អន្តរជាតិ
វៀតណាម ប្តេជ្ញាបង្កើតបរិកាសវិនិយោគឲ្យប្រសើរ ដើម្បីជួយក្រុមហ៊ុនក្នុងស្រុក និងទាក់ទាញវិនិយោគបរទេសឲ្យបានច្រើន
×![]()
រដ្ឋាភិបាលក្រុងហាណូយ បានបង្ហាញការប្តេជ្ញាចិត្តកាន់តែមុតមាំ ដើម្បីធ្វើឲ្យឆ្នាំ២០២០នេះ ជាឆ្នាំនៃការកែទម្រង់ស្ថាប័នឲ្យកាន់តែជាក់លាក់ និងឆ្លើយតបនឹងបញ្ហា។ ការប្តេជ្ញាចិត្តនេះ ធ្វើឡើងដើម្បីធ្វើឲ្យវៀតណាមក្លាយជាទិសដៅទាក់ទាញសម្រាប់វិនិយោគ ដែលជាលទ្ធផលចុងក្រោយធ្វើឲ្យវៀតណាម អាចសម្រេចបានកំណើនសេដ្ឋកិច្ចកំណត់ដោយរដ្ឋាភិបាល។
ប្រធានសភាពាណិជ្ជកម្ម និងឧស្សាហកម្មវៀតណាម លោក Vũ Tiến Lộc បានឲ្យដឹងថា រដ្ឋាភិបាលវៀតណាម នៅថ្ងៃ១ មករាកន្លងទៅ បានចេញសេចក្តីសម្រេចមួយ ដោយបានដាក់គោលដៅលើកកម្ពស់ និងកែសម្រួលបរិយាកាសក្នុងការធ្វើធុរកិច្ច និងវិនិយោគរបស់ប្រទេសឲ្យកាន់តែល្អប្រសើរ។ នេះបើយោងតាមការចុះផ្សាយរបសភ្នាក់ងារព័ត៌មានវៀតណាម Vietnam នៅថ្ងៃ២៥ មករា កន្លងទៅ។
តាមប្រភពព័ត៌មានដដែល តំណាងក្រុមអ្នករកស៊ីរបស់វៀតណាមរូបនេះ បានកត់សម្គាល់ថា ភាពមិនប្រាកដប្រជានៃទីផ្សារសកល និងការធ្លាក់ចុះ នៃសេដ្ឋកិច្ចសកល គឺជាក្តីបារម្ភមួយសម្រាប់វៀតណាម។ នេះ នៅមិនទាន់និយាយដល់បញ្ហាបរិយាសកាសធុរកិច្ចរបស់វៀតណាម ដែលការនាំចេញ និងនាំចូល ពឹងផ្អែកខ្លាំងតែលើទីផ្សារមួយចំនួន។
យ៉ាងណាក៏ដោយ ដើម្បីឆ្លើយតបនឹងទំនោរនេះ ប្រធានសភាពាណិជ្ជកម្មវៀតណាមរូបនេះ បានអះអាងថា រដ្ឋាភិបាលវៀតណាម បានដាក់ចេញយុទ្ធសាស្ត្រថ្មី ដោយដាក់គោលដៅខ្លាំងលើការកែទម្រង់ស្ថាប័ន ក្រោមមូលបទ «ដកចេញ និង តភ្ជាប់»។
តាមលោក Loc យុទ្ធសាស្ត្រ ដកចេញ សំដៅលើការដកចេញ ឬលុបចោលរាល់របាំងនានាពាក់ព័ន្ធនឹងការធ្វើធុរកិច្ចរបស់ប្រទេស ខណៈតភ្ជាប់ សំដៅលើការជំរុញ និងលើកកម្ពស់ការតភ្ជាប់សហគ្រាសតូច និងមធ្យម ជាមួយនឹងអ្នកវិនិយោគបរទេសដោយផ្ទាល់ ស្របតាមបដិវត្តន៍ឧស្សាហកម្ម ៤.០ និងស្របពេលដែលវៀតណាម កំពុងតែអនុវត្តកិច្ចព្រមព្រៀងពាណិជ្ជកម្មសេរីជាមួយជាបណ្តាប្រទេសដៃគូ។
គួរជម្រាបថា វៀតណាម គឺជារដ្ឋអាស៊ានមួយ ដែលទទួលបានការវាយតម្លៃខ្ពស់ ជារដ្ឋមានសក្តានុពលសម្រាប់ការវិនិយោគ និងជាតារាសេដ្ឋកិច្ចកំពុងតែរះផងក្នុងតំបន់ ខណៈដែលប្រទេសនេះ បានទទួលយកកិច្ចព្រមព្រៀងពាណិជ្ជកម្មសេរី ជាបន្តបន្ទាប់ពីបណ្តាភាគីដៃគូ។ ដៃពាណិជ្ជកម្មធំៗ និងសំខាន់របស់វៀតណាម មានដូចជា ចិន កូរ៉េខាងត្បូង អាមេរិក ជប៉ុន និងបណ្តាប្រទេសសហភាពអឺរ៉ុប៕
Tag:
វៀតណាម
ពាណិជ្ជកម្ម
© រក្សាសិទ្ធិដោយ thmeythmey.com
