ជាតិ
និស្សិតជំនាញឱសថសាស្ត្រផលិតទឹកសម្អាតដៃ ដើម្បីការពារជំងឺរលាកសួត«កូរ៉ូណាវីរុស» ទឹកលាងដៃ
× ភ្នំពេញ៖ ពលរដ្ឋកម្ពុជា ជាច្រើននាក់កំពុងព្រួយបារម្ភពីបញ្ហាជំងឺរលាកសួតដែលបង្កឡើងដោយកូរ៉ូណាវីរុស ដោយអ្នកខ្លះពាក់ម៉ាស់និងប្រើទឹកសម្អាតដៃជាដើម ។ ដោយមើលឃើញពីតម្រូវការទីផ្សារ និងទប់ស្កាត់ការឆ្លៀតឱកាសពីអាជីវករមួយចំនួន លើការដំឡើងថ្លៃផលិតផលនេះ ទើបនិស្សិតមកពីសាកលវិទ្យាល័យពុទ្ធិសាស្ត្រនិងសាកលវិទ្យាល័យអន្តរជាតិបានផលិតទឹកសម្អាតដៃ ដើម្បីជួយការពារវីរុសកូរ៉ូណានេះ។
កញ្ញា សុខ គីមហុង ជានិស្សិតផ្នែកឱសថសាស្ត្រនៃសកលវិទ្យាល័យពុទ្ធិសាស្ត្រ បាននិយាយថា នាងនិងសមាជិកក្រុម បានផលិតទឹកសម្អាតដៃការពារមេរោគកូរ៉ូណាវីរុសចំនួន៣៥០ដប ដែលអនុវត្តតាមស្ដង់ដារបស់អង្គការសុខភាពពិភពលោក ក្រោមការផ្តួចផ្ដើមពីសាស្ត្រាចារ្យជំនាញ។
បើតាមកញ្ញា គីមហុង គោលបំណងនៃការផលិតទឹកសម្អាតដៃនេះ ដើម្បីជួយទប់ស្កាត់ការឆ្លងមេរោគកូរ៉ូណាវីរុស។ និស្សិតផ្នែកឱសថសាស្ត្ររូបនេះបានបន្តថា៖«ជំងឺកូរ៉ូណាវីរុស ឆ្លងតាមទឹកមាត់របស់អ្នកផ្ទុកជំងឺកូរ៉ូណា ឬក៏នៅពេលដែលយើងដើរចេញក្រៅភាគច្រើនវាឆ្លងតាមរយៈដៃរបស់យើង។ សម្រាប់ទឹកសម្អាតដៃដែលធ្វើតាមស្ដង់ដាអង្គការសុខភាពពិភពលោកអាចការពារនិងសម្លាប់បាត់តេរីផ្សេងៗបាន។ ទឹកសម្អាតដៃសំខាន់បន្ទាប់ពីម៉ាស់»។
កញ្ញា គីមហុង និងក្រុមនិស្សិតផ្នែកឱសថសាស្ត្រចំនួន២០នាក់ទៀត បានចំណាយរយៈពេល២ថ្ងៃ ដើម្បីផលិតទឹកសម្អាតដៃនេះ ។ «ទឹកសម្អាតដៃទាំង៣៥០ដប ត្រូវបានដាក់ឲ្យប្រើប្រាស់នៅក្នុងសាកលវិទ្យាល័យពុទ្ធិសាស្ត្រ និងចែកជូនដល់សិស្សានុសិស្សនិងប្រជាពលរដ្ឋនៅខេត្តកោះកុង ។ នាពេលខាងមុខសាកលវិទ្យាល័យពុទ្ធិសាស្ត្រក៏មានគម្រោងផលិតទឹកសម្អាតដៃ ដើម្បីលក់ជូនប្រជាពលរដ្ឋក្នុងតម្លៃសមរម្យផងដែរ»។ នេះជាការបញ្ជាក់របស់និស្សិតផ្នែកឱសថសាស្ត្រនៃសកលវិទ្យាល័យពុទ្ធិសាស្ត្ររូបនេះ។
ចំណែកសាកលវិទ្យាល័យអន្តរជាតិក៏បានផលិតទឹកសម្អាតដៃ ដើម្បីជួយការពារជំងឺរលាកសួតថ្មី«កូរ៉ូណាវីរុស»ផងដែរ។ លោក ឡុង ចាន់ស៊ី និងនិស្សិតផ្នែកឱសថសាស្ត្រនៃសាកលវិទ្យាល័យអន្តរជាតិ ១២នាកទៀត បានផលិតទឹកសម្អាតដៃចំនួន១៨ដប ដើម្បីដាក់ឲ្យប្រើប្រាស់ការពារវីរុសប្រភេទថ្មី នៅសាកលវិទ្យាល័យ។
បើតាមនិស្សិតឆ្នាំទី៥រូបនេះបានរៀបរាប់ថា៖ «ទឹកសម្អាតដៃជាវិធីការពារដ៏សំខាន់មួយក្នុងចំណាមវិធីការពារផ្សេងទៀត ពីជំងឺកូរ៉ូណាវីរុស។ ការលាងដៃមិនត្រឹមតែការពារជំងឺកូរ៉ូណាទេ គឺជួយការពារពពួកបាក់តេរីទាំងអស់តែថែមទៀត»។
គួរបញ្ជាក់ថា គិតមកដល់ព្រឹកថ្ងៃទី០១ ខែកុម្ភៈ ឆ្នាំ២០២០ អ្នកស្លាប់ដោយសារមេរោគកូរ៉ូណាប្រភេទថ្មី បានកើនឡើងដល់ជាង២៥៩នាក់ហើយ ខណៈអ្នកផ្ទុកមេរោគនេះ បានកើនឡើងដល់ជាង១ម៉ឺនាក់ នៅក្នុងប្រទេសចិន។ ក្រៅពីប្រទេសចិន មិនមានអ្នកស្លាប់ដោយសារមេរោគនេះឡើយ៕
Tag:
កូរ៉ូណា
ផលិត
ទឹកសម្អាតដៃ
© រក្សាសិទ្ធិដោយ thmeythmey.com