ហត្ថាកសិករ លីមីតធីត បានរៀបចំមហាសន្និបាតប្រចាំឆ្នាំលើកទី២៣ ក្រោមប្រធានបទ«ឌីជីថលនីយកម្ម»

អត្ថបទពាណិជ្ជកម្ម

ហត្ថាកសិករ លីមីតធីត បានរៀបចំមហាសន្និបាតប្រចាំឆ្នាំលើកទី២៣ ក្រោមប្រធានបទ«ឌីជីថលនីយកម្ម»

10, Feb 2020 , 11:27 am

រូបភាព

ដោយ: ថ្មីៗ

ខេត្តសៀមរាប ថ្ងៃសុក្រ ទី៧ ខែកុម្ភៈ ឆ្នាំ២០២០៖ ហត្ថាកសិករ លីមីតធីត ដែលគេស្គាល់ថាជាគ្រឹះស្ថានមីក្រូហិរញ្ញវត្ថុដ៏ធំមួយក្នុងប្រទេសកម្ពុជា បានរៀបចំមហាសន្និបាតប្រចាំឆ្នាំ លើកទី២៣ ក្រោមប្រធានបទ “ឌីជីថលនីយកម្ម” ដែលប្រព្រឹត្តទៅនៅថ្ងៃទី៧ ខែកុម្ភៈ ឆ្នាំ២០២០ ក្នុងខេត្តសៀមរាប។ មហាសន្និបាតនេះ មានការអញ្ជើញចូលរួមពីតំណាងភាហ៊ុនិក ប្រធានក្រុមប្រឹក្សាភិបាល សមាជិកក្រុមប្រឹក្សាភិបាល ថ្នាក់ដឹកនាំជាន់ខ្ពស់ ថ្នាក់គ្រប់គ្រង និងបុគ្គលិកសរុបប្រមាណ ៤០០នាក់។

មហាសន្និបាតប្រចាំឆ្នាំ ត្រូវបានប្រារព្ធឡើងក្នុងគោលបំណង អបអរសាទរសមិទ្ធផលដែលសម្រេចបានក្នុងឆ្នាំ២០១៩ និងបង្ហាញពីផែនការយុទ្ធសាស្ត្រ គោលដៅ ព្រមទាំងផែនការសម្រាប់ឆ្នាំ២០២០។ បន្ថែមពីលើនេះទៀត កម្មវិធីប្រចាំឆ្នាំនេះ ក៏មានគោលបំណងក្នុងការថ្លែងអំណរគុណដល់បុគ្គលិកទាំងអស់ ដែលបានខិតខំប្រឹងប្រែងក្នុងការបំពេញការងារដើម្បីនាំភាពរីកចម្រើន និងជោគជ័យដល់ហត្ថាកសិករ ព្រមទាំងផ្សារភ្ជាប់ការតាំងចិត្ត ក្នុងការសម្រេចផែនការសម្រាប់ឆ្នាំថ្មី និងការបង្កើតឲ្យមានការជួបជុំ រវាងបុគ្គលិកគ្រប់ការិយាល័យសាខា ដើម្បីបង្កើតទំនាក់ទំនងល្អ និងភាពសប្បាយរីករាយ។

លោក ហួត អៀងតុង ប្រធានអគ្គនាយក ហត្ថាកសិករ លីមីតធីត បានមានប្រសាសន៍ថាឆ្នាំ២០១៩ គឺជាឆ្នាំប្រកបដោយភាពជោគជ័យបំផុត សម្រាប់ហត្ថាកសិករទាំងមូល ដោយសមតុល្យប្រាក់បញ្ញើសន្សំ ផលប័ត្រឥណទាន និងប្រាក់ចំណូលសរុបប្រចាំឆ្នាំ សម្រេចបានលើសផែនការដែលបានកំណត់។ លោកបានបន្ថែមថា ៖«សម្រាប់ឆ្នាំ២០២០នេះ ហត្ថាកសិករ នឹងប្រែមុខមាត់ថ្មីដែលថ្នាក់គ្រប់គ្រងគ្រប់ជាន់ថ្នាក់ និងបុគ្គលិកទាំងអស់ ចាំបាច់ត្រូវត្រៀមខ្លួនរួចជាស្រេច ក្នុងការចាប់យកចំណេះជំនាញបន្ថែម ទាក់ទងនឹងបច្ចេកវិទ្យាថ្មីៗ ដើម្បីបំពេញនូវតម្រូវការ និងបម្រើដល់អតិថិជនប្រកបដោយប្រសិទ្ធភាពខ្ពស់»។

នាឱកាសនេះដែរ លោកបានបង្ហាញនូវសមិទ្ធផលដែលសម្រេចបាន គិតត្រឹមខែធ្នូ ឆ្នាំ២០១៩ ដែលរួមមានផលប័ត្រឥណទានសម្រេចបាន ១,០៥១ពាន់លានដុល្លារអាមេរិក សមតុល្យប្រាក់បញ្ញើសន្សំ សរុបចំនួន ៥៩៩លានដុល្លារអាមេរិក ប្រាក់ចំណេញសុទ្ធ ២៨.៩០លានដុល្លារអាមេរិក ហើយជាពិសេសនោះ គឺផលប័ត្រឥណទាន ស្ថិតក្នុងកម្រិតហានិភ័យ មានអត្រាទាបត្រឹមតែ០.៣៧% ប៉ុណ្ណោះ។

លោក Dan Harsono ប្រធានក្រុមប្រឹក្សាភិបាល ហត្ថាកសិករ លីមីតធីត បានមានប្រសាសន៍ថា៖«ខ្ញុំសូមថ្លែងអំណរគុណយ៉ាងជ្រាលជ្រៅបំផុត ដល់គណៈគ្រប់គ្រង និងបុគ្គលិកហត្ថាកសិករទាំងអស់ ដែលបានខិតខំប្រឹងប្រែងបំពេញការងារ ដើម្បីសម្រេចបានសមិទ្ធផលដ៏ល្អ ក្នុងឆ្នាំ ២០១៩»។ លោកបន្តថា៖«រយៈពេលជាង ៣ឆ្នាំមកហើយ ដែលខ្ញុំបានធ្វើការជាមួយ ហត្ថាកសិករ លីមីតធីត ហើយខ្ញុំនៅតែមានសុទិដ្ឋិនិយមខ្ពស់ ចំពោះហត្ថាកសិករ ដែលសម្បូរទៅដោយថ្នាក់គ្រប់គ្រង និងបុគ្គលិកឆ្នើម មានទេពកោសល្យ និងមានសមត្ថភាពខ្ពស់។ ដូច្នេះខ្ញុំជឿជាក់យ៉ាងមុតមាំថា ហត្ថាកសិករ នឹងទទួលបានសមិទ្ធផលកាន់តែល្អថែមទៀត ក្នុងឆ្នាំ២០២០នេះ»។

លោក Dan Harsono គូសបញ្ជាក់បន្ថែមថា គោលដៅចម្បងដែលធនាគារក្រុងស្រ៊ី ចូលរួមជាមួយ ហត្ថាកសិករ គឺក្នុងគោលបំណងអភិវឌ្ឍសេដ្ឋកិច្ចប្រទេសកម្ពុជា និងធ្វើឲ្យហត្ថាកសិករ លីមីតធីត ក្លាយជាធនាគាពាណិជ្ជ ដែលឈានមុខគេនៅក្នុងប្រទេសកម្ពុជាក្នុងពេលខាងមុខនេះ។

លោក Seiichiro Akita ប្រធានអគ្គនាយក ធនាគារក្រុងស្រ៊ីនៃព្រះរាជាណាចក្រថៃឡង់ដ៍ ដែលជាក្រុមហ៊ុនអាណាព្យាបាលរបស់ ហត្ថាកសិករ លីមីតធីត បានបង្ហាញពីអារម្មណ៍សប្បាយរីករាយ ដែលបានចូលរួមក្នុងកម្មវិធីនេះ ព្រមទាំងកោតសរសើរដល់ក្រុមប្រឹក្សាភិបាល និងថ្នាក់គ្រប់គ្រងរបស់ហត្ថាកសិករ ដែលបានដឹកនាំហត្ថកសិករឲ្យទទួលបានសមិទ្ធផលដ៏ត្រចះត្រចង់។ លោកបានមានប្រសាសន៍ថា៖«ខ្ញុំសូមអរគុណដល់សមាជិកក្រុមប្រឹក្សាភិបាលទាំងអស់ ជាពិសេសលោកឧកញ៉ា ហួត អៀងតុង ដែលបានដឹកនាំហត្ថាកសិករ លីមីតធីត ឲ្យទទួលបានការរីកចម្រើនដូចសព្វថ្ងៃនេះ។ សមិទ្ធផលដ៏ល្អអស្ចារ្យនេះ គឺពិតណាស់កើតឡើងពីការចូលរួម ការខិតខំប្រឹងប្រែង និងការបេ្តជ្ញាចិត្តរបស់អ្នកទាំងអស់គ្នា»។

បើតាមលោក Seiichiro Akita ធនានារMUFG ដែលជាធនាគារធំជាងគេនៅប្រទេសជប៉ុន និងធនាគារក្រុងស្រ៊ីនៃព្រះរាជាណាចក្រថៃឡង់ដ៍ មានចក្ខុវិស័យវែងឆ្ងាយ និងការតាំងចិត្តខ្អស់ ក្នុងការចូលរួមអភិវឌ្ឍ ប្រទេសCLMV ដែលរួមមានប្រទេសកម្ពុជា ប្រទេសឡាវ ប្រទេសភូមា និងប្រទេសវៀតណាម ជាពិសេសគឺប្រទេសកម្ពុជា និងប្រទេសផ្សេងៗទៀត នៅតំបន់អាស៊ីអាគ្នេយ៍។ លោក Seiichiro Akita បន្តដោយជឿជាក់ថា ហត្ថាកសិករ នឹងក្លាយជាគ្រឹះស្ថានហិរញ្ញវត្ថុមួយ ដែលរឹងមាំជាងគេនៅក្នុងប្រទេសកម្ពុជា ជាមួយគ្នានឹងកេរ្តិ៍ឈ្មោះដ៏ល្បីល្បាញ របស់ធនាគារក្រុងស្រ៊ី និងMUFG។ លោកបានបន្ថែមថា៖«កម្មវិធីថ្ងៃនេះ ផ្តោតសំខាន់ទៅលើ ឌីជីថលនីយកម្ម ដែលជាផ្នែកមួយដ៏សំខាន់ សម្រាប់គ្រប់វិស័យនាពេលបច្ចុប្បន្ន ហើយយើងគ្រប់គ្នា ចាំបាច់ត្រូវអភិវឌ្ឍផែ្នកឌីជីថលដើម្បីថែរក្សា និងបន្តនូវគុណភាពសេវាកម្ម ឲ្យកាន់តែល្អប្រសើរជូនដល់ដល់អតិថិជន។ ខ្ញុំពិតជាជឿជាក់ថា ហត្ថាកសិករអាចជម្នះ និងបន្តដំណើរទៅមុខ ប្រកបដោយភាពជោគជ័យកាន់តែខ្លាំងថែមទៀត»។

ហត្ថាកសិករ លីមីតធីត មានបទពិសោធន៍ជាង២៦ឆ្នាំ ក្នុងការផ្តល់សេវាហិរញ្ញវត្ថុក្នុងប្រទេសកម្ពុជា។ បច្ចុប្បន្ននេះ ហត្ថាកសិករ លីមីតធីត មានការិយាល័យសាខាចំនួន ១៧៧ ដើម្បីបម្រើសេវាឥណទាន សេវាប្រាក់បញ្ញើសន្សំ សេវាផ្ទេរប្រាក់ក្នុងស្រុក សេវាបើកប្រាក់បៀរវត្ស និងសេវាធនាគារចល័តជូនអតិថិជន ព្រមទាំងមានទូអេធីអឹមចំនួន ១៣៧ នៅទូទាំង ២៥ ខេត្ត/ក្រុង ក្នុងព្រះរាជាណាចក្រកម្ពុជា។ ហត្ថាកសិករ លីមីតធីត គឺជាបុត្រសម្ព័ន្ធធនាគារក្រុងស្រ៊ី (Krungsri) ដែលជាធនាគារ ពាណិជ្ជធំបំផុតលំដាប់ទី៥ នៃព្រះរាជាណាចក្រថៃឡង់ដ៏ និងជាសមាជិករបស់ MUFG ដែលជាសម្ព័ន្ធធនាគារ ធំជាងគេនៅប្រទេសជប៉ុន និងជាសម្ព័ន្ធហិរញ្ញវត្ថុធំបំផុតមួយនៅក្នុងពិភពលោក៕