សុខភាព
អន្តរជាតិ
គ្រួសារចិន៤នាក់នៅអារ៉ាប់រួមអេមីរ៉ាត កើតកូរ៉ូណាវីរុសទាំងអស់ ខណៈសិង្ហបុរីឡើង១០ អូស្ត្រាលី៧ អ្នកដំណើរម្នាក់នៅលើរថភ្លើងនាក្រុងហុងកុង។ រូបថត AFP
× គិតត្រឹមម៉ោង៩ និង១០នាទីល្ងាចថ្ងៃពុធ ទី២៩ ខែមករា នេះ ចិនបានកើនឡើងអ្នកជំងឺរលាកសួតបង្កដោយមេរោគកូរ៉ូណាប្រភេទថ្មី ដល់ទៅជាង៦០០០ករណី រីឯសិង្ហបុរីឡើងដល់១០ អូស្ត្រាលីឡើងដល់៧ ហើយសមាជិកគ្រួសារទាំង៤របស់ទេសចរចិននៅអេមីរ៉ាតអារ៉ាប់រួម កើតជំងឺដែលមានប្រភពពីវូហានទាំងអស់។ បច្ចុប្បន្នអ្នកស្លាប់នៅចិនមាន១៣២នាក់។
សិង្ហបុរី អះអាងពីការធ្វើតេស្តិ៍រកឃើញអ្នកជំងឺ៣នាក់ ដែលសុទ្ធតែជាជនជាតិចិនមកពីវូហានទាំងអស់។ ដូច្នេះចំនួនអ្នកកើតកូរ៉ូណាវីរុសនៅបុរីរដ្ឋមួយនេះឡើងដល់១០នាក់ហើយ។ នេះបើយោងតាមការផ្សាយរបស់ CNA។
បើតាមក្រសួងសុខាភិបាលសិង្ហបុរី ករណីពីរថ្មី គឺជាប្តីប្រពន្ធដែលមានអាយុ៥៦ឆ្នាំដូចគ្នា ដោយពួកគេបានទៅដល់សិង្ហបុរី កាលពីថ្ងៃទី១៩ ខែមករា។ រីឯករណីទី១០ គឺជាបុរសវ័យ៥៦ឆ្នាំផងដែរ ដែលបានទៅដល់សិង្ហបុរី កាលពីថ្ងៃទី២០ ខែមករា។
ដោយឡែក South China Morning Post បានផ្សាយឲ្យដឹងថា សមាជិកគ្រួសារ៣នាក់ទៀតរបស់អ្នកជំងឺទីមួយនៅអេមីរ៉ាតអារ៉ាប់រួម សុទ្ធតែមានជំងឺកូរ៉ូណាវីរុស។ ពួកគេសុទ្ធតែមានប្រភពពីក្រុងវូហាន ហើយបានធ្វើដំណើរទេសចរណ៍ជាលក្ខណៈគ្រួសារ។
នៅថ្ងៃពុធនេះដដែល សារព័ត៌មាន 7news របស់អូស្ត្រាលី បានអះអាងពីករណីដំបូងនៃអ្នកកើតកូរ៉ូណាវីរុសនៅរដ្ឋ Queenland ដោយអ្នកជំងឺជាបុរសចិនវ័យ៤៤ឆ្នាំម្នាក់ ដែលមានប្រភពពីក្រុងវូហាន។ ករណីថ្មីនេះ នាំឲ្យអូស្ត្រាលីទាំងមូលមានអ្នកកើតកូរ៉ូណាវីរុសចំនួន៧នាក់ហើយ។
គិតត្រឹមម៉ោង៩ និង១០នាទី យប់ថ្ងៃទី២៩ ខែមករា អ្នកកើតជំងឺកូរ៉ូណាវីរុសមានជាង៦០០០នាក់ និងស្លាប់១៣២នាក់ ដែលនៅក្នុងប្រទេសចិនទាំងអស់។ ក្រៅពីចិន និងតំបន់រដ្ឋបាលពិសេសហុងកាវ ម៉ាកាវ និងតៃវ៉ាន់ ប្រទេសផ្សេងទៀតដែលមានករណីអ្នកកើតកូរ៉ូណាវីរុសរួមមាន ថៃ សិង្ហបុរី ជប៉ុន ម៉ាឡេស៊ី អូស្ត្រាលី សហរដ្ឋអាមេរិក បារាំង អាល្លឺម៉ង់ កូរ៉េខាងត្បូង អេមីរ៉ាតអារ៉ាប់រួម កាណាដា វៀតណាម ណេប៉ាល់ ស្រីលង្កា និងកម្ពុជា៕
© រក្សាសិទ្ធិដោយ thmeythmey.com