អន្តរជាតិ
នាវាទេសចរណ៍ Diamond Princess។ រូបភាព៖ Reuters
×![]()
ដោយ: ធៀន ភារិន្ទ
រដ្ឋមន្ត្រីសុខាភិបាលជប៉ុន លោក Katsunobu Kato នៅថ្ងៃទី១២ ខែកុម្ភៈ បានបញ្ជាក់ថា ជប៉ុនបានរកឃើញអ្នកផ្ទុកកូរ៉ូណាវីរុសប្រភេទថ្មី (COVID-19) ចំនួន ៤០នាក់បន្ថែមទៀត បន្ទាប់ឃាត់ទុកតាំងពីថ្ងៃទី៣ ខែកុម្ភៈកន្លងមក។ ការណ៍នេះ ធ្វើឲ្យចំនួនអ្នកឆ្លងវីរុសនេះលើនាវាកម្សាន្តនេះហើយដល់១៧៥នាក់។
បើតាមការអះអាងរបស់រដ្ឋមន្ត្រីសុខាភិបាលជប៉ុន លោក Katsunobu Katoប្រាប់អ្នកកាសែត អាជ្ញាធរជប៉ុន បានធ្វើរោគវិនិច្ឆ័យជនសង្ស័យផ្ទុកវីរុសចំនួន ៥៣នាក់ទៀត ហើយក្នុងចំណោមនោះគេបានរកឃើញអ្នកជំងឺផ្ទុកវីរុសប្រភេទថ្មីចំនួន ៤០នាក់។ លោករដ្ឋមន្ត្រីបានបន្តថា សូម្បីតែមន្ត្រីនៅមជ្ឈមណ្ឌលចត្តាឡីស័កម្នាក់ ក៏បានឆ្លងវីរុសនេះ ដែរ។
តាមរយៈស្ថានភាពអ្នកជំងឺទាំងអស់ មានតែមនុស្ស ៤នាក់ប៉ុណ្ណោះ ដែលកំពុងស្ថិតក្នុងស្ថានភាពធ្ងន់ធ្ងរ និងបានដាក់នៅកន្លែងមើលថែយ៉ាងយកចិត្តទុកដាក់។ ស្ថានភាពរបស់អ្នកទាំង ៤នាក់នេះ ត្រូវការជំនួយពីឧបករណ៍អុកស៊ីសែន។ នេះបើតាមការចុះផ្សាយរបស់ទីភ្នាក់ងារសារព័ត៌មាន AFP។
ដើម្បីទប់ស្កាត់ជំងឺឆ្លងទៅដល់ប្រជនជប៉ុនផ្សេងទៀត អាជ្ញាធរជប៉ុនបានឃាត់ទុកនាវា Diamond Princess រយៈពេល ១៤ថ្ងៃសិន ដើម្បីតាមដានស្ថានភាពអ្នកដំណើរទាំងអស់នៅលើនាវា ពោលគឺជប៉ុន ត្រូវឃាត់ទុកនាវាមួយនេះរហូតដល់ថ្ងៃទី១៩ ខែកុម្ភៈ។ ចំណែកអ្នកដំណើរនៅក្នុងនាវា ក៏គេមិនអាចចាកចេញពីនាវានេះផងដែរ។ ចំណែកមនុស្ស ដែលមានវត្តមាននៅក្នុងនាវាទាំងអស់ ត្រូវបានអាជ្ញាធរជប៉ុន ស្នើឲ្យពាក់ម៉ាស់គ្រប់ៗគ្នា និងនៅឲ្យឆ្ងាយពីគ្នាពេលអ្នកទាំងនោះចេញពីក្រៅបន្ទប់។
សូមបញ្ជាក់ថា Diamond Princess ត្រូវបានអាជ្ញាធរជប៉ុន ឃាត់ទុកនាថ្ងៃទី៣ ខែកុម្ភៈកន្លងមកម្លេះ បន្ទាប់ពីរកឃើញបុរសមកពីហុងកុងម្នាក់មានផ្ទុកវីរុសប្រភេទថ្មីនេះ។ ចាប់តាំងពីឃាត់ទុកនាវាទេសចរណ៍មួយនេះ នាកំពង់ផែ Yokohama អាជ្ញាធរជប៉ុន បានរកឃើញអ្នកផ្ទុកវីរុសនេះជាបន្តបន្ទាប់៕
Tag:
ជប៉ុន
កូរ៉ូណាវីរុស
© រក្សាសិទ្ធិដោយ thmeythmey.com
