ទីក្រុងហ្សាការតា នឹងហាមឃាត់ការប្រើប្រាស់ថង់ប្លាស្ទិកក្នុងពេលឆាប់ៗខាងមុខ

អន្តរជាតិ

ទីក្រុងហ្សាការតា នឹងហាមឃាត់ការប្រើប្រាស់ថង់ប្លាស្ទិកក្នុងពេលឆាប់ៗខាងមុខ

08, Jan 2020 , 8:29 am

រូបភាព

ថង់ប្លាស្ទិក ដែលត្រូវបានគេដាក់នៅតាមហាងលក់ទំនិញ។ រូបភាព៖ Shutterstock

ដោយ: ធៀន ភារិន្ទ

រដ្ឋធានីហ្សាការតា នឹងត្រូវដាក់បំរាមឲ្យប្រជាជនរបស់ខ្លួនឈប់ប្រើប្រាស់ថង់ប្លាស្ទិកក្នុងរយៈពេល ៦ខែទៀត។ បំរាមនេះ នឹងអនុវត្តទៅតាមហាងលក់ទំនិញ ផ្សារទំនើប និងផ្សារធម្មតា។ ការអនុវត្តរបស់ឥណ្ឌូណេស៊ីក្នុងពេលនេះ គឺធ្វើឡើងស្របពេលប្រទេសមួយចំនួនក្នុងតំបន់ ចាប់ផ្តើមហាមឃាត់ប្រជាជនរបស់ខ្លួនក្នុងការប្រើប្រាស់ថង់ប្លាស្ទិក។

ចាប់តាំងពីឆ្នាំ២០២០មក រដ្ឋាភិបាលប្រទេសនីមួយៗនៅក្នុងតំបន់អាស៊ី ចាប់ផ្តើមដាក់វិធានការហាមឃាត់ការប្រើប្រាស់ថង់ប្លាស្ទិកនៅក្នុងប្រទេសក្នុងនោះរួមមានថៃ និងបង់ក្លាដែសជាដើម។ បំរាមនេះ គឺធ្វើឡើងដើម្បីទប់ស្កាត់ការប្រើប្រាស់ថង់ប្លាស្ទិកហួសប្រមាណ និងប្រឆាំងនឹងសកម្មភាពចាក់សំរាមចូលទៅក្នុងសមុទ្រ។

ដើម្បីចូលរួមក្នុងយុទ្ធនាការកាត់បន្ថយការប្រើប្រាស់ថង់ប្លាស្ទិកតែមួយលើកហើយបោះចោល អភិបាលក្រុងហ្សាការតា បានចុះហត្ថលេខាលើលិខិតបទដ្ឋានគតិយុទ្ធមួយ( gubernatorial decree) ដែលតម្រូវឲ្យប្រជាជននៅក្នុងទីក្រុងទាំងអស់ចូលរួមកាត់បន្ថយថង់ប្លាស្ទិក តាមរយៈការប្រើប្រាស់ថង់ ដែលមិនប៉ះពាល់ដល់បរិស្ថាន(Eco-friendly)។ ប៉ុន្តែយ៉ាងណា ក៏មានករណីលើកលែងផងដែរ។ ក្នុងនោះហាង អាចប្រើថង់ប្លាសិ្ទក ដើម្បីដាក់អាហារ ដែលមិនបានវិចខ្ចប់មកស្រាប់។

តាមរយៈច្បាប់មួយនេះ គឺតម្រូវឲ្យអនុវត្តទៅលើហាងទំនិញធំ ផ្សារទំនើប និងផ្សារមានលក្ខណៈបុរាណ។ប្រសិនបើម្ចាស់ហាងលក់ទំនិញ និងអ្នកលក់ បំពានលើច្បាប់មួយនេះ អ្នកទាំងនោះត្រូវទទួលលិខិតព្រមាន និងពិន័យជាប្រាក់ជាដើម។ ក្នុងករណីធ្ងន់ធ្ងរ ហាងលក់ទំនិញទាំងនោះ ត្រូវផ្អាកការលក់បណ្តោះអាសន្ន ឬបិទតែម្តង។ ផ្ទុយមកវិញចំពោះអ្នកគោរពបានត្រឹមត្រូវ ម្ចាស់ហាងនឹងទទួលបានការលើកទឹកចិត្ត ក្នុងទម្រង់ការលើកលែងពន្ធ ឬការបង្វិលលុយពន្ធត្រលប់មកវិញ។ នេះបើតាមការចុះផ្សាយរបស់ទូរទស្សន៍ Channel News Asia។

លិខិតបទដ្ឋានគតិយុទ្ធខាងលើ ត្រូវបានចុះហត្ថលេខាតាំងពីថ្ងៃទី២៧ ខែធ្នូ ឆ្នាំ២០១៩មកម្លេះ ហើយវានឹងចូលជាធរមានក្នុងរយៈពេល ៦ខែទៀត។ ជាការពិត រដ្ឋាភិបាលឥណ្ឌូណេស៊ី មានបំណងយកពន្ធលើថង់ប្លាស្ទិកដែរ ប៉ុន្តែគម្រោងនេះ ត្រូវបានរដ្ឋសភា ពន្យារទៅពេលក្រោយ ព្រោះបញ្ហានេះ ត្រូវការពេលច្រើនដើម្បីពិភាក្សា។

សូមបញ្ជាក់ថា ឥណ្ឌូណេស៊ី គឺជាប្រទេសដែលបានចាក់សំរាមប្លាស្ទិកចូលទៅក្នុងសមុទ្រលំដាប់ទីពីរលើពិភពលោក។ ពោលគឺមានថង់ប្លាស្ទិកចំនួន ៩,៨៥ពាន់លានថង់ ដែលឥណ្ឌូណេស៊ីបានបោះចូលទៅក្នុងសមុទ្រជារៀងរាល់ឆ្នាំ។ នេះបើតាមការអះអាងរបស់រដ្ឋមន្ត្រីហិរញ្ញវត្ថុឥណ្ឌូណេស៊ី Sri Mulyani Indrawati នាខែកក្កដា ឆ្នាំ២០១៩៕