អន្តរជាតិ
កូរ៉េខាងជើង ផ្លាស់ប្ដូរតំណែងរដ្ឋមន្ត្រីការបរទេស លោក រី យ៉ុងហូ នាដំណើរទស្សនកិច្ចនៅចិននាពេលកន្លងមក។ រូបភាព AFP
× កូរ៉េខាងជើង បានផ្លាស់ប្ដូរប្រមុខការទូតរបស់ខ្លួន ដោយតែងតាំងមន្ត្រីទទួលបន្ទុកកិច្ចការអន្តរកូរ៉េជំនួសវិញ។ លោក រី ស៊ុនគ័ន (Ri Son-gwon) ត្រូវបានរាយការណ៍ថា ចូលកាន់តំណែងរដ្ឋមន្ត្រីការបរទេសថ្មី ជំនួសលោក រី យ៉ុងហូ (Ri Yong-ho) អំឡុងពេលជំនួបបក្សកាលពីចុងឆ្នាំ២០១៩ ។ នេះបើតាមការផ្សាយរបស់ទីភ្នាក់ងារព័ត៌មាន Yonhap នៅថ្ងៃទី១៩ ខែមករា។ ការដោះដូរប្រមុខការទូតបែបនេះ អាចជាសញ្ញានៃការផ្លាស់ប្ដូរគោលនយោបាយរបស់កូរ៉េខាងជើង។
ដោយស្រង់ព័ត៌មានពីប្រភពរបស់ខ្លួន ទីភ្នាក់ងារព័ត៌មានកូរ៉េខាងត្បូង Yonhap ផ្សាយថា កូរ៉េខាងជើង បានជូនដំណឹងដល់បេសកកម្មទូតប្រចាំព្យុងយ៉ាងពីការតែងតាំងលោក រី ស៊ុនគ័ន ជារដ្ឋមន្ត្រីការបរទេសថ្មីជំនួសលោក រី យ៉ុងហូ ។ ការជូនដំណឹងនេះ ធ្វើឡើងកាលពីសប្ដាហ៍មុន ហើយការប្រកាសផ្លូវការអាចធ្វើនៅសប្ដាហ៍ក្រោយ។
លោក រី ស៊ុនគ័ន ជាអតីតមន្ត្រីកងទ័ពម្នាក់ មុនត្រូវបានតែងតាំងជាប្រធានគណៈកម្មាធិការការបង្រួបបង្រួមដោយសន្តិភាព ដែលជាស្ថាប័នទទួលបន្ទុកកិច្ចការជាមួយកូរ៉េខាងត្បូង និងជាមន្ត្រីម្នាក់ដែលធ្វើការជាមួយកូរ៉េខាងត្បូងញឹកញាប់ផងដែរ។ លោក រី នេះហើយ ដែលដឹកនាំប្រតិភូកូរ៉េខាងជើងចរចាជាមួយកូរ៉េខាងត្បូងរហូតមានជំនួបមេដឹកនាំកូរ៉េនៅព្យុងយ៉ាងកាលពីខែកញ្ញា ឆ្នាំ២០១៩ និងជំនួបនៅខែមេសាផងនោះ។
លោក រី ស៊ុនគ័ន អំឡុងពេលជំនួបនៅទឹកដីកូរ៉េខាងត្បូង។ រូបភាព AFP
យ៉ាងណាមិញ គេមិនសូវដឹងពីកិច្ចការផ្នែកការទូតដទៃទៀតរបស់លោក រី ម្នាក់នេះឡើយ។ ចំណែកលោក រី យ៉ុងហូ វិញ ជាអ្នកការទូតជើងចាស់ម្នាក់របស់កូរ៉េខាងជើង និងមានបទពិសោធក្រាស់ក្រែលក្នុងការកិច្ចការជាមួយអាមេរិក។ គេជឿថា លោកត្រូវបានផ្លាស់ប្ដូរក្នុងជំនួបគណៈមជ្ឈិមបក្សកាលពីចុងឆ្នាំ២០១៩ កន្លងទៅ ខណៈលោកមិនមានវត្តមានក្នុងពិធីថតរូបជាមួយលោក គីម ជុងអ៊ុន នៅចុងបញ្ចប់កិច្ចប្រជុំឡើយ។
ការផ្លាស់ប្ដូរតំណែងប្រមុខការទូតនេះ ធ្វើឡើងស្របពេលដែលការចរចាជាមួយអាមេរិកលើការរំសាយនុយក្លេអ៊ែរ នៅតែគ្មានតម្រុយ ហើយកូរ៉េខាងជើង ក៏ប្រកាសតស៊ូប្រឆាំងសម្ពាធអាមេរិកដដែល។ ជាមួយវត្តមានមន្ត្រីការទូតថ្មីបែបនេះ កូរ៉េខាងជើង ទំនងជាផ្លាស់ប្ដូរគោលនយោបាយរបស់ខ្លួនលើបញ្ហាជាមួយអាមេរិកផងដែរ ព្រោះមេដឹកនាំ គីម ជុងអ៊ុន បានប្រាប់ឲ្យមន្ត្រីទាំងអស់ត្រៀមខ្លួនចូលសមរភូមិពេលយូរជាមួយអាមេរិក។
តាមពិតទៅ ក្រោយជំនួបចុងខែធ្នូ មន្ត្រីជាន់ខ្ពស់ជាច្រើន ត្រូវបានផ្លាស់ប្ដូរ។ អនុប្រធានគណៈមជ្ឈិមបក្សពលករចំនួន៥នាក់ក្នុងចំណោម១២នាក់ សុទ្ធតែត្រូវបានដកចេញពីតំណែង ហើយជំនួសដោយមន្ត្រីដែលមានវ័យក្មេង។ លោក រី ស៊ូយ៉ុង (Ri Su-yong) អតីតរដ្ឋមន្ត្រីការបរទេសដែរនោះ ត្រូវដកចេញពីតំណែង។ បើតាម Yonhap លោក ត្រូវជំនួសដោយលោក គីម យ៉ុងជុន (Kim Hyong-jun) អតីតអគ្គរដ្ឋទូតប្រចាំរុស្ស៊ី ដែលទើបត្រូវបានតែងតាំងជាអនុប្រធានគណៈមជ្ឈិម៕
Tag:
កូរ៉េខាងត្បូង
រី យ៉ុងហូ
រី ស៊ុនគ័ន
© រក្សាសិទ្ធិដោយ thmeythmey.com