អន្តរជាតិ
បច្ចេកវិទ្យា
សម្តេចប៉ាប ស្នើឲ្យសមាជិកគ្រួសារដាក់ទូរសព្ទចុះហើយជជែកគ្នាវិញពេលបរិភោគបាយ
× សម្តេចប៉ាប ហ្វ្រង់ស៊ីស (Pope Francis) បានអំពាវនាវឲ្យមនុស្សនាំគ្នាដាក់ទូរសព្ទនៅឆ្ងាយពីពួកគេ នៅពេលបរិភោគអាហារពេលល្ងាចជាមួយគ្រួសារ ហើយផ្តើមជជែកគ្នាជំនួសវិញ។ សម្តេចសង្ឃកាតូលិករូបនេះ បានលើក ព្រះយេស៊ូ (Jesus) ម៉ារី (Mary) ដែលម្តាយព្រះយេស៊ូ និងចូស៊េប (Joseph) ដែលជាឪពុកព្រះយេស៊ូ ជាឧទាហរណ៍។
នៅចំពោះសាសនិក នៅទីលាន Saint Peter ក្នុងបុរីវ៉ាទីកង់ កាលពីថ្ងៃទី២៩ ខែធ្នូ សម្តេច ប៉ាប មានបន្ទូលថា ពួកគេ (សំដៅលើក្រុមគ្រួសារព្រះយេស៊ូ) បានបន់ស្រន់, ប្រកបការងារ និងប្រាស្រ័យទាក់ទងគ្នាទៅវិញទៅមក។ តាមការចុះផ្សាយរបស់សារព័ត៌មាន BBC ទ្រង់បានមានបន្ទូលទៀតថា៖«យើងត្រូវតែត្រលប់ទៅរកការប្រាស្រ័យទាក់ទងក្នុងគ្រួសារយើងវិញ»។
«ខ្ញុំសួរថា តើអ្នកគឺជាគ្រួសារដែលចេះប្រាស្រ័យទាក់ទងគ្នា ឬក៏អ្នកគឺជាគ្រួសារ ដែលមានក្មេងៗ អង្គុយនៅតុអាហារ តែបែរនាំគ្នាជជែកលើទូរសព្ទដៃពួកគេ» ។ ប្រមុខបុរីវ៉ាទីកង់ មានបន្ទូលបែបនេះ ដោយសង្កត់ធ្ងន់ថា ឪពុកម្តាយ កូនៗ ជីដូនជីតា ដែលជាសមាជិកគ្រួសារទាំងឡាយ សូមអ្នកទាំងអស់គ្នា ចូលនាំគ្នាជជែកពិភាក្សាគ្នា ជំនួសឲ្យការប្រើទូរសព្ទ។
ឲ្យពិតទៅ នេះពុំមែនជាលើកទីមួយឡើយ ដែលសម្តេចប៉ាប ហ្វ្រង់ស៊ី ដែលមានអ្នកគាំទ្រលើបណ្តាញ Twitter ១៨លាននាក់ បានស្តីបន្ទោសអ្នកគាំទ្រទ្រង់ចំណាយពេលច្រើនលើឧបករណ៍អេឡិចត្រូនិកពួកគេ ជាពិសេស នៅពិធីជួបជុំសាសនិក។ ក្នុងឆ្នាំ២០១៧ ទ្រង់ បានមានបន្ទូលថា នៅពេលទ្រង់មានបន្ទូលថា «សូមបើកដួងចិត្តអ្នក» មនុស្សនាំគ្នាបើកទូរសព្ទដៃពួកគេហើយថតរូបភាពទៅវិញ។ ត្រង់នេះ សម្តេចប៉ាប ចាត់ទុកជារឿងដ៏អាក្រក់បំផុត៕
Tag:
ប៉ាបហ្វ្រង់ស៊ីស
ទូរសព្ទ
បច្ចេកវិទ្យា
© រក្សាសិទ្ធិដោយ thmeythmey.com