ចិន និងអាមេរិក គ្រោងចុះហត្ថលេខាលើកិច្ចព្រមព្រៀងពាណិជ្ជកម្មឆាប់ៗខាងមុខ

អន្តរជាតិ

ចិន និងអាមេរិក គ្រោងចុះហត្ថលេខាលើកិច្ចព្រមព្រៀងពាណិជ្ជកម្មឆាប់ៗខាងមុខ

31, Dec 2019 , 10:23 am

រូបភាព

លោកឧបនាយករដ្ឋមន្រ្តីចិន Liu He។ រូបភាព៖ AP

ដោយ: ធៀន ភារិន្ទ

ឧបនាយករដ្ឋមន្ត្រីចិន Liu He នៅថ្ងៃទី៤ ខែមករា ឆ្នាំ២០២០ខាងមុខនេះ នឹងធ្វើដំណើរទស្សនកិច្ចទៅអាមេរិក។ តាមរយៈដំណើរនេះ ត្រូវបានគេរំពឹងថា លោកឧបនាយករដ្ឋមន្ត្រី នឹងចុះហត្ថលេខាលើកិច្ចព្រមព្រៀងពាណិជ្ជកម្មដំណាក់កាលទីមួយ។ នេះបើតាមរបាយការណ៍ ដែលចេញផ្សាយដោយសារព័ត៌មាន South China Morning Post នៅថ្ងៃទី៣០ ខែធ្នូ។

តាមប្រភព ដែលសុំមិនបញ្ចេញឈ្មោះ ទីក្រុងវ៉ាស៊ីនតោន បានផ្តល់សំណើអញ្ជើញចិន ហើយទីក្រុងប៉េកាំង បានទទួលសំណើនេះ។ បើគ្មានការផ្លាស់ប្តូរទេ អ្នកតំណាងចរចាពាណិជ្ជកម្មចិន លោកឧបនាយករដ្ឋមន្ត្រី Liu He នឹងដឹកនាំប្រតិភូចិនមួយក្រុម តាមការអញ្ជើញមួយនេះនៅថ្ងៃទី៤ មករា រហូតដល់សប្តាហ៍ក្រោយ។

រហូតមកទល់ពេលនេះ ភាគីចិន និងអាមេរិក មិនទាន់បានការអះអាងជាផ្លូវការណាមួយ ទាក់ទងនឹងដំណើរទស្សនកិច្ចនេះនៅឡើយទេ។

ជុំវិញបញ្ហានេះ ប្រធានាធិបតីអាមេរិក ដូណាល់ ត្រាំ ធ្លាប់បានបង្ហើបពីកិច្ចព្រមព្រៀងដំណាក់កាលទីមួយម្តងហើយ នាសប្តាហ៍មុន នៅកន្លែងកម្សាន្តរបស់លោកនៅរដ្ឋ Florida។ ពេលនោះលោក ត្រាំ បានអះអាងថា លោក និងប្រធានាធិបតីស៊ី ជិនភីង អាចចុះហត្ថលេខាលើកិច្ចព្រមព្រៀង។ ប៉ុន្តែលោក មិនបានបញ្ជាក់លំអិតទេអំពីការចុះហត្ថលេខាលើកិច្ចព្រមព្រៀងនេះ។

ប្រសិនបើកិច្ចព្រមព្រៀងដំណាក់កាលទីមួយ អាចត្រូវបានប្រទេសទាំងពីរចុះហត្ថលេខាមែននោះ វាគឺជារឿងល្អ។ វាល្អ ព្រោះទីក្រុងប៉េកាំង និងវ៉ាស៊ីនតោន មិនត្រឹមតែអាចបន្ធូរបន្ថយភាពតានតឹងលើសង្គ្រាមពាណិជ្ជកម្មជាមួយគ្នាបានទេ ប៉ុន្តែភាគីទាំងពីរថែមទាំងអាចបន្ធូរបន្ថយបញ្ហាជនជាតិភាគតិចវីហ្គ័រ និងហុងកុងថែមទៀត។ នេះបើតាមការចុះផ្សាយរបស់កាសែត South China Morning Post ដដែល។

សូមបញ្ជាក់ថា កិច្ចព្រមព្រៀងពាណិជ្ជកម្មដំណាក់កាលទីមួយនេះ ត្រូវបានអាមេរិក និងចិន បានចរចាជាមួយគ្នាអស់ជាច្រើនសប្តាហ៍ និងបានរៀបចំឲ្យប្រធានាធិបតីអាមេរិក និងប្រធានាធិបតីចិនចុះហត្ថលេខានៅប្រទេសស៊ីលីក្នុងអំឡុងពេលកិច្ចប្រជុំAPEC។ ប៉ុន្តែព្រឹត្តិការណ៍នេះ ត្រូវលុបចោលទៅវិញ បន្ទាប់ពីស៊ីលី មានវិបត្តិនយោបាយនៅក្នុងប្រទេស។ ដោយសារតែការអាក់ខាននេះ កិច្ចព្រមព្រៀងពាណិជ្ជកម្មដំណាក់ទីមួយ ត្រូវរងភាពរាំងស្ទះចាប់តាំងពីពេលនោះមក៕