ជាតិ
អាជ្ញាធរអប្សរា ឈប់ឲ្យបើកយានជំនិះចូលប្រាសាទតាព្រហ្មតាមទ្វារខាងកើតមួយរយៈ
ច្រកខាងកើតនៃប្រាសាទតាព្រហ្ម
×![]()
ដោយ: ផាត ដាណេ
ភ្នំពេញ៖ អាជ្ញាធរជាតិអប្សរា ហាមមិនឲ្យយានជំនិះគ្រប់ប្រភេទ បើកចូលប្រាសាទតាព្រហ្មតាមទ្វារខាងមួយរយៈសិន។ តាមរយៈសេចក្តីជូនដំណឹងដែលចេញនៅថ្ងៃទី៣០ ខែធ្នូ ឆ្នាំ២០១៩ អាជ្ញាធរជាតិអប្សរា ប្រាប់ហេតុផលថា ការហាមប្រាមនេះ គឺដើម្បីលើកតម្លៃបេតិកភណ្ឌ និងរក្សាសុវត្ថិភាពប្រាសាទនេះ។ 
អាជ្ញាធរជាតិអប្សរា បញ្ជាក់ថា លើកលែងតែរថយន្តសង្គ្រោះបន្ទាន់ យានជំនិះរបស់ក្រុមការងារការដ្ឋាន រថយន្តរបស់គណៈប្រតិភូថ្នាក់ជាតិ និងអន្តរជាតិតែប៉ុណ្ណោះ ដែលអាចត្រូវអនុញ្ញាតឲ្យបើកបរតាមទ្វារខាងកើតនៃប្រាសាទតាព្រហ្ម។
លោក ឡុង កុសល អ្នកនាំពាក្យអាជ្ញាធរជាតិអប្សរា ប្រាប់សារព័ត៌មានថ្មីៗតាមទូរស័ព្ទ នៅថ្ងៃទី៣០ ខែធ្នូ យ៉ាងដូច្នេះថា៖«ការបិទច្រកចេញចូលនេះ គឺដោយសារតែមានជួសជុលប្រាង្គប្រាសាទនៅទ្វារខាងកើត។ វា ជាកិច្ចការធម្មតាសម្រាប់ការអភិរក្សប្រាសាទបុរាណ»។
អ្នកនាំពាក្យ អះអាងថា ក្រោយជួសជុលរួច អាជ្ញាធរ នឹងអនុញ្ញាតឲ្យយានយន្តបើកចូលជាធម្មតាវិញ។ តែលោក មិនអាចនិយាយបានឡើយថា ការជុសជុលនោះ នឹងរួចរាល់នៅពេលណា។
សូមបញ្ជាក់ថា កន្លងមក ក៏មានការបិទច្រកចេញចូលប្រាសាទតាព្រហ្មនៅទ្វារខាងលិចផងដែរ តែដោយសារច្រកទ្វារខាងលិចមានការជួសជុលរួច ទើបត្រូវជួសជុលច្រកទ្វារខាងកើតវិញម្ដង៕
Tag:
ប្រាសាទតាព្រហ្ម
© រក្សាសិទ្ធិដោយ thmeythmey.com
