កីឡាអន្តរជាតិ
អន្តរជាតិ
ក្រោយចាញ់ Spurs គ្រូ Man City ថា ជូនពានឲ្យ Liverpool ហើយ
× Pep Guardiola សារភាពថាលែងមានឱកាសប្រជែងយកពានរង្វាន់ Premier League រដូវកាលនេះទៀតហើយ បន្ទាប់ពី Manchester City បរាជ័យក្រោមថ្វីជើង Tottenham Hotspur ក្នុងលទ្ធផល ២-០។ Guardiola ថាលោកប្រគល់ពានលីគកំពូលអង់គ្លេសនេះជូន Liverpool ហើយ។
ក្រុមម្ចាស់ការពារតំណែងជើងឯក Man City មានគម្លាតពិន្ទុតាមពីក្រោយក្រុមហង្សក្រហមដល់ទៅ ២២ពិន្ទុ ក្រោយការប្រកួតសប្តាហ៍ទី២៥ នៅយប់ថ្ងៃទី២ ខែកុម្ភៈបញ្ចប់ទៅត្រឹមខកចិត្ត។ ខ្សែប្រយុទ្ធចំណូលថ្មី Steven Bergwijn និង Son Heung-min ស៊ុតម្នាក់មួយគ្រាប់ដើម្បីជួយក្រុមលោក Jose Mourinho ឈ្នះមេឃខៀវ ២-០។
នេះ ជាការប្រកួតដ៏គួរឲ្យសោកស្តាយសម្រាប់លោក Guardiola បើទោះកូនក្រុមលោកមានឱកាសដើម្បីរកគ្រាប់បាល់យ៉ាងច្រើនក្តី។ ខ្សែការពារ Ilkay Gundogan ទទួលបានការផ្តល់បាល់ពិន័យ១១ម៉ែត្រក្នុងតង់ទី១ ប៉ុន្តែធ្វើមិនបានសម្រេច ក្រោយអ្នកចាំទី Hugo Lloris ជួយសង្គ្រោះបាន។ មិនត្រឹមតែមិនអាចរកគ្រាប់បាន ខ្សែការពារ Oleksandr Zinchenko ក៏ត្រូវអាជ្ញាកណ្តាលជូនកាតក្រហមបណ្តេញចេញ នៅមុនពេលការស៊ុតបាល់បញ្ចូលទីយ៉ាងល្អរបស់ Bergwijn នៅឯកីឡដ្ឋាន Tottenham Hotspur។
ក្រោយបរាជ័យនេះ អ្នកចាត់ការសញ្ជាតិអេស្ប៉ាញមើលឃើញថា Man City គ្មានសង្ឃឹមក្នុងការការពាជើងឯក Premier League ទៀតឡើយ បើទោះនៅសល់ការប្រកួតចំនួន១៣លើកទៀតក្តី។ Guardiola ឈប់ខ្វល់ពីលីគកំពូលអង់គ្ហេស ហើយដាក់គោលដៅខ្ពស់យកពាន Champions League, FA Cup និង EFL Cup វិញ។
Guardiola បានប្រាប់កូនក្រុមក្នុងបន្ទប់ផ្លាស់សម្លៀកបំពាក់ថា៖« ពួកគេ [Liverpool] នៅឆ្ងាយ ដូច្នេះពួកគេមិនបន្ធូដៃទេ ពួកគេមានពិន្ទុកើនឡើងច្រើនៗទៅ តែយើងបានធ្លាក់ចុះពិន្ទុ។ គោលដៅរបស់យើងគឺចង់ឈ្នះការប្រកួតដែលនៅសល់សម្រាប់លេង Champions League រដូវកាលក្រោយប៉ុណ្ណោះ»។
ឆ្លងកាត់ការប្រកួត២៥លើក Man City ទទួលបាន៥១ពិន្ទុ ឈរនៅលេខរៀងទីពីរក្នុងតារាងលីគកំពូលអង់គ្លេស ខណៈក្រុមមិនទាន់ស្គាល់ចាញ់ Liverpool ឈរកំពូលតារាងមាន៧៣ពិន្ទុ។ Leicester City នៅលេខ៣ មាន៤៩ពិន្ទុ ឯលេខ៤ Chelsea រកបាន៤១ពិន្ទុ។ Spurs មាន៣៧ពិន្ទុ ឡើងទៅលេខ៥ ជំនួស Man Utd ដែលធ្លាក់ទៅលេខ៧ មាន៣៥ពិន្ទុ។ West Ham United, Watford និង Norwich City ស្ថិតនៅតំបន់ត្រូវកាត់ចោល៕
Tag:
Premier League
Pep Guardiola
© រក្សាសិទ្ធិដោយ thmeythmey.com