អន្តរជាតិ
សិង្ហបុរី និងនូវែលសេឡង់ យល់ព្រមដំឡើងកិច្ចព្រមព្រៀងសេដ្ឋកិច្ចបន្ថែមទៀត លោកនាយករដ្ឋមន្រ្តីសិង្ហបុរី លីសៀន ឡុង ជាមួយសមភាគីនូវែលសេឡង់ លោកស្រីJacinda Ardern។ រូបភាព៖ ST FILE
× ការដំឡើងកិច្ចព្រមព្រៀងរវាងនូវែលសេឡង់ និងសិង្ហបុរី ស្តីពីភាពជាដៃគូសេដ្ឋកិច្ចកាន់តែជិតស្និទ្ធ (ANZSCEP) ត្រូវបានប្រទេសទាំងពីរផ្តល់សច្ចាប័នរួចរាល់ហើយ។ ថ្ងៃទី១ ខែមករា ឆ្នាំ ២០២០ កិច្ចព្រមព្រៀងទ្វេភាគីនេះ នឹងចូលជាធរមាន។ នេះបើតាមការអះអាងរបស់រដ្ឋមន្ត្រីក្រសួងពាណិជ្ជកម្ម និងឧស្សាហកម្ម នៅថ្ងៃទី៣០ ខែធ្នូ។
ដើមខែមករា ឆ្នាំ ២០២០ កិច្ចព្រមព្រៀងរវាងនូវែលសេឡង់ និងសិង្ហបុរី ស្តីពីភាពជាដៃគូសេដ្ឋកិច្ចកាន់តែជិតស្និទ្ធ(ANZSCEP) នឹងចូលជាធរមាន បន្ទាប់ពីប្រទេសទាំងពីរបានផ្តល់សច្ចាប័នរួចមក។
ANZSCEP ជាកិច្ចព្រមព្រៀងទ្វេភាគី ប្រទេសទាំងពីរបានដាក់ឲ្យប្រើប្រាស់តាំងពីឆ្នាំ២០០១មកម្លេះ។ រហូតមកដល់ខែមិថុនា ឆ្នាំ ២០១៧ សិង្ហបុរី និងនូវែលសេឡង់ បានចាប់ផ្តើមចរចាជាមួយគ្នាទៀត ដើម្បីដំឡើងកិច្ចព្រមព្រៀងសេដ្ឋកិច្ចសេរីមួយនេះ ឲ្យកាន់តែល្អប្រសើរជាងមុន។ ការដំឡើងកិច្ចព្រមព្រៀង ដែលផ្អែកលើសសរស្តម្ភសេដ្ឋកិច្ច និងពាណិជ្ជកម្ម ត្រូវបានប្រទេសទាំងពីរចុះហត្ថលេខានៅថ្ងៃទី១៧ ខែមេសា ឆ្នាំ២០១៩ កន្លងទៅ។
ពាក់ព័ន្ធទៅនឹងកិច្ចព្រមព្រៀងនេះ រដ្ឋមន្ត្រីពាណិជ្ជកម្ម និងឧស្សាហកម្មសិង្ហបុរី Chan Chun Sing បានបញ្ជាក់ថា ការអភិវឌ្ឍកិច្ចព្រមព្រៀងពាណិជ្ជកម្មមួយនេះ ធ្វើឡើងក្នុងគោលបំណងកាត់បន្ថយរបាំងពន្ធគយ ការពង្រឹងបទបញ្ញត្តិកិច្ចសហប្រតិបត្តិការ និងការខិតខំលើពាណិជ្ជកម្មអេឡិចត្រូនិច រវាងប្រទេសទាំងពីរ។ បន្ថែមពីលើនេះ កិច្ចព្រមព្រៀងពាណិជ្ជកម្ម និងសេដ្ឋកិច្ចនេះ នឹងកាត់បន្ថយពីវេលានាំចេញទំនិញ និងការដឹកជញ្ជូនកាន់តែរហ័យ។ នេះបើតាមការចុះផ្សាយរបស់ទូរទស្សន៍ Channel News Asia។
សូមបញ្ជាក់ថា ពាណិជ្ជកម្មរវាងសិង្ហបុរី និងនូវែលសេឡង់ បានកើនឡើងរហូតដល់ជាង ៣ពាន់លានដុល្លារឯណោះក្នុងឆ្នាំ ២០១៨។ សិង្ហបុរី គឺជាដៃគូវិនិយោគទី៦ របស់ប្រទេសនូវែលសេឡង់ ដែលមានទំហំទឹកប្រាក់រហូតដល់ទៅជិត ៣ពាន់លានដុល្លារនៅដំណាច់ឆ្នាំ ២០១៧ ៕
Tag:
សិង្ហបុរី
នូវែលសេឡង់
© រក្សាសិទ្ធិដោយ thmeythmey.com