រដ្ឋសភាអាមេរិក នឹងបោះឆ្នោតសេចក្តីសម្រេចកំណត់អំណាចធ្វើសង្គ្រាមលោក ត្រាំ

អន្តរជាតិ

រដ្ឋសភាអាមេរិក នឹងបោះឆ្នោតសេចក្តីសម្រេចកំណត់អំណាចធ្វើសង្គ្រាមលោក ត្រាំ

06, Jan 2020 , 10:19 pm

រូបភាព

លោកស្រី ណានស៊ី ផេឡូស៊ី ប្រធានសភាតំណាងអាមេរិក (AFP)

ដោយ:

សភាតំណាងរបស់អាមេរិក នឹងបោះឆ្នោតលើសេចក្តីសម្រេចអំណាចសង្គ្រាមមួយក្នុងសប្តាហ៍នេះក្នុងគោលដៅកំណត់សកម្មភាពយោធារបស់លោកប្រធានាធិបតី ដូណាល់ ត្រាំ នៅចំពោះមុខកំណើនភាពតានតឹងជាមួយអ៊ីរ៉ង់។ នេះបើតាមការបញ្ជាក់របស់លោកស្រី ណាន់ស៊ី ផេឡូស៊ី ប្រធានសភាតំណាងអាមេរិក នៅថ្ងៃអាទិត្យ ទី៥ ខែមករា ។

ក្នុងលិខិតមួយផ្ញើទៅកាន់សមាជិកសភាបក្សប្រជាធិបតេយ្យ លោកស្រី ផេឡូស៊ី បញ្ជាក់ថា សេចក្តីសម្រេចនេះ អះអាងជាថ្មីនូវទំនួលខុសត្រូវលើការត្រួតពិនិត្យដែលបានបង្កើតឡើងជាយូរមកហើយ។ លោកស្រីសង្កត់ធ្ងន់ថា ប្រសិនបើគ្មានការអនុញ្ញាតណាមួយពីរដ្ឋសភាអាមេរិកទេនោះ អរិភាពផ្នែកយោធាររបស់រដ្ឋបាលលោក ត្រាំ ពាក់ព័ន្ធរឿងអ៊ីរ៉ង់ នឹងបញ្ចប់ក្នុងរយៈពេល ៣០ ថ្ងៃ ។

តាមការចុះផ្សាយរបស់ទីភ្នាក់ងារព័ត៌មាន Reuters លោកស្រីប្រធាន បញ្ជាក់ទៀតថា សេចក្តីសម្រេចនេះ គឺស្រដៀងនឹងសេចក្តីសម្រេចមួយដែលដាក់ចេញដោយសមាជិកព្រឹទ្ធសភាអាមេរិក Tim Kaine ក្នុងព្រឹទ្ធសភា។

កាលពីថ្ងៃសុក្រ ៣ មករា សមាជិកព្រឹទ្ធសភាមកពីបក្សប្រជាធិបតេយ្យ Tim Kaine បានដាក់ចេញសេចក្តីសម្រេចមួយ ដើម្បីបង្កើតការតស៊ូមតិ និងបោះឆ្នោត ក្នុងរដ្ឋសភា ជាមួយគោលដៅបង្ការការរីករាលដាលនៃភាពតានតឹងខ្លាំងបន្ថែមទៀតជាមួយអ៊ីរ៉ង់។

ខណៈសេចក្តីសម្រេចនេះអាចឈ្នះការអនុម័តក្នុងសភាតំណាងអាមេរិកដែលគ្រប់គ្រងដោយសមាជិកបក្សប្រជាធិបតេយ្យ វាសនារបស់វាក្នុងព្រឹទ្ធសភាដែលកាន់កាប់ដោយសមាជិកបក្សសាធារណរដ្ឋ ពុំមានភាពច្បាស់ប្រជាឡើយ។

សមាជិកបក្សប្រជាធិបតេយ្យអាមេរិក បានរិះគន់ថា លោកប្រធានធិបតី ដូណាល់ ត្រាំ ពុំបានផ្តល់ដំណឹងដល់រដ្ឋសភា ឬស្នើសុំការអនុម័តជាមុនសិន មុនពេលបើកប្រតិបត្តិការវាយប្រហារតាមដែនអាកាសលើព្រលានយន្តហោះក្រុង បាកដាដ ដែលបានសម្លាប់មេបញ្ជាការជាន់ខ្ពស់របស់អ៊ីរ៉ង់ ឧត្តមសេនីយ៍ Qasem Soleimani ។

ការស្លាប់របស់បងធំទីពីរ បន្ទាប់ពីប្រមុខដឹកនាំកំពូលអ៊ីរ៉ង់ Ali Khamenei នេះ បានបង្កឲ្យទំនាក់ទំនងរវាងក្រុងវ៉ាស៊ីនតោន និងតេហេរ៉ង់ ដែលតានតឹងស្រាប់ ធ្លាក់ចូលក្នុងស្ថានការណ៍អាក្រក់ខ្លាំងថែមទៀត ហើយក៏បញ្ឆេះកង្វល់ពាក់ព័ន្ធនឹងសង្គ្រាមក្នុងតំបន់មជ្ឈិមបូព៌ាផងដែរ។

ទន្ទឹមនេះ សភាអ៊ីរ៉ាក់ កាលពីថ្ងៃអាទិត្យ បានអនុម័តសេចក្តីសម្រេចមួយដោយទាមទារឲ្យបណ្ដេញកងទ័ពបរទេស ដែលក្នុងនោះ មានទ័ពអាមេរិកប្រមាណ ៥២០០ នាក់ ពីទឹកដីអ៊ីរ៉ាក់។ ជាការឆ្លើយតប លោក ត្រាំ បានគំរាមដាក់ទណ្ឌកម្មសេដ្ឋកិច្ចលើប្រទេសមជ្ឈិមបូព៌ាមួយនេះ៕