លោក កឹម សុខា សុំឲ្យអង្គសវនាការ ចាក់វីដេអូលោកនិយាយទាំងស្រុង ដែលមានរយៈពេលជាងមួយម៉ោង

ជាតិ

នយោបាយជាតិ

លោក កឹម សុខា សុំឲ្យអង្គសវនាការ ចាក់វីដេអូលោកនិយាយទាំងស្រុង ដែលមានរយៈពេលជាងមួយម៉ោង

15, Jan 2020 , 4:20 pm

រូបភាព

លោក កឹម សុខា ស្ថិតក្នុងរថយន្ត ពេលចេញពីសនាការនៃសាលាដំបូងរាជធានីភ្នំពេញ

ដោយ: ថ្មីៗ

ក្នុងសវនាការលើកដំបូង នាព្រឹកថ្ងៃទី១៥ ខែមករា ឆ្នាំ២០២០ ចៅក្រម និង លោក កឹម សុខា ប្រធានអតីតគណបក្សប្រឆាំង មានភស្តុតាងរៀងខ្លួន ដោយចៅក្រម ប្រើភស្តុតាង ដើម្បីដាក់បន្ទុក ហើយលោក កឹម សុខា ប្រើភស្តុតាង ដើម្បីដោះបន្ទុក។

ទាំងចៅក្រម ទាំងលោក កឹម សុខា មានភស្តុងដូចគ្នា គឺវីដេអូឃ្លីប ដែលលោក កឹម សុខា ថ្លែងក្នុងពិធីជួបសំណេះសំណាលជាមួយអ្នកគាំទ្រនៅប្រទេសអូស្ត្រាលី កាលពីឆ្នាំ២០១៣ ដោយគ្រាន់តែវីដេអូឃ្លីបនៅក្នុងដៃចៅក្រម មានរយៈពេលជាងពីរនាទីប៉ុណ្ណោះ តែវីដេអូឃ្លីបនៅក្នុងដៃលោក កឹម សុខា មានរយៈពេលជាងមួយម៉ោងឯណោះ ដោយអះអាងថា ជាវីដេអូឃ្លីបទាំងស្រុង។

ក្រោយចាកចេញពីសវនាការ លោក ចាន់ ចេន មេធាវីម្នាក់របស់លោក កឹម សុខា ប្រាប់អ្នកកាសែតថា លោក កឹម សុខា ស្នើឲ្យចៅក្រម យកវីដេអូឃ្លីបទាំងស្រុងនោះ ទៅចាក់ក្នុងសវនាការ។ បើតាមលោកមេធាវី លោក កឹម សុខា ប្រាប់ចៅក្រមថា វីដេអូឃ្លីបរបស់លោក ត្រូវសមត្ថកិច្ច យកទៅកាន់តជាកង់ៗ ហើយផ្គុំបញ្ចូលគ្នា។

លោកមេធាវី ថ្លែងដូច្នេះថា៖«ចង់បង្ហាញថា វីដេអូរបស់ឯកឧត្តម កឹម សុខា ដែលជាភស្តុតាងដោះបន្ទុកហ្នឹង មិនមែនខ្លី ដែលមានលក្ខណៈកាត់តកង់ៗ ដូចខាងសមត្ថកិច្ច យកមកដាក់បន្ទុកលើកូនក្តីរបស់យើងទេ»។ លោក បន្តថា ចៅក្រម បានទទួលយកសំណើរបស់លោក កឹម សុខា តែវីដេអូឃ្លីបជាងមួយម៉ោងនោះ មិនទាន់យកទៅចាកក្នុងសវនាការ នៅថ្ងៃនេះឬថ្ងៃស្អែកទេ គឺនៅសប្តាហ៍ក្រោយ។

នៅថ្ងៃទី១៥ ខែមករានេះ តុលាការ ចាប់ផ្តើមដំណើរការសវនាការលើលោក កឹម សុខា ហើយនឹងបន្តនៅថ្ងៃស្អែកទៀត។ ក្នុងមួយសប្តាហ៍ តុលាការ បើកសវនាការលើលោក កឹម សុខា ពីរថ្ងៃ គឺនៅថ្ងៃពុធនិងថ្ងៃព្រហស្បតិ៍។ តុលាការ គ្រោងប្រើពេល៣ខែ ក្នុងការបើកសវនាការនេះ។

នៅចំពោះមុខអ្នកកាសែត លោកមេធាវី ចាន់ ចេន យល់ថា សំណុំរឿងរបស់លោក កឹម សុខា គួរតែដោះស្រាយតាមផ្លូវនយោបាយ ព្រោះសំណុំរឿងនេះ ពាក់ព័ន្ធនឹងនយោបាយ។ លោក ចង់ឲ្យអ្នកនយោបាយជជែកគ្នា ជាជាងការប្រើយន្តការច្បាប់។

លោក គី តិច មេធាវីតំណាងឲ្យរដ្ឋាភិបាល ដែលធ្វើជាដើមបណ្តឹង ក្នុងសវនាការនេះ អះអាងថា សំណុំរឿងរបស់លោក កឹម សុខា ពាក់ព័ន្ធជាមួយសហភាពអឺរ៉ុប និងប្រទេស៨ទៀត រួមមាន ឥណ្ឌូណេស៊ី យូហ្គោស្លាវី ស៊ែប៊ី អូស្ត្រាលី អាមេរិក កាណាដា តៃវ៉ាន់ និង ឥណ្ឌា។ លោក បន្តថា អង្គការអន្តរជាតិ និង បុគ្គលជាជនបរទេសមួយចំនួន ក៏ជាប់ពាក់ពន្ធដែរ។ តែលោក មិនបានបញ្ជាក់ឡើយ ថា តុលាការ នឹងហៅតំណាងប្រទេស អង្គការ និង បុគ្គលនោះ ទៅបំភ្លឺឬយ៉ាងណា។

ក្នុងវីដេអូឃ្លីបខ្លីរយៈពេលជាងពីរនាទីនោះ លោក កឹម សុខា និយាយថា ចាប់តាំងពីឆ្នាំ១៩៩៣មក រដ្ឋាភិបាលអាមេរិក តែងហៅលោកទៅជួបម្តងក្នុងមួយឆ្នាំ ដើម្បីជជែកពីដំណើរការប្រជាធិបតេយ្យនៅកម្ពុជា។ លោក បន្ថែមថា រដ្ឋាភិបាលអាមេរិក ឲ្យលោក យកគំរូតាមយូហ្គោស្លាវី និង ស៊ែប៊ី ក្នុងការផ្លាស់ប្តូរមេដឹកនាំ។

លើសពីនេះ លោក ថែមទាំងអះអាងថា រដ្ឋាភិបាលអាមេរិក បានជួលអ្នកជំនាញនិងសាស្ត្រាចារ្យនៅអាមេរិកនិងនៅកាណាដា ឲ្យជួយផ្តល់យោបល់ជូនលោក ពីយុទ្ធសាស្ត្រនៃការផ្លាស់ប្តូរមេដឹកនាំកម្ពុជា។ លោក បញ្ជាក់ក្នុងវីដែអូខ្លីបដូច្នេះថា៖«ខ្ញុំ ធ្វើតាមក្បួន មានយុទ្ធសាស្ត្រប៉ុណ្ណឹងហើយ បើមិនជោគជ័យទៀត ខ្ញុំ មិនដឹងថាយ៉ាងម៉េចទេ»៕