ថ្ងៃទី២៥ ខែមករា ប្រទេសចិន ក៏ដូចជាប្រជាជនចិននៅតាមបណ្តាប្រទេសមួយចំនួន នឹងប្រារព្ធពិធីបុណ្យចូលឆ្នាំចិន។ ព្រឹត្តិការណ៍នេះ ត្រូវបានប្រជាជនចិន គិតថាគឺជាការលាងជម្រះរឿងចាស់ទាំងឡាយនៅក្នុងឆ្នាំចាស់ឲ្យអស់ ហើយចាប់ផ្តើមរឿងថ្មី គំនិតថ្មី នៅក្នុងឆ្នាំថ្មី។ មិនតែប៉ុណ្ណោះ នៅមុខ និងក្នុងកំពុងថ្ងៃប្រារព្ធពិធីបុណ្យចូលឆ្នាំថ្មីនេះ ប្រជាជនចិន ត្រូវធ្វើការយ៉ាងច្រើន និងកាន់ត្រណមមួយចំនួន។
ខាងក្រោមនេះ គឺជាអ្វី ដែលប្រជាជនចិន នឹងត្រូវធ្វើ៖
ការសម្អាត និងការតុបតែងផ្ទះសម្បែងមុនថ្ងៃចូលឆ្នាំ
ជារៀងរាល់ឆ្នាំប្រជាជនចិន តែងតែសម្អាតផ្ទះឲ្យស្អាត មុនថ្ងៃចូលឆ្នាំថ្មីមកដល់ ព្រោះវាគឺជាការនាំលាភសំណាងចូលមកក្នុងផ្ទះ។ ក្នុងរយៈពេលពីរ បីសប្តាហ៍មុនថ្ងៃចូលឆ្នាំនេះ ប្រជាជនចិន នឹងដុសជូត បោសធូលី ដកចោលរុក្ខជាតិងាប់ៗ ដើម្បីឲ្យបរិយាកាសក្នុងផ្ទះ មានផាសុខភាព ស្អាត និងថ្មី។ ប៉ុន្តែនៅថ្ងៃចូលឆ្នាំចូលមកដល់ ប្រជាជន មិនសម្អាតផ្ទះជាដាច់ខាត។ បើតាមជំនឿពីបុរាណមក វាប្រៀបដូចជាបោសលាភសំណាងចេញពីផ្ទះផងដែរ។ សូម្បីតែយកសម្រាមចោល បោកសំលៀកបំពាក់ ក៏ត្រូវបានហាមឃាត់ដែរ។
បន្ទាប់ពីសម្អាតផ្ទះរួច ប្រជាជនចិនចាប់ផ្តើមតុបតែងផ្ទះរបស់ខ្លួនតាមចំណង់រៀងៗខ្លួន។ ក្នុងការតុបតែងផ្ទះ ជនជាតិចិនភាគច្រើន មានការដាក់ចង្កៀងក្រហមនៅពីមុខទ្វារ ដើម្បីដេញគ្រោះចង្រៃ, បិទក្រដាសសួស្តីឆ្នាំថ្មី និងក្រដាសជូនពរ នៅតាមទ្វារ, ការកាត់រូបតំណាងឲ្យភាពសុខដុមរមនា ដើម្បីបិទនៅតាមទ្វារ ឬបង្អួច, ការគូសរូប, បិទយ័ន្ត, និងដាំក្រូចសម្រាប់លម្អជាដើម។
ថ្ងៃបុណ្យចូលឆ្នាំចិន
ក្នុងរយៈពេលថ្ងៃឈប់សម្រាកចំនួន ៤ថ្ងៃនេះ ជនជាតិចិនជាច្រើននាក់ នឹងជួបជុំគ្នាបរិភោគអាហារ ការឲ្យអាំងប៉ាវ ការធ្វើពិធីសែនទេពតាជាដើម។ មិនត្រឹមតែប៉ុណ្ណោះ ការអុជកាំជ្រួច និងផាវ នឹងធ្វើឡើងនៅគ្រប់ផ្ទះទាំងអស់ ដើម្បីបណ្តេញគ្រោះចង្រៃ និងបិសាចទាំងឡាយចេញពីផ្ទះ។ ជាពិសេសក្នុងរយៈពេលប៉ុន្មានថ្ងៃនេះ ប្រជាជនចិន តែងតែស្លៀកពាក់សំលៀកបំពាក់ថ្មីៗពណ៌ក្រហម ដើម្បីទទួលសាច់ញាតិ និងជូនពរគ្នាទៅវិញទៅមក។ ក្រៅពីនេះ គេក៏មើលការសម្តែងផ្សេងៗផងដែរដូចជា មុងសាយជាដើម។
ត្រណមផ្សេងៗនៅក្នុងថ្ងៃចូលឆ្នាំ (Taboo)
នាថ្ងៃចូលឆ្នាំចិន ជនជាតិចិនទាំងអស់ត្រូវតែត្រណមមួយចំនួនដូចជា មិនត្រូវលេបថ្នាំ, កុំយកសម្រាមទៅចោល, កុំបរិភោគបបរ ឬសាច់នៅពេលព្រឹក, កុំបោកសំលៀកបំពាក់ និងកក់សក់, ជៀសវៀងបែកបាក់សម្ភារៈផ្សេងៗនៅក្នុងផ្ទះ, កុំទៅមន្ទីពេទ្យ, ជៀសវាងការខ្ចីលុយ និងស្លៀកសំលៀកបំពាក់ចាស់ជាដើម។
បន្ថែមពីលើនេះនៅមានត្រណមបីទៀតក្នុងការផ្តល់ជាអំណោយ ដែលជនជាតិចិនមិនត្រូវឲ្យជាដាច់ខាត ព្រោះវាតំណាងឲ្យរឿងមិនល្អ។ ត្រណមទីមួយគឺ កុំផ្តល់អំណោយមានពណ៌ស ឬខ្មៅ, ទីពីគឺខ្សែក និងទីបី គឺមួកពណ៌បៃតង។
អំណោយផ្សេង
ក្រៅពីត្រណមផ្សេងៗ ជនជាតិចិន ក៏មានអំណោយឲ្យគ្នាទៅវិញទៅមកផងដែរ។ អំណោយទាំងនោះ មានអាំងប៉ាវពណ៌ក្រហម ដែលតំណាងឲ្យសំណាងល្អ, ស្រា, បារី, តែ, ផ្លែឈើ, និងស្ករគ្រាប់ជាដើម។ ក្រៅពីនេះ អំណោយផ្សេងទៀត អាចមាន សំលៀកបំពាក់ សៀវភៅ និងស្រាក្រហមជាដើម ៕