អន្តរជាតិ
កូរ៉ូណាវីរុស៖ អ្នកជំងឺប្រមាណ១៨០នាក់ ត្រូវបានព្យាបាលសះស្បើយ
× ជំងឺរលាកសួតបង្កដោយមេរោគកូរ៉ូណាប្រភេទថ្មី បានរាលដាលស្ទើរគ្រប់តំបន់ក្នុងប្រទេសចិន ហើយបន្តទៅ១៩ប្រទេសជាតិនៅលើពិភពលោក។ គិតត្រឹមម៉ោង១១ និង៣០នាទី ថ្ងៃទី៣១ ខែមករា នេះ អ្នកជំងឺឡើងជិតដល់១០០០០នាក់ ខណៈអ្នកស្លាប់មាន២១៣នាក់ ដែលសុទ្ធតែនៅចិនទាំងអស់។ ជាមួយនឹងករណីសង្ស័យជាង១៥០០០ទៀត អ្នកជំងឺប្រមាណ១៨០នាក់ ក៏ត្រូវបានព្យាបាលសះស្បើយផងដែរ។
ទិន្នន័យសារធារណៈរបស់គណៈកម្មាធិការជាតិសុខាភិបាលចិន រួមទាំងតំណាងថ្នាក់ខេត្ត និងតំបន់រដ្ឋបាលស្វយ័តហុងកុង ម៉ាកាវ និងតៃវ៉ាន់ បានបង្ហាញថា អ្នកជំងឺនៅចិន ជាង១៧០នាក់ ត្រូវបានព្យាបាលសះស្បើយ ដូចករណីនៅតាមបណ្តាប្រទេសមួយចំនួនផងដែរ។
នៅខេត្ត Hubei ដែលមានអ្នកស្លាប់ជាង២០០នាក់នោះ ក៏មានអ្នកជំងឺជាង១០០នាក់ហើយ ដែលបានជាសះស្បើយ ក្នុងនោះក្រុងវូហាន មាន៧៥នាក់។ ខេត្ត Zhejiang ខេត្ត Guangdong ខេត្ត Jiangxi, ក្រុងសៀងហៃ ជាដើម មានអ្នកជាសះស្បើយប្រមាណ១០នាក់រៀងៗខ្លួនផងដែរ។
ក្រៅពីចិន ប្រទេសមួយចំនួនក៏បានអះអាងពីការព្យាបាលសះស្បើយអ្នកជំងឺនៅក្នុងទឹកដីរបស់ខ្លួនផងដែរ។ ក្រសួងសុខាភិបាលថៃ បានបញ្ជាក់ពីការសះស្បើយអ្នកជំងឺ៥នាក់ក្នុងចំណោម១៤នាក់។ ករណីជាសះស្បើយក៏មាននៅវៀតណាម អូស្ត្រាលី ជប៉ុន និងណេប៉ាល់ ផងដែរ។ អ្នកជំងឺ១ករណីនៅកម្ពុជា ក៏ដូចជាបណ្តាប្រទេសមួយចំនួន មានលក្ខខណ្ឌឈានទៅរកភាពប្រក្រតី៕
© រក្សាសិទ្ធិដោយ thmeythmey.com