អ្នកនាំពាក្យ៖ ជនជាតិចិនផ្ទុកវីរុសកូរ៉ូណាមានសុខភាពធម្មតា ខណៈមនុស្ស១០០នាក់ទៀត ពុំទាន់មានរោគសញ្ញា

ជាតិ

សុខភាព

អ្នកនាំពាក្យ៖ ជនជាតិចិនផ្ទុកវីរុសកូរ៉ូណាមានសុខភាពធម្មតា ខណៈមនុស្ស១០០នាក់ទៀត ពុំទាន់មានរោគសញ្ញា

01, Feb 2020 , 4:29 pm

រូបភាព

សកម្មភាពបុរសចិនដែលឆ្លងកូរ៉ូណា និយាយតាមវីដេអូ ដោយទឹកមុខរីករាយ ហើយមើលទៅមានសភាពធម្មតាជាមួយក្រុមគ្រួសារ

ដោយ:

ភ្នំពេញ៖ បុរសជនជាតិចិនដែលផ្ទុកវីរុសកូរ៉ូណានៅខេត្តព្រះសីហនុនោះ បានធូរស្បើយហើយ ប៉ុន្តែមិនទាន់អាចចាកចេញពីបន្ទប់ព្យាបាលបាននៅឡើយទេ។ ដោយឡែកមនុស្ស១០០នាក់ទៀត ដែលកំពុងស្ថិតនៅក្នុងការសង្ស័យលើសុខភាពនោះ ក៏មិនទាន់រោគសញ្ញាដែរ។ នេះជាការបញ្ជាក់របស់លោកវេជ្ជបណ្ឌិត លី សូវ៉ាន់ អ្នកនាំពាក្យក្រសួងសុខាភិបាល។

លោកវេជ្ជបណ្ឌិត លី សូវ៉ាន់ បាននិយាយប្រាប់អ្នកសារព័ត៌មានថ្មីៗតាមទូរសព្ទថា បុរសជនជាតិចិនរូបនោះ អាចនិយាយឆ្លងឆ្លើយ និងដើរហាត់ប្រាណបានធម្មតា ព្រោះគ្មានរោគសញ្ញា ក្អក និងផ្តាសាយទៀតឡើយ នៅថ្ងៃទី១ ខែកុម្ភៈនេះ។ ប៉ុន្តែខាងគ្រូពេទ្យ មិនទាន់អាចឲ្យបុរសរូបនោះចាកចេញពីបន្ទប់ព្យាបាលទៅទីសាធារណៈបានឡើយ លុះត្រាជាសះស្បើយសិន ។

អ្នកនាំពាក្យក្រសួងសុខាភិបាលរូបនេះ បានបញ្ជាក់ថា ក្រសួងសុខាភិបាល មិនទាន់អាចកំណត់ពេលវេលាណា សម្រាប់បុរសជនជាតិចិននោះ ចាកចេញពីប្រទេសកម្ពុជានៅឡើយទេ។ លោកវេជ្ជបណ្ឌិត លី សូវ៉ាន់ និយាយថា៖«យើងមើលគាត់ឲ្យជា តើគ្មានវីរុសកូរ៉ូណាសិន ទើបយើងអាចឲ្យគាត់ចេញបាន។ ក្រសួងសុខាភិបាលគ្រាន់តែមានតួនាទីព្យាបាលគាត់ឲ្យជាតែប៉ុណ្ណោះ ចំពោះគាត់ចង់ទៅណា គឺស្រេចតែគាត់ទេ»។

បុរសជនជាតិចិនរូបនោះតែងតែធ្វើលំហាត់ប្រាណជារៀងរាល់ថ្ងៃ នៅក្នុងបន្ទប់ព្យាបាល ដើម្បីឲ្យសុខភាពល្អរឹងមាំឡើងវិញ។ ក្រុមគ្រូពេទ្យប្រចាំនៅខេត្តព្រះសីហនុ បានណែនាំ និងប្រាប់ឲ្យបុរសជនជាតិចិនរូបនោះមានចិត្តអំណត់អត់ធ្មត់ផងដែរ។ នេះបើតាមលោក លី សូវ៉ាន់។

ដោយឡែកអ្នកប៉ះពាល់ និងអ្នកជិះយន្តហោះជាមួយអ្នកជំងឺជនជាតិចិនរូបនេះ សរុបប្រមាណ ១០០នាក់ទៀត ពុំមានចេញរោគសញ្ញាអ្វីនៅឡើយ គិតមកដល់ពេលនេះ ។មន្ត្រីជំនាញនឹងបន្តតាមដានសុខភាពអ្នកប៉ះពាល់ជាមួយអ្នកជំងឺទាំងអស់ជារៀងរាល់ថ្ងៃ ។ លោក លី សូវ៉ាន់ បញ្ជាក់បន្ថែមបែបនេះ។

ថ្លែងប្រាប់សារព័ត៌មានថ្មីៗ អ្នកនាំពាក្យរូបនេះ បាននិយាយថា៖« ក្នុងចំណោមមនុស្ស៧០នាក់(អ្នករួមដំណើរលើយន្តហោះ)នេះ មានអ្នកខ្លះបានធ្វើដំណើរទៅប្រទេសចិនវិញហើយ ដោយអ្នកខ្លះទៀតកំពុងតែស្ថិតនៅកម្ពុជានៅឡើយ»។ នេះបើតាមការបញ្ជាក់ពីលោក លី សូវ៉ាន់។

គិតត្រឹមថ្ងៃទី១ ខែកុម្ភៈនេះ មានអ្នកស្លាប់ដោយសារជំងឺរលាកសួតបង្កដោយមេរោគកូរ៉ូណាប្រភេទថ្មី (2019-nCoV) ឡើងដល់២៥៩នាក់ហើយ ខណៈដែលអ្នកផ្ទុកវីរុសនោះកើនឡើងជាង១ម៉ឺននាក់ហើយ៕