងជប៉ុន បានគេចវេះ មិនសហការជាមួយអាមេរិក ដើម្បីបង្កើតកងកម្លាំងយាមល្បាត ក្នុងការពារនាវាដឹកប្រេងចេញពីតំបន់មជ្ឈិបូព៌ាជាដើម។ ការណ៍នេះ ជប៉ុនធ្វើឡើង ដើម្បីបញ្ចៀសការប្រឈមដាក់គ្នាជាមួយអ៊ីរ៉ង់ ៕
Tag:
ជប៉ុន
© រក្សាសិទ្ធិដោយ thmeythmey.com
