អន្តរជាតិ
បន្ទប់សណ្ឋាគារមួយនៅជប៉ុនតម្លៃជាង១ដុល្លារក្នុង១យប់ តែភ្ញៀវត្រូវគោរពលក្ខខណ្ឌ...
× ស្ថិតនៅចំកណ្តាលក្រុង Fukuoka សណ្ឋាគារ Asahi Ryokan Hotel មានបន្ទប់តម្លៃតែ១០០យ៉េន (១,២២ដុល្លារអាមេរិក) ប៉ុណ្ណោះក្នុង១យប់ ប៉ុន្តែរាល់អតិថិជនត្រូវគោរពលក្ខខណ្ឌ ដោយអនុញ្ញាតឲ្យភាគីសណ្ឋាគារថតពីសកម្មភាពរបស់ពួកគេនៅក្នុងបន្ទប់ ហើយផ្សាយផ្ទាល់នៅលើ YouTube។
មិនមែនជារឿងលេងសើចឡើយ លោក Tetsuya Inoue អាយុ២៧ឆ្នាំ ដែលជាម្ចាស់សណ្ឋាគារ Asahi Ryokan ចង់បង្កើតការច្នៃប្រឌិតដ៏ពិសេសមួយ ពោលគឺលើកទឹកចិត្តឲ្យអតិថិជនកាត់បន្ថយភាពអៀនខ្មាស។ ជាទូទៅ អតិថិជន ត្រូវចំណាយយ៉ាងណាស់៣០ដុល្លារក្នុង១យប់សម្រាប់បន្ទប់ធម្មតា ប៉ុន្តែចាប់ពីខែតុលា ឆ្នាំ២០១៩ មក លោក Inoue បានដាក់តម្លៃបន្ទប់តែជាង១ដុល្លារប៉ុណ្ណោះ ដោយពួកគេត្រូវគោរពលក្ខខណ្ឌតែមួយគត់ គឺអនុញ្ញាតឲ្យសណ្ឋាគារថតទិដ្ឋភាពស្នាក់នៅរបស់ពួកគេហើយផ្សាយផ្ទាល់លើ YouTube។
កម្មវិធី «One Dollar Hotel» នេះ មានការបំពាក់កាមេរ៉ាតាមបន្ទប់២៤ម៉ោង ប៉ុន្តែភាគីសណ្ឋាគារមិនបើកសំឡេងវីដេអូឡើយ ដោយថតផ្តិតតែរូបភាពប៉ុណ្ណោះ។ ភ្ញៀវជាច្រើននាក់ហើយដែលបានសុខចិត្តគោរពលក្ខខណ្ឌបែបនេះ។
ភ្ញៀវអាចធ្វើអ្វីបានស្រេចចិត្ត ប៉ុន្តែសណ្ឋាគារហាមប្រាមសកម្មភាពផ្លូវភេទតែមួយមុខប៉ុណ្ណោះ។ លោក Inoue បានប្រាប់ CNN ថា៖ «បច្ចុប្បន្ននេះ ក្រុមយុវជនហាក់ដូចជាមិនលាក់បាំងជីវិតឯកជនឡើយ ពួកគេជាច្រើនកាត់បន្ថយភាពអៀនខ្មាស ដោយមិនភ័យខ្លាចការថតផ្សាយនោះទេ»។
លោក Inoue បានបញ្ជាក់ផងដែរថា ការផ្សាយនៅលើ YouTube ក៏បានឲ្យសណ្ឋាគាររបស់លោក ទទួលបានប្រាក់កម្រៃខ្លះដែរ តែមិនច្រើននោះឡើយ៕
© រក្សាសិទ្ធិដោយ thmeythmey.com