កូរ៉ូណាវីរុស៖ លោក លី សៀនឡុង ថា សិង្ហបុរីមិនទាន់ឈានដល់ស្ថានភាពទិញស្បៀងទុកឡើយ

សង្គមអន្តរជាតិ

អន្តរជាតិ

កូរ៉ូណាវីរុស៖ លោក លី សៀនឡុង ថា សិង្ហបុរីមិនទាន់ឈានដល់ស្ថានភាពទិញស្បៀងទុកឡើយ

09, Feb 2020 , 10:28 am

រូបភាព

នាយករដ្ឋមន្រ្តីសិង្ហបុរី លី សៀនឡុង ថ្លែងសារទៅកាន់ប្រជាជន។ រូបភាពកាត់ពីវីដេអូបង្ហោះលើហ្វេសប៊ុក Lee Hsien Loong

ដោយ: តន ចាន់រិទ្ធារ៉ា

នាយករដ្ឋមន្ត្រីសិង្ហបុរី លោក លី សៀនឡុង នៅថ្ងៃទី៨ ខែកុម្ភៈ បានអំពាវនាវឲ្យប្រជាជនសិង្ហបុរីរក្សាភាពស្ងៀមស្ងាត់ និងកុំចលាចលជុំវិញការរាលដាលកូរ៉ូណាវីរុស។ ការអំពាវនាវនេះធ្វើឡើង បន្ទាប់ពីអាជ្ញាធរសិង្ហបុរីដំឡើងកម្រិតអាសន្នដើម្បីឆ្លើយតបនឹងវីរុសប្រភេទថ្មីនេះ ដែលធ្វើឲ្យប្រជាជនសិង្ហបុរីនាំគ្នាទៅទិញសម្ភារចាំបាច់ទុករៀងៗខ្លួន។ បច្ចុប្បន្ននេះ ការឆ្លងមេរោគកូរ៉ូណាវីរុសនៅសិង្ហបុរីបានឡើងដល់៤០ករណីហើយ។

តាមរយៈសារជាវីដេអូមួយ លោកនាយករដ្ឋមន្ត្រីសិង្ហបុរី លី សៀនឡុង ប្រាប់ប្រជាជនសិង្ហបុរីឲ្យសម្រួលអារម្មណ៍ពួកគេប្រឈមមុខនឹងការរាលដាលកូរ៉ូណាវីរុស ព្រោះស្ថានការណ៍នៅសិង្ហបុរីមិនទាន់ដល់ថ្នាក់ត្រូវឲ្យប្រជាជនទិញស្បៀងទុកឡើយ។ លោក លី បានស្នើឲ្យប្រជាជនទាំងអស់ មានកម្លាំងចិត្ត និងរួមគ្នាពុះពារបញ្ហាមួយនេះ។

សិង្ហបុរី ជាប្រទេសមួយដែលមានករណីឆ្លងកូរ៉ូណាវីរុសនេះដែរ។ ដោយសារតែការវិវត្តលឿនពេករបស់វីរុស អាជ្ញាធរសិង្ហបុរី នៅថ្ងៃទី៧ ខែកុម្ភៈ ក៏ដំឡើងកម្រិតឆ្លើយតបជំងឺឆ្លងរបស់ខ្លួនដល់ពណ៌ទឹកក្រូច ដែលជាកម្រិតខ្ពស់មួយ តែមិនមែនខ្ពស់បំផុតឡើយ។ កម្រិតអាសន្នពណ៌ទឹកក្រូចនេះ ត្រូវបានប្រកាសកាលពីការរាលដាលជំងឺ SARS និងផ្ដាសាយបក្សីផងដែរ។ ក៏ព្រោះហេតុនេះ ប្រជាជនសិង្ហបុរីដែលកំពុងបារម្ភក្នុងចិត្ត នាំគ្នាទៅទិញសម្ភារចាំបាច់ គ្រឿងហូបចុក មី និងក្រដាសអនាម័យ។

«មិនមានការចាំបាច់ត្រូវស្លន់ស្លោរឡើយ។ យើងមិនបានបិទទីក្រុង ឬឲ្យប្រជាជននៅក្នុងផ្ទះឡើយ។ យើងមានការផ្គត់ផ្គង់គ្រប់គ្រាន់ ដូចនេះមិនចាំបាច់ត្រូវទិញមី អាហារកំប៉ុង ក្រដាសអនាម័យទុកដូចដែលពលរដ្ឋខ្លះបានធ្វើឡើយ។» នេះជាការអំពាវនាវរបស់លោក លី ក្នុងវីដេអូជាភាសាអង់គ្លេសនៅថ្ងៃទី៨ ខែកុម្ភៈ។ លោកបន្តថា បើស្ថានការណ៍ប្រែប្រួល សិង្ហបុរីនឹងផ្លាស់ប្ដូរយុទ្ធសាស្ត្ររបស់ខ្លួនដើម្បីឆ្លើយតបឲ្យទាន់ពេល។

ជាមួយនឹងការកោតសរសើរវិធានការរបស់រដ្ឋាភិបាល និងការចូលរួមរបស់វិស័យឯកជនផងនោះ លោក លី ក៏ស្នើសុំការចូលរួមពីប្រជាជនដែរ។ រក្សាអនាម័យផ្ទាល់ខ្លួន វាស់កម្ដៅពីរដងក្នុងមួយថ្ងៃ បើមានអាការៈមិនស្រួលខ្លួនត្រូវទៅពេទ្យ ហើយចៀសវាងកន្លែងកកកុញ ជាអ្វីដែនាយករដ្ឋមន្ត្រីសិង្ហបុរីរូបនេះចង់បានពីប្រជាជនរបស់លោក ព្រោះវាមិនត្រូវការកម្លាំងកាយអ្វីច្រើនដើម្បីធ្វើ ហើយបើអាចធ្វើបានទាំងអស់គ្នា នឹងជួយការទប់ស្កាត់ការរាលដាលកូរ៉ូណាវីរុសមិនខាន។

សូមបញ្ជាក់ថា ប៉ុន្មានម៉ោងក្រោយការចេញសាររបស់លោក លី សិង្ហបុរីក៏បញ្ជាក់ពីការរកឃើញករណីឆ្លងកូរ៉ូណាវីរុសចំនួន៧ទៀត ដែលធ្វើឲ្យករណីឆ្លងសរុបនៅប្រទេសនេះមានចំនួន៤០ ។ បើតាមការប្រកាសរបស់ក្រសួងសុខាភិបាលសិង្ហបុរី ក្នុងចំណោមករណីឆ្លងទាំង៤០ មានបួនករណីស្ថិតក្នុងសភាពធ្ងន់ធ្ងរ ដោយម្នាក់ត្រូវបំពាក់ឧបករណ៍ជំនួយការដកដង្ហើម។ មនុស្សពីរនាក់ ត្រូវបានព្យាបាល ហើយចាកចេញពីមន្ទីរពេទ្យ ខណៈអ្នកនៅសល់មានសុខភាពល្អប្រសើរ៕