អន្តរជាតិ
តៃវ៉ាន់ ពិន័យអ្នកជំងឺកូរ៉ូណាវីរុសម្នាក់១ម៉ឺនដុល្លារ ព្រោះព្យាយាមបិទបាំងជំងឺ អ្នកជំងឺកំពុងអង្គុយរង់ចាំទទួលការព្យាបាលនៅមន្ទីរពេទ្យមួយកន្លែងក្នុងទីក្រុង វូហាន ប្រទេសចិន (AFP)
× បុរសជាអ្នកដំណើរម្នាក់ដែលឆ្លងជំងឺកូរ៉ូណាវីរុសថ្មី នឹងត្រូវបង់ពិន័យ ១ម៉ឺនដុល្លារ សម្រាប់ព្យាយាមលាក់បាំងជំងឺរបស់លោក ក្រោយធ្វើដំណើរទៅកាន់ទីក្រុងវូហាន ដែលជាសម្បុកនៃការផ្ទុះឡើងមេរោគដែលបង្កទៅជាជំងឺរលាកសួតប្រភេទថ្មីនេះ។ អាជ្ញាធរសុខាភិបាលតៃវ៉ាន់ បញ្ជាក់បែបនេះកាលពីថ្ងៃទី២៥ ខែមករា។
គិតត្រឹមថ្ងៃ២៥ ខែមករា បុរសម្នាក់នេះ គឺជាអ្នកជំងឺម្នាក់ក្នុងចំណោមមនុស្ស៣នាក់នៅកោះតៃវ៉ាន់ ដែលបានកើតជំងឺរលាកសួតវូហាន។ តាមទីភ្នាក់ងារព័ត៌មានក្នុងស្រុកតៃវ៉ាន់ Central News បុគ្គលដែលរងពិន័យរបស់អាជ្ញាធរនេះ បានធ្វើតេស្តវិជ្ជមានសម្រាប់វីរុសនេះ កាលពីថ្ងៃ២២ ខែមករា នៅមន្ទីរពេទ្យមួយកន្លែងក្នុងទីក្រុង Kaohsiung ភាគខាងត្បូងកោះតៃវ៉ាន់។
តាមប្រភពព័ត៌មានដដែល បុរសរូបនេះ ត្រូវបានចោទប្រកាន់ថា ពុំបានជូនដំណឹងថា លោកមានរោគសញ្ញានៃការឆ្លងវីរុសផ្លូវដង្ហើមខាងលើ មុនពេលលោកចូលមកក្នុងទឹកដីតៃវ៉ាន់។ ការណ៍នេះ គឺបំពាននឹងច្បាប់ត្រួតពិនិត្យការឆ្លង។ ទន្ទឹមនេះ លោក ក៏បានអះអាងទៀតថា លោកបានទៅលេងកម្សាន្តនៅក្លឹបរាំរែកមួយកន្លែងក្នុងទីក្រុង Kaohsiung ដោយពុំបានពាក់ម៉ាស់ការពារឡើយ។
មនុស្សជាង ៨០នាក់ ដែលបានប៉ះដោយផ្ទាល់ជាមួយអ្នកដំណើរដែលឆ្លងជំងឺរូបនេះ ត្រូវបានអាជ្ញាធរសុខាភិបាលតៃវ៉ាន់កំណត់អត្តសញ្ញាណបាន ហើយកំពុងតាមរកផងដែរ។ អ្នកបម្រើការនៅក្លឹបកម្សាន្តខាងលើម្នាក់ ដែលត្រូវបានរាយការណ៍ថា មានរោគសញ្ញា រួមមាន ក្អក ជាដើមនោះ ត្រូវបានដាក់ឲ្យនៅដាច់ដោយឡែកពីគេសម្រាប់ការធ្វើតេស្តិ៍រកមើលជំងឺ។
ការដាក់ពិន័យធ្ងន់ធ្ងរបែបនេះ ឆ្លុះបញ្ចាំងឲ្យឃើញថា រដ្ឋាភិបាលតៃវ៉ាន់ មានឆន្ទៈក្នុងការអនុវត្តច្បាប់តឹងរ៉ឹងប្រឆាំងនឹងការរាតត្បាតនៃកូរ៉ូណាវីរុសនេះ ដែលគិតមកត្រឹមថ្ងៃចន្ទ ២៧ ខែមករា នេះបានសម្លាប់មនុស្សយ៉ាងតិច ៨០នាក់។ ហើយកាលពីចុងសប្តាហ៍មុន ក្រសួងដឹកជញ្ជូនតៃវ៉ាន់ បានស្នើឲ្យក្រុមហ៊ុនអាកាសចរណ៍ទាំងអស់លុបចោលដំណើរកម្សាន្តទៅកាន់ប្រទេសចិន៕
Tag:
តៃវ៉ាន់
កូរ៉ូណាវីរុស
ក្រសួងសុខាភិបាល
© រក្សាសិទ្ធិដោយ thmeythmey.com