ក្រសួងការបរទេសសិង្ហបុរី ថាពលរដ្ឋខ្លួន៩២នាក់មកដល់មាតុភូមិវិញពីវូហានហើយ

អន្តរជាតិ

ក្រសួងការបរទេសសិង្ហបុរី ថាពលរដ្ឋខ្លួន៩២នាក់មកដល់មាតុភូមិវិញពីវូហានហើយ

30, Jan 2020 , 3:05 pm

រូបភាព

រដ្ឋមន្ត្រីការបរទេសសិង្ហបុរី លោក Vivian Balakrishnan (AFP)

ដោយ:

ក្រសួងការបរទេសសិង្ហបុរី បញ្ជាក់ឲ្យដឹងថា ពលរដ្ឋសិង្ហបុរី ៩២ នាក់ បានមកដល់មាតុប្រទេសវិញ ពីក្រុង វូហាន នៅថ្ងៃព្រហស្បតិ៍ ៣០ ខែមករា នេះ។

«ប្រជាជនសិង្ហបុរី ៩២ នាក់ នឹងមកដល់ប្រទេសសិង្ហបុរី ពីក្រុង វូហាន ខេត្ត Hubei តាមរយៈជើងហោះហើរ TR121 របស់ក្រុមហ៊ុនអាកាសចរណ៍ Scoot នាព្រឹកនេះ»។ ក្រសួងការបរទេសសិង្ហបុរី បញ្ជាក់ក្នុងសេចក្តីប្រកាសព័ត៌មានខ្លួនបែបនេះ។

បើតាមវេបសាយតាមដានជើងហោះហើរ Flightradar យន្តហោះដឹកពលរដ្ឋសិង្ហបុរីពីវូហាននេះ បានចាកចេញពីទីក្រុងចិននេះ នៅម៉ោងប្រហែល៧ព្រឹក ហើយនឹងមកដល់ប្រទេសសិង្ហបុរី នៅវេលាម៉ោង ១១៖៤០នាទីព្រឹក។

តាមរយៈសេចក្តីប្រកាសព័ត៌មានដដែល ក្រសួងការបរទេសសិង្ហបុរី បានអះអាងទៀតថា ក្នុងសន្ទនាតាមទូរសព្ទជាមួយរដ្ឋមន្ត្រីការបរទេសចិន លោក វ៉ាង យី កាលពីថ្ងៃ ២៩ មករា ប្រមុខការទូតសិង្ហបុរី លោក Vivian Balakrishnan បានសម្តែងការកោតសរសើររបស់រដ្ឋាភិបាលសិង្ហបុរីចំពោះរដ្ឋាភិបាលចិន ព្រមទាំងស្ថានទូតចិនក្នុងប្រទេសសិង្ហបុរីផងដែរសម្រាប់ការសម្របសម្រួលការធ្វើមាតុប្រទេសដោយមានសុវត្ថិភាពរបស់ប្រជាជនសិង្ហបុរីទាំងនេះ។

ម្យ៉ាងវិញទៀត ក្រសួងការបរទេស បានសង្កត់ធ្ងន់ថា ប្រជាជនសិង្ហបុរិដែលនឹងត្រលប់មកវិញនេះ នឹងឆ្លងកាត់ការត្រួតពិនិត្យសុខភាព នៅពេលពួកគេមកដល់ព្រលានយន្តហោះ Changi។ ចំណែកអ្នកដែលមានរោគសញ្ញាក្តៅខ្លួន ឬផ្លូវដង្ហើមណាមួយ នឹងត្រូវបញ្ជូនទៅកាន់មន្ទីរពេទ្យ សម្រាប់ពិនិត្យស្ថានភាពបន្តទៀត ខណៈអ្នកដែលនៅសេសសល់នោះ រួមមានទាំងមន្ត្រីកុងស៊ុលសិង្ហបុរី ដែលបានជួយសម្របសម្រួលដំណើរត្រលប់មកវិញនេះ នឹងត្រូវដាក់ឲ្យនៅដាច់ដោយឡែករយៈពេល ១៤ថ្ងៃ។

សូមបញ្ជាក់ថា គិតមកត្រឹមព្រឹកថ្ងៃ ព្រហស្បតិ៍ ៣០ ខែមករា នេះ ប្រទេសសិង្ហបុរី បានរកឃើញអ្នកឆ្លងណូវែលកូរ៉ូណាវីរូសចំនួន ១០នាក់ ហើយ៕