ជាតិ
សង្គមជាតិ
អគ្គស្នងការ៖ ពីពេលនេះទៅ លែងឲ្យមានល្បែងអនឡាញ
× នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានបញ្ជាឲ្យសមត្ថកិច្ច ចាប់ផ្តើមបិទល្បែងអនឡាញគ្រប់ប្រភេទ ចាប់ពីថ្ងៃទី៣១ ខែធ្នូ ឆ្នាំ២០១៩ទៅ ដោយមិនត្រូវឲ្យមានទៀតឡើយ។ នេះបើតាមការចុះផ្សាយលើគេហទំព័ររបស់អគ្គស្នងការដ្ឋាននគរបាលជាតិ។
នគរបាលជាតិ បានឲ្យដឹងថា បញ្ជារបស់លោក នេត សាវឿន ធ្វើឡើងក្នុងកិច្ចប្រជុំផ្សព្វផ្សាយសារាចរណែនាំស្តីពីការពង្រឹងការគ្រប់គ្រងអាជីវកម្មល្បែងភ្នាល់តាមម៉ាស៊ីនអេឡិចត្រូនិច តាមរយៈអ៊ីនធឺណិតអនឡាញទាំងក្នុង និងក្រៅប្រទេស។ កិច្ចប្រជុំនេះ មានការចូលរួមពីតំណាងក្រសួងសេដ្ឋកិច្ច អភិបាលរងរាជធានីខេត្ត ស្នងការ-ស្នងការរងរាជធានីខេត្ត ប្រធាន-តំណាងក្រុមហ៊ុនកាស៊ីណូទាំងអស់ និងមន្ត្រីពាក់ព័ន្ធផ្សេងទៀត។
លោក នេត សាវឿន រម្លឹកក្នុងកិច្ចប្រជុំថា រដ្ឋាភិបាលកម្ពុជា មិនអនុញ្ញាតឲ្យមានល្បែងអនឡាញបន្តទៀតទេ។ លោកអគ្គស្នងការ លើកឡើងថា មានបុគ្គល និងក្រុមហ៊ុនខ្លះ ដើរបោកបញ្ឆោតថា សារាចរណែនាំរបស់រដ្ឋាភិបាលស្តីពីការបិទល្បែងអនឡាញនេះមិនពិត ហើយពួកគេ ធានាថា អាចបើកនៅកន្លែងនេះ ឬកន្លែងនោះបាន។ លោក ចាត់ទុក ទង្វើនេះ ថាជាឧបាយកល និងសកម្មភាពរបស់ជនទុច្ចរិត។ លោក សង្កត់ធ្ងន់ថា គ្មានបុគ្គល ឬអង្គភាពណា អាចបំពានលើស្មារតីសារាចរណែនាំនេះទេ៕
Tag:
ល្បែងឡនឡាញ
នេត សាវឿន
© រក្សាសិទ្ធិដោយ thmeythmey.com