អន្តរជាតិ
ប៉េកាំង រិះគន់អាមេរិកក្រោយចេញការព្រមានរឿងធ្វើដំណើរទៅចិនព្រោះខ្លាចកូរ៉ូណាវីរុស
អ្នកនាំពាក្យក្រសួងកាបរទេសចិន អ្នកស្រី Hua Chunying (Kyodo)
×![]()
រដ្ឋាភិបាលប៉េកាំង បានរិះគន់ខ្លាំងៗលើសហរដ្ឋអាមេរិក សម្រាប់ការព្រមានពលរដ្ឋខ្លួនបញ្ចៀសការធ្វើដំណើរទៅកាន់ប្រទេសចិន ហើយសម្រាប់ការទទូចឲ្យអ្នកដែលបានទៅដល់ទីនោះប្រញាប់ចាកចេញ ព្រោះអាសន្នសុខភាពរឿងកូរ៉ូណាវីរុស។ 
ក្នុងសេចក្តីថ្លែងការណ៍មួយ អ្នកនាំពាក្យក្រសួងកាបរទេសចិន អ្នកស្រី Hua Chunying លើកឡើងថា ពាក្យសម្តីនិងសកម្មភាពរបស់មន្ត្រីអាមេរិកមួយចំនួន ពុំមែនជាការពិតនិងមិនសមរម្យឡើយ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ។
អ្នកស្រី សង្កត់ធ្ងន់ដូច្នេះថា៖«ដូចដែលអង្គការសុខភាពពិភពលោកបានណែនាំប្រឆាំងនឹងការរឹតត្បិតការធ្វើដំណើរ សហរដ្ឋអាមេរិកបែរបានប្រញាប់ប្រញាល់អនុវត្តផ្ទុយពីការណែនាំនេះទៅវិញ។ ប្រាកដណាស់នេះពុំមែនជាកាយវិការសុច្ឆន្ទៈទេ»។
កាលពីពេលថ្មីៗនេះ ក្រសួងការបរទេសសហរដ្ឋអាមេរិក បានបង្កើនការប្រុងប្រយ័ត្នរបស់ខ្លួនដល់កម្រិតខ្ពស់បំផុត ដោយប្រាប់ប្រជាជនអាមេរិកឲ្យចៀសវាងប្រទេសចិន។ ការប្រកាសនេះ ធ្វើឡើងក្រោយករណីដំបូងនៃការចម្លងវីរុសពីមនុស្សម្នាក់ទៅមនុស្សម្នាក់នៅលើទឹកដីអាមេរិក បានបញ្ជាក់កាលពីថ្ងៃព្រហស្បតិ៍ ទី៣០ មករា។ នោះគឺ បុរសម្នាក់នៅទីក្រុងChicago ដែលបានឆ្លងពីប្រពន្ធរបស់គាត់ដែលបានធ្វើដំណើរទៅក្រុងវូហាន ដែលជាកន្លែងផ្ទុះណូវែលកូរ៉ូណាវីរុស ។
ទន្ទឹមនេះ រដ្ឋមន្ត្រីក្រសួងពាណិជ្ជកម្មអាមេរិកលោក Wilbur Ross ក៏បានរងការរិះគន់ផងដែរចំពោះការនិយាយថាវីរុសដែលបានសម្លាប់មនុស្សចំនួន ២៥៩នាក់នៅក្នុងប្រទេសចិនអាចជួយពន្លឿនការវិលត្រឡប់នៃការងារទៅកាន់អាមេរិក។ ត្រង់នេះ លោក Ross បាននិយាយថាវីរុសនេះជារឿងអកុសលបំផុត ក៏ប៉ុន្តែវាក៏ជា «កត្តាហានិភ័យ» សម្រាប់ក្រុមអ្នកជំនួញដែលត្រូវពិចារណា និងថ្លឹងថ្លែងឡើងវិញថាតើត្រូវធ្វើប្រតិបត្តិការបន្តនៅក្នុងប្រទេសចិនឬយ៉ាងណា។
ដោយឡែក រដ្ឋមន្ត្រីក្រសួងការបរទេសសហរដ្ឋអាមេរិកលោក ម៉ៃ ប៉ុមប៉េអូ ក្នុងដំណើរទស្សនកិច្ចទៅកាន់ទីក្រុងឡុងដ៍នៅសប្តាហ៍នេះ បានធ្វើឲ្យក្រុងប៉េកាំងខឹងសម្បារ ដោយហៅគណបក្សបក្សកាន់អំណាចកុម្មុយនីស្តចិនថា«ជាការគំរាមកំហែងស្នូលមួយនៃសម័យកាលរបស់យើង» ៕
Tag:
ចិន
សហរដ្ឋអាមេរិក
កូរ៉ូណាវីរុស
© រក្សាសិទ្ធិដោយ thmeythmey.com
