អន្តរជាតិ
លោក ពូទីន ច្រានចោលគំរូផ្ទេរអំណាចបែបលោក លី ក្វាន់យូ លោកប្រធានាធិបតីរុស្ស៊ី វ្ល៉ាឌីមៀ ពូទីន ក្នុងជំនួបជាមួយសិស្សនិស្សិតរបស់មជ្ឈមណ្ឌលអប់រំ។ រូបភាព៖ Reuters
× ប្រធានាធិបតីរុស្ស៊ី វ្ល៉ាឌីមៀ ពូទីន នៅថ្ងៃទី២២ ខែមករា បានលើកឡើងថា លោកមិនត្រូវការគំរូផ្ទេរអំណាចដូចលោក លី ក្វាន់យូ អតីតនាយករដ្ឋមន្ត្រីសិង្ហបុរីទេ ព្រោះអំណាចប្រធានាធិបតីរុស្ស៊ី ត្រូវតែខ្លាំង ដើម្បីដឹកនាំប្រទេស និងគ្រប់គ្រងបញ្ហាផ្សេងៗ។
លោក លី ក្វាន់យូ គឺជាអតីតនាយករដ្ឋមន្ត្រីសិង្ហបុរីចាប់ពីឆ្នាំ ១៩៦៥ ដល់ឆ្នាំ ១៩៩០។ បន្ទាប់ពីបោះបង់តួនាទីនយោបាយ នៅក្នុងឆ្នាំ២០០៤ លោក លី ក្វាន់យូ ត្រូវបានគេផ្តល់ងារថា រដ្ឋមន្ត្រីមគ្គុទេសន៍ (Minister Mentor) ដើម្បីផ្តល់យោបល់ផ្សេងៗនៅក្នុងរឿងនយោបាយ និងរក្សាស្ថិរភាពសង្គម។
ពាក់ព័ន្ធទៅនឹងបញ្ហានេះ នាជំនួបជាមួយក្រុមនិស្សិតមកពីមជ្ឈមណ្ឌលអប់រំ Sirius នាទីក្រុង Sochi លោកប្រធានាធិបតីរុស្ស៊ី ពូទីន ត្រូវបាននិស្សិតម្នាក់ចោទជាសំណួរ ថាតើរុស្ស៊ីអាចបង្កើតស្ថាប័ន ក្នុងការផ្ទេរអំណាចដូចនៅសិង្ហបុរីដែរឬទេ។
ជាការឆ្លើយតបទៅនឹងសំណួរខាងលើ លោក ពូទីន បានបញ្ជាក់ថា ប្រព័ន្ធបែបនេះ មិនសាកសមជាមួយរុស្ស៊ីនោះទេ។ ក្នុងនេះន័យលោកប្រធានាធិបតីរុស្ស៊ី បានអះអាងបែបនេះថា៖« គាត់ [លី ក្វាន់យូ] គឺជាបុរសដ៍ពូកែម្នាក់... នោះគឺជាការពិត។ ប៉ុន្តែខ្ញុំមិនដឹងពីការកាន់អំណាចក្នុងរយៈពេល ៣០ឆ្នាំរបស់គាត់ឡើយ។ គាត់ [លី ក្វាន់យូ] គឺជាស្ថាបនិកសិង្ហបុរី នោះគឺជាការពិត។ តើអ្នកចង់ឲ្យខ្ញុំក្លាយជារដ្ឋមន្ត្រីមគ្គុទេសន៍ ដូចគាត់ដែរឬ?» នេះបើតាមការចុះផ្សាយរបស់ទីភ្នាក់ងារសារព័ត៌មាន Reuters។
បើតាមលោកពូទីន គំរូរបស់សិង្ហបុរីក្នុងការបង្កើតតួនាទីផ្សេង ដើម្បីផ្ទេរអំណាច គឺមិនអាចយកមកអនុវត្តនៅរុស្ស៊ីបានទេ ព្រោះវានឹងធ្វើឲ្យប៉ះពាល់ដល់តំណែងប្រធានាធិបតី។ ពោលគឺ ការបង្កើតតំណែងថ្មីនេះ នឹងកាត់បន្ថយអំណាចប្រធានាធិបតីរុស្ស៊ី។ ម្យ៉ាងរុស្ស៊ី មិនសាកសមជាមួយប្រព័ន្ធដឹកនាំរបស់លោកលី ក្វាងយូទេ។ បានសេចក្តីថារុស្ស៊ី មិនត្រូវការប្រព័ន្ធដឹកនាំបែបសិង្ហបុរី ដែលមានរដ្ឋមន្ត្រីមគ្គុទេសន៍នោះទេ ព្រោះប្រធានាធិបតីរុស្ស៊ី ត្រូវតែមានអំណាចខ្លាំង ដើម្បីដឹកនាំប្រទេស និងដោះស្រាយបញ្ហាផ្សេងៗ។
សូមបញ្ជាក់ថា សំណួររបស់និស្សិតមជ្ឈមណ្ឌលអប់រំម្នាក់នេះ គឺធ្វើឡើងបន្ទាប់ពី មានពាក្យចចាមអារ៉ាមថា លោកពូទីន បានប្រកាសធ្វើវិសោធនកម្មរដ្ឋធម្មនុញ្ញរុស្ស៊ី ដើម្បីត្រួសត្រាយផ្លូវទៅរកការបន្តអំណាចទៀត ខណៈអាណត្តិប្រធានាធិបតីបច្ចុប្បន្ននឹងចប់នៅឆ្នាំ ២០២៤។ រដ្ឋធម្មនុញ្ញរុស្ស៊ីសព្វថ្ងៃ មិនអនុញ្ញាតឲ្យលោកកាន់តំណែងអាណត្តិទីបីឡើយ៕
Tag:
រុស្ស៊ី
សិង្ហបុរី
លី ក្វាន់យូ
© រក្សាសិទ្ធិដោយ thmeythmey.com