លោក វង្ស ពិសេន មេទ័ពខ្មែរដំបូងដែលទៅទស្សនកិច្ចនៅមីយ៉ាន់ម៉ាក្នុងប្រវត្តិសាស្ត្រ៦៥ឆ្នាំ

ជាតិ

លោក វង្ស ពិសេន មេទ័ពខ្មែរដំបូងដែលទៅទស្សនកិច្ចនៅមីយ៉ាន់ម៉ាក្នុងប្រវត្តិសាស្ត្រ៦៥ឆ្នាំ

16, Jan 2020 , 2:57 pm

រូបភាព

លោក វង្ស ពិសេន នាជំនួបជាមួយលោកស្រី អោង សាន ស៊ូជី នៅក្រុងណៃពិដោរ។ រូបថត ក្រសួងការពារជាតិ

ដោយ: អ៊ូ សុខមាន (OU Sokmean)

ភ្នំពេញ៖ លោក វង្ស ពិសេន មេបញ្ជាការនៃកងយោធពលខេមរភូមិន្ទ បានទៅទស្សនកិច្ច ក្រុងណៃពិដោរ ប្រទេសមីយ៉ាន់ម៉ា កាលពីថ្ងៃទី១៤មករា ឆ្នាំ២០២០។ ទស្សនកិច្ចបានធ្វើឡើង ក្នុងគោលបំណងពង្រីកកិច្ចសហប្រតិបត្តិការក្នុងវិស័យកងទ័ពនៃទំនាក់ទំនងការទូតប្រទេសទាំងពីរឲ្យកាន់តែរឹងមាំ។ បើតាមក្រសួងការពារជាតិ នេះជាប្រវត្តិសាស្ត្រលើកដំបូងក្នុងរយៈកាល៦៥ឆ្នាំ ដែលអគ្គមេបញ្ជាការនៃកងយោធពលខេមរភូមិន្ទ ទៅកាន់ប្រទេសមីយ៉ានម៉ា។

ក្នុងដំណើរទស្សនកិច្ចដើម្បីរំលឹកដល់អនុស្សាវរីយ៍៦៥ឆ្នាំនៃចំណងការទូតរវាងប្រទេសទាំងពីរ លោក វង្ស ពិសេន បានជួបជាមួយលោក Min Aung Hlaing អគ្គមេបញ្ជាការនៃកងកម្លាំងការពារជាតិមីយ៉ាន់ម៉ា នៅទីក្រុងណៃពិដោរ ដើម្បីពង្រីកទំនាក់ទំនងកិច្ចសហប្រតិបត្តិការល្អជាមួយគ្នា លើការផ្លាស់ប្តូរព័ត៌មានការងារសន្តិសុខ។ ក្នុងនោះមាន ភាគរីទាំងពីរ បានលើកឡើងពីការរួមគ្នាបង្ក្រាបបទល្មើសឆ្លងដែន ភេរវកម្ម ការជួញដូរមនុស្ស ការជួញដូរគ្រឿងញៀន ការជួញដូរអាវុធ និងបន្តបន្ថែមការបណ្តុះបណ្តាលធនធានមនុស្ស។

ក្រៅពីជួបជាមួយអគ្គមេបញ្ជាការនៃកងកម្លាំងការពារជាតិមីយ៉ាន់ម៉ា មេទ័ពកម្ពុជាបានបន្តចូលជួប និងសម្តែងការគួរសមជាមួយ លោកស្រី អោង សាន ស៊ូជី ជាទីប្រឹក្សារដ្ឋ និងជារដ្ឋមន្ត្រីការបរទេស នៃប្រទេសមីយ៉ាន់ម៉ា ផងដែរ។

សម្រាប់ជំនួបនោះដែរ លោកស្រី អោង សាន ស៊ូជី បានអះអាងពីវត្តមានរបស់លោកស្រី នាកិច្ចប្រជុំកំពូលអាស៊ី-អឺរ៉ុប ដែលកម្ពុជាត្រូវធ្វើជាម្ចាស់ផ្ទះនៅចុងឆ្នាំ២០២០ នេះ៕