ជាតិ
ក្រុងខេមរភូមិន្ទ ជួបបញ្ហាខ្វះទឹកស្អាតប្រើប្រាស់ ដោយប្រភពទឹកនៅសល់តិចតួច
× ភ្នំពេញ៖ បញ្ហាខ្វះខាតទឹកស្អាតប្រើប្រាស់មួយរយៈកន្លងទៅនេះ គឺដោយសារតែក្រុមហ៊ុនផ្គត់ផ្គង់ទឹកស្អាត LYP GROUP ក្នុងក្រុងខេមរភូមិន្ទ ខេត្តកោះកុង កំពុងមានបញ្ហាប្រឈម ហើយខាងក្រុមហ៊ុននឹងកំពុងតម្លើងម៉ូទ័របូមទឹកនៅស្រះទឹក រដ្ឋាករទឹកចាស់។ នេះបើតាមសេចក្ដីជូនដំណឹងរបស់មន្ទីរឧស្សាហកម្ម និងសិប្បកម្មខេត្តកោះកុង កាលពីថ្ងៃទី១០ ខែមករា។
ក្រុមហ៊ុនផ្គត់ផ្គង់ទឹកស្អាត LYP GROUP កំពុងមានបញ្ហាប្រឈមមួយចំនួនដូចជា ប្រភពទឹកនៅទំនប់ជ្រោះតាប៉ននៅសល់តិចតួច មិនអាចបូមយកយកមកផលិតបាន។ មួយវិញទៀត ប្រភពទឹកនៅស្រះភូមិចាំយាមមានចំនួនប្រមាណ ៨០ម៉ឺនម៉ែត្រគូប ហើយទំហំប្រព័ន្ធទុយោមេមានទំហំតូច ធ្វើឲ្យសម្ពាធទឹកខ្សោយ។
រូបភាពពីមន្ទីរឧស្សាហកម្មនិងសិប្បកម្មខេត្តកោះកុង
លើសពីនេះទៅទៀតក្រុមហ៊ុនផ្គត់ផ្គង់ទឹកស្អាត LYP GROUP បានបូមទឹកពីស្រះភូមិចាំយាមយកមកផលិតជំនួសវិញ ប៉ុន្តែកម្លាំងបូមទឹកក្នុងមួយម៉ោងអាចបូមបានត្រឹមប្រមាណ២០០ម៉ែត្រគូប ចំណែកឯការប្រើប្រាស់ទឹកស្អាតរបស់ពលរដ្ឋ ក្នុងមួយម៉ោងចន្លោះពី ៤០០ម៉ែត្រគូប ទៅ៥០០ម៉ែត្រគូប។
សម្រាប់ការតម្លើងម៉ូទ័របូមទឹកនៅស្រះទឹក ក្រុមហ៊ុនត្រូវប្រើរយៈពេលប្រមាណជា ២ថ្ងៃទៀតទើបអាចដំណើរការបូមទឹកបាន៕
Tag:
មន្ទីរឧស្សាហកម្ម
បញ្ហាខ្វះទឹកស្អាត
កោះកុង
© រក្សាសិទ្ធិដោយ thmeythmey.com