ក្រុមអ្នកជំនាញខាងអាវុធ និងជម្លោះ ដែលមានមូលដ្ឋាននៅស៊ុយអែត នាថ្ងៃទី២៧ ខែមករា បានបញ្ចេញទិន្នន័យមួយជុំវិញការលក់អាវុធរបស់ក្រុមហ៊ុនចិនទៅបរទេស។ តាមទិន្នន័យមួយនេះ ក្រុមហ៊ុនចិនចំនួន ៤ បានលក់អាវុធប្រមាណ ៥៤ពាន់លានដុល្លារនៅក្នុងឆ្នាំ ២០១៧ ដែលជាតួលេខមួយតាមពីក្រោយអាមេរិក តែនាំមុខរុស្ស៊ី។
វិទ្យាស្ថាន International Peace Research ដែលមានមូលដ្ឋាននៅទីក្រុងស្តុកខុល បានបញ្ចេញទិន្នន័យមួយជុំវិញរបាយការណ៍ហិរញ្ញវត្ថុនៃការលក់អាវុធរបស់ក្រុមហ៊ុនចិនចំនួន៤ បើទោះបីជាវិទ្យាស្ថានមួយនេះ មិនបានដាក់បញ្ចូលចិនចូលទៅក្នុងក្រុមប្រទេសដែលផលិតអាវុធច្រើនជាងគេនៅលើសកលលោកក៏ដោយ ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
តាមរយៈរបាយការណ៍នេះ វិទ្យាស្ថានខាងលើបានស្រង់យកព័ត៌មានចាប់ពីឆ្នាំ ២០១៥ ដល់ ២០១៧ ទៅលើក្រុមហ៊ុនលក់អាវុធរបស់ចិនចំនួន ៤ ដែលអាចរកចំណូលបានជាច្រើនពាន់លានដុល្លារក្នុងមួយឆ្នាំៗ។ បើតាមវិទ្យាស្ថាន ក្រុមហ៊ុនផលិតអាវុធទាំង៤របស់ចិន អាចរកប្រាក់ចំណូលបានរហូតដល់ទៅ ៥៤,១ ពាន់លានដុល្លារឯណោះក្នុងឆ្នាំ២០១៧។
តួលេខមួយនេះ បានធ្វើឲ្យ ចិនស្ថិតនៅលំដាប់ទីពីរបន្ទាប់ពីអាមេរិក ដែលអាចរកចំណូលបាន ២២៦,៦ពាន់លានដុល្លារ និងនាំមុខរុស្ស៊ី ដែលអាចរកចំណូលផលិតអាវុធ ៣៧,៧ ពាន់លានដុល្លារ ក្នុងឆ្នាំ២០១៧។ បន្ថែមពីលើនេះ ក្រុមហ៊ុនចំនួន ៣របស់ចិន គឺស្ថិតក្នុងចំណោម ក្រុមហ៊ុនចំនួន១០របស់ពិភពលោក ខណៈពេលក្រុមហ៊ុនចិនមួយទៀត ស្ថិតក្នុងចំណោមក្រុមហ៊ុនចំនួន២០ ដែលអាចរកចំណូលបានច្រើនជាងគេលើសកលលោក។
ក្រុមហ៊ុនទាំង៤នោះមានដូចជា ក្រុមហ៊ុនសាជីវកម្មយន្តហោះចម្បាំង និងគ្រឿងបំពាក់យន្តហោះ AVIC ដែលស្ថិតនៅលំដាប់ទី៦ និងរកចំណូលបាន ២០,១ពាន់លានដុល្លារ, ក្រុមហ៊ុនសាជីវកម្មChina North ដែលស្ថិតនៅលំដាប់ទី៨ និងរកចំណូលបាន ១៧,២ពាន់លានដុល្លារ, ក្រុមហ៊ុន China Electronics Technology រកចំណូលបាន ១២,២ពាន់លានដុល្លារ និងក្រុមហ៊ុន China South រកចំណូលបាន៤,៦ពាន់លានដុល្លារនៅក្នុងឆ្នាំ ២០១៧។
វិទ្យាស្ថាន International Peace Research ដែលមានមូលដ្ឋាននៅក្រុងទីក្រុងស្តុកខុល បានវាយតម្លៃថា ពិភពលោក បានចំណាយថវិការលើយោធា ប្រមាណជា ១,៨ទ្រីលានដុល្លារ ដែលជាតួលេខមួយខ្ពស់ជាងពេលណាទាំងអស់ ចាប់តាំងពីសង្គ្រាមត្រជាក់បានបញ្ចប់មក។ កំណើនទឹកប្រាក់ដ៏ច្រើនសន្ធឹកសន្ធាប់បែបនេះ គឺបណ្តាលមកពីចិន និងអាមេរិក បានចាយលុយលើវិស័យនេះច្រើនពេក៕