អ្នកជំនាញសន្តិសុខព្រមានពីសង្គ្រាមកូរ៉េលើកទី២ បើផ្ទុះឧបទ្ទវហេតុនៅកូរ៉េខាងជើង

អន្តរជាតិ

អ្នកជំនាញសន្តិសុខព្រមានពីសង្គ្រាមកូរ៉េលើកទី២ បើផ្ទុះឧបទ្ទវហេតុនៅកូរ៉េខាងជើង

27, Dec 2019 , 10:19 pm

រូបភាព

ដោយ:

អតីតមន្ត្រីជាន់ខ្ពស់របស់មន្ទីរបញ្ចកោណអាមេរិកម្នាក់ បានព្រមានថា ស្ថានការណ៍នៅឧបទ្វីបកូរ៉េ អាចក្លាយជាគ្រោះថ្នាក់បំផុត ក្នុងរយៈពេល១ខែ ឬ២ខែខាងមុខ ដោយសង្កត់ធ្ងន់ថា ឧបទ្ទវហេតុពាក់ព័ន្ធកូរ៉េខាងជើង អាចបង្កឲ្យសង្គ្រាមកូរ៉េលើកទីពីរផ្ទុះឡើង។ លោក បន្ថែមថា ប្រសិនបើផ្ទុះឡើងមែន សង្គ្រាមនេះ នឹងអូសជប៉ុននិងចិនឲ្យចូលរួមផងដែរ។

«ប្រសិនបើក្រោយខែមករា កូរ៉េខាងជើង ត្រលប់ទៅធ្វើការសាកល្បងមីស៊ីលបាលីស្ទិកអន្តរទ្វីប (ICBM) វិញនោះ ដែលខ្លួនបានផ្អាកតាំងពីខែវិច្ឆិកា ២០១៧ ដូច្នេះវាមានលទ្ធភាពខ្ពស់ដែលប្រធានាធិបតីអាមេរិក ដូណាល់ ត្រាំ នឹងបើកការវាយប្រហារលើកូរ៉េខាងជើង»។ លោក Graham Allison អតីតឧបការីរដ្ឋមន្ត្រីការពារជាតិក្រោមអាណត្តិលោកប្រធានាធិបតី Bill Clinton បញ្ជាក់បែបនេះ ក្នុងបទសម្ភាសមួយជាមួយទីភ្នាក់ងារព័ត៌មាន Kyodo ក្នុងទីក្រុងតូក្យូ នៅថ្ងៃទី២៥ ខែធ្នូកន្លងទៅ ។

បច្ចុប្បន្នជា សាស្ត្រាចារ្យម្នាក់នៅសាកលវិទ្យាល័យ Harvard លោក Allison អះអាងថា បើអាមេរិកវាយកូរ៉េខាងជើង ក្រុងព្យុងយ៉ាង ប្រាកដវាយបកលើក្រុងសេអ៊ូល។ ជាការឆ្លើយតប ក្រុងវ៉ាស៊ីនតោននិងសេអ៊ូល នឹងពួតដៃគ្នាវាយកម្ទេចទីក្រុងព្យុងយ៉ាង ដែលមានចិនជាខ្នងបង្អែក ហើយទង្វើនេះអាចបង្កទៅជាសង្គ្រាមកូរ៉េលើកទី២។

ដោយមើលឃើញថា ជប៉ុនជាសម្ព័ន្ធមិត្តដ៏សំខាន់របស់សហរដ្ឋអាមេរិក និងជាមហាអំណាចសេដ្ឋកិច្ចលំដាប់ទី៣ លោក Allison បានទទូចឲ្យរដ្ឋាភិបាលក្រុងតូក្យូដើរតួសកម្មជាងមុនបន្ថែមទៀតក្នុងកិច្ចការអន្តរជាតិដើម្បីបញ្ចៀសសង្គ្រាមរវាងសហរដ្ឋអាមេរិក និងចិនដែលគាំទ្រកូរ៉េខាងជើង។

កន្លងទៅ លោក ត្រាំ ធ្លាប់បានបង្ហើបថា សហរដ្ឋអាមេរិកអាចប្រើកម្លាំងយោធាប្រឆាំងកូរ៉េខាងជើង ប្រសិនបើជារឿងចាំបាច់។ ក្រុងវ៉ាស៊ីនតោន បន្តដាក់សម្ពាធឲ្យក្រុងព្យុងយ៉ាងគោរពតាមការតាំងចិត្តខ្លួនក្នុងការរំសាយអាវុធនុយក្លេអ៊ែរក្នុងឧបទ្វីបកូរ៉េ ហើយផ្អាកការសាកល្បងមីស៊ីលបាលីស្ទិករយៈចម្ងាយឆ្ងាយដែលអាចបាញ់ដល់ទឹកដីអាមេរិក។

កាលពីថ្មីៗក្នុងខែធ្នូនេះ កូរ៉េខាងជើង បានប្រកាសផ្ញើ «អំណោយណូអែល» ទៅកាន់សហរដ្ឋអាមេរិក ប្រសិនបើគ្មានចំណុចរបត់ណាមួយកើតឡើងក្នុងជំនួបនុយក្លេអ៊ែររវាងប្រទេសទាំងពីរ ត្រឹមដំណាច់ឆ្នាំ២០១៩នេះទេនោះ។ ក្រុងព្យុងយ៉ាង បន្តជំរុញឲ្យរដ្ឋាភិបាលក្រុងវ៉ាស៊ីនតោនផ្តល់កិច្ចព្រមព្រៀងមួយ ដោយការដកទណ្ឌកម្មប្រឆាំងខ្លួន ហើយថែមទាំងបានព្រមានថា ប្រសិនបើអាមេរិកពុំបញ្ចេញសកម្មភាពណាមួយទេនោះ ខ្លួននឹងអនុវត្តយុទ្ធសាស្ត្រថ្មីមួយ ។ សម្រាប់យុទ្ធសាស្ត្រនេះ អ្នកជំនាញសន្តិសុខជាច្រើន គិតថា វាប្រហែលបង្ហាញពីការសញ្ញានៃការចាប់ផ្តើមឡើងវិញនូវការសាកល្បងមីស៊ីលបាលីស្ទិកអន្តរទ្វីប ឬនុយក្លេអ៊ែរ ។

មែនទែនទៅ ក្នុងខែ ធ្នូ នេះ កូរ៉េខាងជើងបានបាញ់សាកល្បងគ្រាប់រ៉ុក្កែតចំនួន ពីរ លើក ដោយមួយ នៅថ្ងៃទី៨ និងមួយទៀត នៅថ្ងៃទី ១៤ ខែធ្នូ ។ ទាក់ទិននឹងការបាញ់នេះ ក្រុងព្យុងយ៉ាង បានហៅវាថាជា «ការសាកល្បងដ៏សំខាន់បំផុតមួយ» និង «ចាំបាច់បំផុត» តែគ្មានផ្តល់ព័ត៌មានលម្អិត។

គួរររំឭកបន្តិចថា សង្គ្រាមកូរ៉េបានផ្ទុះឡើងនៅថ្ងៃទី២៥ ខែមិថុនា ឆ្នាំ១៩៥០ ក្រោយកូរ៉េខាងជើងឈ្លានពានកូរ៉េខាងត្បូង។ សង្គ្រាមនេះ បានអូសបន្លាយអស់៣ឆ្នាំ ដោយនៅថ្ងៃ ទី២៧ ខែកក្កដា ឆ្នាំ១៩៥៣ បទឈប់បាញ់ដើម្បីបញ្ចប់ការវាយគ្នាមួយ ត្រូវបានចុះហត្ថលេខារវាងអង្គការសហប្រជាជាតិ, ចិននិងកូរ៉េខាងជើង ឯកូរ៉េខាងត្បូងពុំបានចុះហត្ថលេខាឡើយ។ ក្នុងសង្គ្រាមនេះ គ្មានភាគីណាមួយបានយកជ័យជម្នះ។ តាមពិតទៅ សង្គ្រាមនៅតែបន្តមកទល់នឹងពេលនេះ ព្រោះថាកូរ៉េទាំងពីរ ពុំទាន់បានចុះហត្ថលេខាលើសន្ធិសញ្ញាសន្តិភាពណាមួយជាមួយគ្នាឡើយ៕