ជាតិ
ព្រះមហាក្សត្រ
ព្រះរាជសារប្រទានព្រះរាជពរឆ្នាំថ្មីរវាងម៉ាម៉ង់ និងព្រះរាជបុត្រ
× នាទិវាបុណ្យចូលឆ្នាំថ្មី ឆ្នាំសកល២០២០នេះ ព្រះករុណា ព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី បានថ្វាយព្រះរាជសារ និងផ្កាដ៏ធំល្អស្រស់ ដល់សម្តេចព្រះវររាជមាតាជាតិខ្មែរ សម្តេចព្រះមហាក្សត្រី នរោត្តម មុនិនាថ សីហនុ។ សម្តេចព្រះវររាជមាតា ក៏បានថ្វាយព្រះរាជសារដើម្បីថ្លែងព្រះរាជអំណរព្រះគុណព្រះរាជបុត្រវិញផងដែរ។
«សូមសម្តេចព្រះវររាជមាតា ជាទីគោរពសក្ការដ៏ខ្ពង់ខ្ពស់បំផុត បានប្រកបតែនឹងព្រះបរមសុខគ្រប់ប្រការ និងព្រះពុទ្ធពរបួនប្រការ គឺអាយុ វណ្ណៈ សុខៈ ពលៈ ជានិរន្តន៍តរៀងទៅ»។ ព្រះករុណា ព្រះមហាក្សត្រ មានព្រះរាជចំណារយ៉ាងដូច្នេះ ដោយព្រះអង្គ បានថ្វាយបង្គំ បួងសួងដល់វត្ថុស័ក្តិសិទ្ធិក្នុងលោក និងបុណ្យបារមីអតីតក្សត្រ ជាពិសេសព្រះបរមរតនកោដ្ឋ ជួយបីបាច់ថែរក្សា និងប្រោះព្រំនូវទឹកអម្រឹតប្រទានដល់សម្តេចព្រះវររាជមាតា។
នៅថ្ងៃទី៣១ ខែធ្នូ ក្រោយទទួលបានព្រះរាជសារ និងផ្កាដ៏ធំពីព្រះរាជបុត្រ សម្តេចព្រះវររាជមាតា បានថ្វាយព្រះរាជសារតបទៅវិញ។ «នៅក្នុងឱកាសដ៏ល្អប្រពៃនេះ ម៉ាម៉ង់ សូមសំដែងនូវការកោតសរសើរដ៏កក់ក្តៅជាទីបំផុត ព្រះរាជបុត្រក្នុងការបំពេញភារកិច្ចដ៏ឧត្តុង្គឧត្តម ទទួលបាននូវមហាជោគជ័យក្នុងការបម្រើជាតិ មាតុភូមិ និងប្រជារាស្ត្រកម្ពុជា»។
ស្របពេលជាមួយគ្នានេះដែរ សម្តេចព្រះមហាក្សត្រី បានប្រទានពរដល់ប្រជារាស្ត្រកម្ពុជាដោយក្នុងឆ្នាំថ្មីឆ្នាំសកល ២០២០នេះ ស្គាល់តែសុខសន្តិភាព វិបុលភាព និងវឌ្ឍនាភាព ជាដរាប៕
© រក្សាសិទ្ធិដោយ thmeythmey.com