ទោះមានការស្នើសុំ ឬការព្រមានពីរដ្ឋាភិបាល តែការលក់ម៉ាស់ដោយដំឡើងថ្លៃហួសហេតុ នៅតែបន្តកើតមានដដែល។ ហេតុដូច្នេះ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានសេចក្តីប្រកាសព័ត៌មានមួយ ដោយអំពាវនាវម្តងទៀត ឲ្យគ្រប់ឱសថស្ថាន លក់ម៉ាស់ក្នុងតម្លៃសមរម្យ ដើម្បីឲ្យប្រជាពលរដ្ឋ មានលទ្ធភាពទិញពាក់ការពារពីមេរោគកូរ៉ូណាប្រភេទថ្មី។
ភ្ជាប់ជាមួយនឹងការអំពាវនាវ លោក ម៉ម ប៊ុនហេង ក៏បានព្រមានផងដែរ។ តាមរយៈសេចក្តីប្រកាសព័ត៌មានដែលចេញនៅថ្ងៃទី៤ ខែកុម្ភៈ ឆ្នាំ២០២០ លោករដ្ឋមន្ត្រី សង្កត់ធ្ងន់ថា៖«ក្នុងករណីក្រសួងសុខាភិបាល ស្រាវជ្រាវរកឃើញថា លោក លោកស្រី ជាម្ចាស់ឱសថស្ថាន ឱសថស្ថានរង ឱសថការីទទួលបន្ទុកបច្ចេកទេសតាមឱសថស្ថាន ឱសថស្ថានរងណា មិនអនុវត្តតាមការណែនាំនេះ ក្រសួងសុខាភិបាល នឹងមានវិធានការតឹងរ៉ឹងទៅតាមផ្លូវច្បាប់ ដែលមានជាធរមាន»។
បន្ថែមពីលើសេចក្តីប្រកាសប្រព័ត៌មានរបស់លោករដ្ឋមន្ត្រី លោក លី សូវ៉ាន់ អ្នកនាំពាក្យក្រសួងសុខាភិបាល លើកឡើងថា វិធានការដែលក្រសួងចេញនេះ ក៏ដូចជាច្បាប់មួយដែរ ដែលតម្រូវឲ្យឱសថស្ថានអនុវត្ត។ លោក ប្រាប់សារព័ត៌មានថ្មីៗ តាមទូរស័ព្ទនៅព្រឹកថ្ងៃទី៥ ខែកុម្ភៈ ថា បើឱសថស្ថានណា មិនអនុត្តតាម ឬក៏ធ្វើខុសច្បាប់ ក្រសួងនឹងពិនិត្យពី «ការដាក់ពិន័យ» ឬក៏អាចឈានទៅដល់ «ការដកអាជ្ញាប័ណ្ណ» ជាដើម។
យ៉ាងណា មកដល់ពេលនេះ លោក មិនទាន់បានទទួលព័ត៌មាននោះទេថា អាជ្ញាធរ រកឃើញឱសថស្ថានលក់ម៉ាស់ថ្លៃ ឬមិនទាន់រកឃើញ។
កន្លងមក លោក ផៃ ស៊ីផាន អ្នកនាំពាក្យរដ្ឋាភិបាល ប្រាប់ប្រជាពលរដ្ឋ ឲ្យកត់អាសយដ្ឋាន លេខទូរស័ព្ទ និង ឈ្មោះរបស់ឱសថស្ថានណា ដែលលក់ម៉ាស់ថ្ងៃ ហើយផ្ញើទៅលោកតាមហ្វេសប៊ុក។ លោក អះអាងថា បើទទួលបានព័ត៌មានពីប្រជាពលរដ្ឋ លោក នឹងស្នើឲ្យក្រសួងសុខាភិបាល ចុះទៅពិនិត្យឱសថស្ថាននោះ ដើម្បីចាត់វិធានការ។ សម្តេចនាយករដ្ឋមន្ត្រី ហ៊ុន សែន ក៏ធ្លាប់ស្នើដល់អ្នកលក់ម៉ាស់ កុំឲ្យដំឡើងថ្លៃម៉ាស់ដែរ។
ក្រោយមេរោគកូរ៉ូណាប្រភេទថ្មី រាលដាលកាន់តែខ្លាំង ចេញពីទីក្រុងវូហាន ខេត្តហូប៉ី ប្រទេសចិន ទៅដល់តំបន់នានា និងប្រទេសដទៃ ដោយរួមទាំងកម្ពុជា មាន១ករណីដែរនោះ ប្រជាពលរដ្ឋកម្ពុជា បានចាប់ផ្តើមនាំគ្នាពាក់ម៉ាស់ ដើម្បី។ តាមបណ្តាគ្រឹះស្ថានអប់រំ ត្រូវបានណែនាំឲ្យសិស្សពាក់ម៉ាស់ ហើយគ្រឹះស្ថានអប់រំខ្លះទៀត ថែមទាំងតម្រូវឲ្យសិស្សលាងដៃទៀតផង មុននឹងចូលរៀន។
ក្រៅពីពាក់ម៉ាស់ និងលាងសម្លាតដៃ ក្រសួងសុខាភិបាល បានណែនាំឲ្យប្រជាពលរដ្ឋ អនុវត្តវិមានការមួយចំនួនទៀត ដូចជា ត្រូវពិសាអាហារឆ្អិនជានិច្ច មិនត្រូវចូលក្នុងកន្លែងចិញ្ចឹមសត្វឬប៉ះពាល់សត្វ បើគ្មានភារកិច្ច និង ត្រូវនៅឲ្យឆ្ងាយប្រមាណ២ម៉ែត្រពីអ្នកក្អក។ បើមានរោគសញ្ញាផ្សេងៗ ដូចជា ផ្តាសាយ ក្អក ឈឺក ហៀរសំបោរ និង ក្តៅខ្លួនខុសធម្មតា ប្រជាពលរដ្ឋ ត្រូវប្រញាប់ទៅមណ្ឌលសុខភាព ឬហៅទៅកាន់លេខ១១៥ ដើម្បីសួរព័ត៌មានឲ្យបានច្បាស់។
គិតត្រឹមព្រឹកថ្ងៃទី៥ ខែកុម្ភៈ មេរោគកូរ៉ូណាប្រភេទថ្មី បានសម្លាប់ជនជាតិចិនជិត៥រយនាក់ហើយ ក្នុងនោះ ស្លាប់នៅចិនស្ទើរទាំងអស់ ដោយមាននៅហុងកុងតែម្នាក់ និង នៅហ្វីលីពីនម្នាក់ប៉ុណ្ណោះ។ ចំណែក អ្នកដែលផ្ទុកមេរោគនេះ បានកើនឡើងជាង២ម៉ឺននាក់ ដោយភាគច្រើនបំផុត គឺនៅប្រទេសចិន៕