ចិនបើកការស៊ើបអង្កេត ក្រោយមរណភាពគ្រូពេទ្យដែលប្រកាសអាសន្នពីកូរ៉ូណាវីរុស

អន្តរជាតិ

ចិនបើកការស៊ើបអង្កេត ក្រោយមរណភាពគ្រូពេទ្យដែលប្រកាសអាសន្នពីកូរ៉ូណាវីរុស

07, Feb 2020 , 2:54 pm

រូបភាព

ដោយ: តន ចាន់រិទ្ធារ៉ា

គណៈកម្មការប្រឆាំងអំពើពុករលួយរបស់ចិន នៅថ្ងៃទី៧ ខែកុម្ភៈ បានប្រកាសបើកការស៊ើបអង្កេតមួយពាក់ព័ន្ធការផ្ទុះកូរ៉ូណាវីរុស បន្ទាប់ពីគ្រូពេទ្យម្នាក់ដែលព្យាយាមបញ្ចេញព័ត៌មាននេះ បានបាត់បង់ជីវិត។ មរណភាពរបស់គ្រូពេទ្យ Li Wenliang ធ្វើឲ្យរដ្ឋាភិបាលចិនរងការរិះគន់យ៉ាងខ្លាំង ខណៈលោក Li ក៏រងពិន័យទៅទៀតដោយសារតែការលាតត្រដាងព័ត៌មានផ្ទុះឡើងវីរុសនេះ ដោយអាជ្ញាធរក្រុងវូហានចាត់ទុកជារឿងមិនពិត។

លោក Li Wenliang ជាវេជ្ជបណ្ឌិតម្នាក់របស់ចិន ដែលបានប្រកាសប្រាប់សាធារណជនពីការរាលដាលនៃជំងឺរលាកសួតបង្កដោយមេរោគកូរ៉ូណាប្រភេទថ្មី (2019-nCoV) កាលពីចុងខែធ្នូ ឆ្នាំ២០១៩ ។ លោក Li បានអះអាងថា មេរោគផ្លូវដង្ហើមដែលមានលក្ខណៈស្រដៀងសារនេះ កំពុងទាញយកជីវិតលោក ហើយបានប្រាប់មិត្តភក្តិក្នុង Group WeChat ថា អ្នកជំងឺ៧នាក់មកពីផ្សារលក់គ្រឿងសមុទ្រនៅវូហាន ក៏មានជំងឺនេះដែរ។

អត្ថបទទាក់ទង

លោក Li Wenliang វេជ្ជបណ្ឌិតដំបូងដែលប្រកាសអាសន្នពីជំងឺកូរ៉ូណាវីរុស បានស្លាប់ហើយ

យ៉ាងណាមិញ លោក Li និងមនុស្សមួយចំនួនទៀតត្រូវបានប៉ូលិសចាប់ខ្លួន ដោយចោទប្រកាន់ថា លោកបានបង្កើតពាក្យចចាមអារ៉ាម ដែលធ្វើឲ្យមានភាពចលាចល។ មកដល់ថ្ងៃទី១២ ខែមករា លោក Li ត្រូវបានបញ្ជូនទៅមន្ទីរពេទ្យ ហើយបានរកឃើញវត្តមានមេរោគកូរ៉ូណាវីរុសនៅថ្ងៃទី១ ខែកុម្ភៈ។ លោកបានទទួលមរណភាពហើយក្នុងអាយុ៣៤ឆ្នាំ ដោយសារជំងឺនេះ នៅវេលាម៉ោង២ និង៥៨នាទី ឈានចូលថ្ងៃទី៧ ខែកុម្ភតែម្ដង។

នៅថ្ងៃទី៧ ខែកុម្ភៈដដែល គណៈកម្មការត្រួតពិនិត្យរបស់ចិន បានប្រកាសថា ខ្លួននឹងបញ្ជូនមនុស្សរបស់ខ្លួនមួយក្រុមទៅកាន់ទីក្រុងវូហាន ដើម្បីស៊ើបអង្កេតឲ្យបានគ្រប់ជ្រុងជ្រោយលើបញ្ហាពាក់ព័ន្ធលោក Li ។ នេះបើតាមការផ្សាយរបស់ទីភ្នាក់ងារព័ត៌មាន AFP ។

ការស្លាប់របស់គ្រូពេទ្យផ្នែកជំងឺចក្ខុរូបនេះ ធ្វើឲ្យមានការផ្ទុះកំហឹងពីសំណាក់ប្រជាជនចិន ក៏ដូចជាការអាណិតអាសូរផងដែរ ខណៈកូរ៉ូណាវីរុសនេះ សម្លាប់មនុស្សជាង៦៣០នាក់ និងជាងបីម៉ឺននាក់ទៀតឆ្លងមេរោគ។ ចំណុចដែលនាំឲ្យមានការខឹងសម្បារនោះ គឺបើអាជ្ញាធរទទួលយកការព្រមានរបស់គ្រូពេទ្យ Li ហើយមានការចាត់វិធានការបន្ទាប់ទប់ស្កាត់ និងគ្រប់គ្រងភា្លមៗ ករណីឆ្លងក៏មិនរាលដាលខ្លាំងដូចពេលបច្ចុប្បន្នដែរ។

យ៉ាងណាមិញ ទីក្រុងប៉េកាំង នៅតែអះអាងពីសមត្ថភាពរបស់ខ្លួនក្នុងការគ្រប់គ្រងការរាលដាលកូរ៉ូណាវីរុស ដែលបច្ចុប្បន្នបានឆ្លងដល់ប្រទេសជាង២០ទៅហើយនោះ។ ប្រទេសជាច្រើន ដែលបារម្ភពីគ្រោះថ្នាក់លើប្រជាជនខ្លួន បានបញ្ជូនយន្តហោះជាបន្តបន្ទាប់ទៅដឹកពលរដ្ឋខ្លួនចេញពីទីក្រុងវូហាន ខេត្តហ៊ូប៉ី ខណៈខ្លះទៀតបិទជើងហោះហើរទៅមកទឹកដីចិន ឬក៏មិនទទួលអ្នកដំណើរដែលហោះពីចិនទៅទៀត៕