អន្តរជាតិ
យោធាអាមេរិក ហាមប្រើកម្មវិធី TikTok ព្រោះបារម្ភប៉ះពាល់សន្តិសុខជាតិ
× កងទ័ពជើងគោកអាមេរិក បានដាក់បម្រាមលើការប្រើប្រាស់កម្មវិធីទូរសព្ទដ៏ល្បីល្បាញឈ្មោះថា «TikTok» លើទូរសព្ទដៃការងារ ដោយលើកហេតុផលសន្តិសុខជាតិ។ ដូចគ្នានេះដែរ កងទ័ពជើងទឹកអាមេរិក ក៏អនុវត្តបម្រាមនេះផងដែរ។
កម្មវិធី TikTok ដែលជាកម្មសិទ្ធិរបស់ក្រុមហ៊ុនចិន ឈ្មោះថា ByteDance បានរងការឃ្លាំមើលជាខ្លាំងកាលថ្មីៗនេះ ក្នុងសហរដ្ឋអាមេរិក និងបណ្តាប្រទេសដទៃ។ ប្រាប់សារព័ត៌មានក្នុងស្រុកអាមេរិក នៅថ្ងៃ៣១ ធ្នូ ឆ្នាំ២០១៩ អ្នកនាំពាក្យកងទ័ពអាមេរិក លោកឧត្តមសេនីយ៍ Robin Ochoa បានអះអាងថា កម្មវិធីកម្សាន្តលើទូរសព្ទ «TikTok» នេះ ត្រូវបានចាត់ទុកថា «ការគំរាមកំហែងតាមអ៊ីនធឺណិត( Cyber threat)» ។
ជាមួយមុខងារដ៏ពិសេស កម្មវិធីទូរសព្ទនេះ អនុញ្ញាតឲ្យអ្នកប្រើប្រាស់ជាង៥០០លាននាក់ ថត និងបង្ហោះវីដេអូខ្លី ដែលមើលទៅគួរឲ្យចាប់អារម្មណ៍ ហើយមានអមជាមួយបទភ្លេងពិរោះៗទៀតផង។ កម្មវិធីដែលអភិវឌ្ឍដោយក្រុមហ៊ុនរបស់ចិននេះ បានទាញចំណាប់អារម្មណ៍អ្នកប្រើប្រាស់ ជាពិសេស យុវជន ដោយការបង្កើត និងចែករំលែក វីដេអូរយៈពេល ១៥ វីនាទី ក្នុងទម្រង់ដូចជា ការច្រៀងតាម និងសម្តែងកំប្លែងខ្លីៗជាដើម។ ម្យ៉ាងទៀត គណនីរបស់ TikTok ទាំងអស់ គឺសុទ្ធតែបើកចំហជាសាធារណៈ។ នេះមានន័យថា មនុស្សគ្រប់គ្នាអានទស្សនាសកម្មភាពនេះ ដោយសេរី។
ប្រាប់សារព័ត៌មាន Military.com លោកឧត្តមសេនីយ៍ Ochoa បានបញ្ជាក់ទៀតថា កងទ័ពជើងគោកអាមេរិក បានចេញបញ្ជាដល់ទាហានទាំងអស់បញ្ឈប់ការប្រើប្រាស់កម្មវិធីនេះលើទូរសព្ទដែលជាកម្មសិទ្ធិរបស់រដ្ឋាភិបាល ចាប់ពីពាក់កណ្ដាលខែធ្នូ មកម្ល៉េះ។ លោក បន្ថែមថា បម្រាមនេះ ក៏ត្រូវដាក់ដូចគ្នាលើកងទ័ពជើងទឹកផងដែរ។
យ៉ាងណាមិញ កងទ័ពជើងគោកអាមេរិក ពុំអាចបង្ការការប្រើប្រាស់កម្មវិធីកម្សាន្តនេះលើទូរសព្ទឯកជនបាននោះឡើយ ក៏ប៉ុន្តែក្រសួងការពារអាមេរិក កាលពីថ្មីៗនេះ បានដាក់ចេញគោលការណ៍ណែនាំមួយថា ទាហានទាំងអស់ គួរប្រុងប្រយ័ត្នចំពោះកម្មវិធីទូរសព្ទដែលពួកគេទាញយក។
សូមបញ្ជាក់ថា កន្លងទៅ សមាជិកសភាអាមេរិក បានបង្ហាញការព្រួយបារម្ភថា កម្មវិធិទូរសព្ទ TikTok អាចត្រូវប្រើដើម្បីប្រមូលទិន្នន័យរបស់ប្រជាជនចិន ហើយវាបង្កជាហានិភ័យដល់សន្តិសុខជាតិ ព្រោះថា វាអាចត្រូវបានបង្ខំឲ្យសហការក្នុងការប្រមែប្រមូលព័ត៌មានសម្ងាត់របស់រដ្ឋាភិបាលចិន។ តួយ៉ាង ក្នុងខែតុលា សមាជិកព្រឹទ្ធសភាអាមេរិកទាំងបក្សសាធារណរដ្ឋនិងប្រជាធិបតេយ្យ បានស្នើឲ្យបើកការស៊ើបអង្កេតមួយដោយភ្នាក់ងារសម្ងាត់អាមេរិក ដោយរកមើលថា កម្មវិធី TikTok ប៉ះពាល់ដល់សន្តិសុខជាតិអាមេរិក ឬយ៉ាងណា៕
Tag:
សហរដ្ឋអាមេរិក
TikTok
ចិន
© រក្សាសិទ្ធិដោយ thmeythmey.com