អន្តរជាតិ
អាជីវករថៃ៤នាក់ ត្រូវបានចាប់ខ្លួនក្រោយលក់ម៉ាស់លើសថៃ្លកំណត់ ប្រភពរូប៖ Phulet News
× អាជីវករថៃចំនួន៤នាក់ ត្រូវបានអាជ្ញាធរចាប់ខ្លួនសម្រាប់ការលក់ម៉ាស់លើសថ្លៃដែលបានកំណត់ដោយគណៈកម្មាធិការកណ្ដាលសម្រាប់តម្លៃនៃសេវាកម្មនិងទំនិញថៃ។ ការដំឡើងថ្លៃបែបនេះ ធ្វើឡើងខណៈពលរដ្ឋភ័យបារម្ភពីករណីឆ្លងកូរ៉ូណាវីរុស ដែលផ្ទុះឡើងដំបូងក្នុងក្រុងវូហាន ខេត្ត ហូប៉ី ប្រទេសចិន។
លេខាធិការអចិន្ត្រៃយន៍នៃក្រសួងពាណិជ្ជកម្មថៃ Boonyarit Kanlayanamit បានបញ្ជាក់នៅថ្ងៃចន្ទ ទី១០ ខែកុម្ភៈ ថា ការចុះត្រួតពិនិត្យទីផ្សារ បានធ្វើឡើងនៅក្រៅទីក្រុង បាងកក ក្នុងខេត្តចំនួន ៧៦ ពីសំណាក់មន្ទីរពាណិជ្ជកម្មខេត្ត ហើយគិតមកត្រឹមថ្ងៃទី៩ ខែកុម្ភៈ សមត្ថកិច្ចបានចាប់ខ្លួនអាជីវករចំនួន ៤ នាក់ដែលបំពានគោលការណ៍លក់ម៉ាស់។
«មនុស្ស ២នាក់ គឺស្ថិតក្នុងខេត្ត Phuket ម្នាក់នៅខេត្ត Chonburi និងម្នាក់ទៀត គឺនៅ Surat Thani»។ លោក Boonyarit អះអាងបែបនេះ ដោយបន្ថែមទៀតថា ពួកគេ ក្រោយមក ត្រូវបានបញ្ជូនទៅឲ្យប៉ូលិស ហើយបានជាប់ចោទពីបទល្មើសនឹងច្បាប់តម្លៃសេវាកម្មនិងទំនិញថៃ។ តាមការចុះផ្សាយរបស់សារព័ត៌មានថៃ The Nation លោក សង្កត់ធ្ងន់ថា ក្រោមច្បាប់នេះ ពួកគេ ប្រឈមនឹងការបង់ពិន័យជាប្រាក់ ជាង ៤៤០០ ដុល្លារ ឬជាប់ពន្ធនាគាររហូតដល់ ៧ ឆ្នាំ ឬទាំងពីរ។
ជាមួយគ្នានេះដែរ លោកលេខាធិការអចិន្ត្រៃយ៍រូបនេះ បានបន្ថែមទៀតថា មន្ត្រីមន្ទីរពាណិជ្ជកម្មខេត្ត ក៏បានចេញសេចក្តីណែនាំដល់អាជីវករលក់ម៉ាស់នានាឲ្យគោរពតឹងរ៉ឹងចំពោះគោលការណ៍នៃច្បាប់តម្លៃនៃសេវាកម្មនិងទំនិញថៃ ដែលរួមមាន កុំដំឡើងតម្លៃដោយគ្មានមូលហេតុសមរម្យ និងកុំប្រមូលទំនិញដាក់ស្តុកច្រើន នៅពេលតម្រូវការខ្ពស់ ក៏ដូចជាការបញ្ជាក់តម្លៃឲ្យច្បាស់ៗលើធ្នើរដាក់លក់ទំនិញផងដែរ។
តាមសារព័ត៌មាន The Nation លោក បន្តទៀតថា មន្ត្រីជំនាញ នឹងចុះទៅត្រួតពិនិត្យទីផ្សារតាមខេត្តរបស់ពួកគេរៀងៗខ្លួន ជារៀងរាល់ថ្ងៃ ហើយកំពុងតាមដានតម្លៃម៉ាស់ ទឹកលាងដៃ និងសម្ភារវេជ្ជសាស្ត្រផ្សេងៗទៀតយ៉ាងដិតដល់បំផុត។ លោក សង្កត់ធ្ងន់ថា នេះជាការដាក់បញ្ជាដោយផ្ទាល់ពីសំណាក់លោកនាយករដ្ឋមន្ត្រីថៃ ប្រាយុទ្ធ ចន្ទអូចា និងរដ្ឋមន្ត្រីពាណិជ្ជកម្ម Jurin Laksanawisit៕
Tag:
ថៃ
ម៉ាស់
ក្រសួងពាណិជ្ជកម្ម
© រក្សាសិទ្ធិដោយ thmeythmey.com