គ្រោះទឹកជំនន់នៅឥណ្ឌូណេស៊ី បង្កឲ្យមនុស្សស្លាប់កើនដល់ ២១នាក់

អន្តរជាតិ

គ្រោះទឹកជំនន់នៅឥណ្ឌូណេស៊ី បង្កឲ្យមនុស្សស្លាប់កើនដល់ ២១នាក់

02, Jan 2020 , 2:16 pm

រូបភាព

ក្រុមអ្នកជួយសង្រ្គោះ កំពុងជម្លៀសប្រជាជនចេញពីតំបន់ទឹកជំនន់។ រូបភាព៖ Reuters

ដោយ: ធៀន ភារិន្ទ

ចំនួនមនុស្សស្លាប់ក្នុងគ្រោះទឹកជំនន់នៅក្នុងទីក្រុងហ្សាការតា ឥណ្ឌូណេស៊ី បានកើនឡើងរហូតដល់ ២១នាក់។ ជនរងគ្រោះទាំងនេះ បានបាត់បង់ជីវិតដោយសារតែ ភ្លើងឆក់ លង់ទឹក និងបាត់បង់កម្តៅក្នុងខ្លួន។ នេះបើតាមការអះអាងរបស់អ្នកនាំពាក្យក្រសួងកិច្ចការសង្គម Joko Hariyanto នៅថ្ងៃទី២ ខែមករា។

ភ្លៀងមួយមេធំ ធ្លាក់ជាច្រើនម៉ោងនាថ្ងៃទី៣១ ខែធ្នូ រហូតចូលដល់ថ្ងៃទី១ មករា ឆ្នាំ២០២០។ ការណ៍នេះបានបង្កឲ្យទឹកជន់លិចតំបន់ជុំវិញក្រុងហ្សាការតា និងតំបន់ក្បែរនោះ។ អគ្គលេខាធិការនៃគណៈរដ្ឋមន្ត្រីឥណ្ឌូណេស៊ី បានអះអាងថា អាកាសធាតុដ៏អាក្រក់បែបនេះ នឹងបន្តវាយប្រហារឥណ្ឌូណេស៊ី រហូតដល់ថ្ងៃទី៧ ខែមករាឯណោះ។

ទាក់ទងទៅនឹងបញ្ហានេះ ប្រជាជនឥណ្ឌូណេស៊ីច្រើនជាង ៣ម៉ឺននាក់ត្រូវបានគេជម្លៀសចេញពីតំបន់ទឹកជំនន់ ខណៈពេលខ្សែរថភ្លើង និងអគ្គិសនី ត្រូវគេបិទមួយរយៈ។ បើតាមការអះអាងរបស់អ្នកនាំពាក្យក្រសួងកិច្ចការសង្គម លោកJoko Hariyanto គ្រោះទឹកជំនន់នេះ បានបង្កឲ្យមនុស្សស្លាប់កើនឡើងរហូតដល់ ២១នាក់។ ភាគច្រើននៃអ្នកទាំងនោះ បានបាត់បង់ជីវិតដោយសារតែ ភ្លើងឆក់ លង់ទឹក និងបាត់បង់កម្តៅក្នុងខ្លួន។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។

សូមបញ្ជាក់ថាឥណ្ឌូណេស៊ី គឺជាទីក្រុង ដែលមានមនុស្សរស់នៅរហូតដល់ជាង ៣០លាននាក់។ កាលពីឆ្នាំ ២០០៧ ទឹកជំនន់បានវាយប្រហារទីក្រុងនេះម្តងហើយ ដែលបានបង្កឲ្យមានមនុស្សស្លាប់រហូតដល់ ៥០នាក់ឯណោះ។ ៥ឆ្នាំក្រោយមក ត្រូវជាឆ្នាំ ២០១២ ទីក្រុងហ្សាការតា ឥណ្ឌូណេស៊ី បានរងគ្រោះទឹកជំនន់ម្តងទៀត ដោយសារតែទឹកព្រែកកើនឡើង៕