អន្តរជាតិ
យុវតី Greta Thunberg ប្រាប់មេដឹកនាំពិភពលោកឲ្យស្តាប់ក្មេងៗផង យុវតី Greta Thunberg នៅក្នុងវេទិកាសេដ្ឋកិច្ចពិភពលោក ។ រូបភាព៖ Reuters
× នាវេទិកាសេដ្ឋកិច្ចពិភពលោកក្នុងទីក្រុង Davos ប្រទេសស្វ៊ីស យុវតី Greta Thunberg នាថ្ងៃទី២១ ខែមករា បានទទូចឲ្យមេដឹកនាំពិភពលោកទាំងអស់ ចេះទទួលយកគំនិតសកម្មជនបរិស្ថានក្មេងៗ និងយល់ពីការបកស្រាយវិទ្យាសាស្ត្រ ជុំវិញបញ្ហាបម្រែបម្រួលអាកាសធាតុ។ ការលើកឡើងរបស់យុវតីវ័យ១៧ឆ្នាំរូបនេះ គឺដើម្បីការពារមនុស្សជំនាន់ក្រោយពីផលវិបាកផ្សេងៗ ដែលកើតចេញពីការបម្រែបម្រួលអាកាសធាតុ។
និយាយនៅចំពោះមុខយុវជនបរិស្ថានជាច្រើននាក់ យុវតី Greta Thunberg សកម្មជនបរិស្ថានលើបញ្ហាបម្រែបម្រួលអាកាសធាតុជនជាតិស៊ុយអែត បានជំរុញឲ្យមេដឹកនាំពិភពលោកទាំងអស់ ចេះទទួលយកគំនិតសកម្មជនវ័យក្មេងជុំវិញបញ្ហាបរិស្ថាន ការបម្រែបម្រួលអាកាសធាតុជាដើម។
ក្រោមប្រធានបទ «ការបង្កើតវឌ្ឍនភាពឆ្ពោះទៅអនាគតរួមគ្នា» យុវតីThunberg បានអះអាងយ៉ាងដូច្នេះថា៖ « វិទ្យាសាស្ត្រ និងសម្លេងរបស់យុវជន មិនមែនជាចំណុចសំខាន់នៃកិច្ចសន្ទនារបស់មេដឹកនាំពិភពលោកទេ ប៉ុន្តែវាគួរតែសំខាន់»។ បើតាមយុវតីជនជាតិស្វ៊ីសរូបនេះ សម្លេងយុវជនពាក់ព័ន្ធនឹងបញ្ហាបរិស្ថាន គួរតែត្រូវបានទទួលយក ព្រោះយុវជន និងក្មេងៗជំនាន់ក្រោយ គឺជាអ្នកទទួលរងផលប៉ះពាល់បម្រែបម្រួលអាកាសធាតុ។
ជាមួយគ្នានេះ សកម្មជនវ័យក្មេងរូបនេះ ក៏បានពន្យល់ពីការវិទ្យាសាស្ត្រជុំវិញការបម្រែបម្រួលអាកាសធាតុផងដែរ។ ក្នុងន័យនេះ Thunberg ពន្យល់ថា ប្រសិនបើពិភពលោក នៅតែបញ្ចេញបរិមាណឧស្ម័នកាបូនិកដ៏ច្រើនសន្ធឹកសន្ធាប់ អត្រាកំណើនសីតុណ្ណភាពសកល នឹងមិនអាចរក្សាក្រោម ១,៥អង្សាសេបានទេ។
ក្រៅពីយុវតី Thunberg នៅមានសកម្មជនវ័យក្មេងជាច្រើនទៀត ដែលបានចូលរួមក្នុងកម្មវិធីនាវេទិកាសេដ្ឋកិច្ចពិភពលោក នៅទីក្រុង Davos ស្វ៊ីសនេះ។ ក្នុងនោះមានដូចជា អ្នកវិទ្យាសាស្ត្រវ័យក្មេង លោក Fionn Ferreira ជនជាតិអ៊ីស្លង់ ដែលជាអ្នកបង្កើតដំណោះស្រាយ ដើម្បីកុំឲ្យថង់ប្លាស្ទិកចូលទៅក្នុងសមុទ្រ និងយុវតីជនជាតិអាហ្វ្រិកAyakha Melithafa វ័យ ១៧ឆ្នាំ ដែលជាសកម្មជនអាកាសធាតុជាដើម៕
Tag:
Greta Thunberg
បម្រែបម្រួលអាកាសធាតុ
© រក្សាសិទ្ធិដោយ thmeythmey.com