អន្តរជាតិ
នាយករដ្ឋមន្ត្រីអ៊ីស្រាអែល ស្នើសុំអភ័យឯកសិទ្ធិពីសភាក្នុងសំណុំរឿងពុករលួយ
លោកនាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ (AFP)
×![]()
នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានសម្រេចចិត្តស្នើសុំអភ័យឯកសិទ្ធិពីសភា ដើម្បីរួចផុតការកាត់ទោសជុំវិញសំណុំរឿងពុករលួយ ។ ទង្វើនេះ ទំនងជានឹងពន្យារពេលការបើកសវានាការកាត់ទោសជាច្រើនខែ ខណៈសមាជិកសភាអ៊ីស្រាអែល ពុំទាន់គិតគូរបោះឆ្នោតលើរឿងនេះ រហូតដល់ការបោះឆ្នោតថ្ងៃ ២ មីនា ឆ្នាំ២០២០។
«ខ្ញុំ មានបំណងដាក់សំណើទៅដល់ប្រធានសភាអ៊ីស្រាអែល»។ លោកនាយករដ្ឋមន្ត្រី បេនចាមីន ណេតាន់យ៉ាហ៊ូ ប្រាប់អ្នកសារព័ត៌មាន នៅថ្ងៃពុធ ១ មករា បែបនេះ ក្នុងទីក្រុងហ្ស៊េរុយសាឡិម។ ការសម្រេចចិត្តនេះ ធ្វើឡើងប៉ុន្មានម៉ោងប៉ុណ្ណោះ មុនឱសានវាទសម្រាប់ការដាក់សំណើនេះ ផុតកំណត់។
មេដឹកនាំដែលកាន់តំណែងយូរជាងគេរបស់អ៊ីស្រាអែលនេះ សង្កត់ធ្ងន់ថា៖ «ការស្នើសុំអភ័យឯកសិទ្ធិនេះ នឹងធ្វើឡើងដោយស្របតាមច្បាប់ ព្រមទាំងគោលដៅនៃការបន្តបម្រើអ្នក (ពលរដ្ឋអ៊ីស្រាអែល) និងសម្រាប់អនាគតអ៊ីស្រាអែល»។
លោក ណេតាន់យ៉ាហ៊ូ ត្រូវបានអគ្គរដ្ឋអាជ្ញាចោទប្រកាន់ក្នុងខែវិច្ឆិកា លើបទល្មើសដាច់ដោយឡែកពីគ្នា ដូចជា ទទួលសំណូក កេងបន្លំ និងរំលោភទំនុកចិត្ត ។ យ៉ាងណាមិញ នាយករដ្ឋមន្ត្រីអ៊ីស្រាអែលទី១ ដែលរងការចោទប្រកាន់ខណៈកំពុងកាន់តំណែងមួយនេះ បានបដិសេធរាល់ការចោទប្រកាន់ទាំងអស់ប្រឆាំងលោក។ លោក ណាតាន់យ៉ាហ៊ូ នឹងត្រូវការគាំទ្រជាងពាក់កណ្ដាលនៃសមាជិកសភា ដើម្បីអាចទទួលបានអភ័យឯកសិទ្ធិ។
សវនាការពុំអាចចាប់ផ្តើមបាននោះឡើយ កាលណាសំណើសុំអភ័យឯកសិទ្ធិត្រូវបានធ្វើឡើង ហើយសភាអ៊ីស្រាអែល ដែលត្រូវបានរំលាយចោលនៅមុនការបោះឆ្នោត ទំនងជាមិនទាន់សម្រេចលើសំណើនេះឡើយ នៅមុនពេលនោះ។ ក្រោមច្បាប់អ៊ីស្រាអែល សមាជិកសភា ពុំទទួលអភ័យឯកសិទ្ធិដោយស្វ័យប្រវត្តិរួចផុតពីការកាត់ទោសឡើយ ក៏ប៉ុន្តែពួកគេអាចដាក់សំណើសុំនៅពេលចាំបាច់។ ម្យ៉ាងវិញទៀត ទោះបីរកឃើញថាមានទោសក្តី នាយករដ្ឋមន្ត្រីអ៊ីស្រាអែល គ្រាន់តែចុះចេញពីតំណែងកំពូលនេះប៉ុណ្ណោះ។
ទាក់ទិននឹងការប្រកាសនេះ គូប្រជែងនយោបាយដ៏សំខាន់របស់លោក នាយករដ្ឋមន្ត្រី ណេតាន់យ៉ាហ៊ូ គឺ លោក Benny Gantz បានបញ្ចេញប្រតិកម្មទាំងកំហឹង ហើយបានប្តេជ្ញាថា បក្សរបស់លោក នឹងធ្វើអ្វីគ្រប់បែបយ៉ាងដើម្បីបង្ការការផ្តល់អភ័យឯកសិទ្ធិនេះ។ ត្រង់នេះ លោក លើកឡើងបែបនេះ លោក ពុំធ្លាប់គិតទេថា ថ្ងៃណាមួយ នាយករដ្ឋមន្ត្រីអ៊ីស្រាអែល នឹងគេចវេសពីការប្រឈមមុខនឹងប្រព័ន្ធយុត្តិធម៌ និងច្បាប់របស់ប្រទេស៕
Tag:
អ៊ីស្រាអែល
បេនចាមីន ណេតាន់យ៉ាហ៊ូ
អំពើពុករលួយ
© រក្សាសិទ្ធិដោយ thmeythmey.com
