អន្តរជាតិ
COVID-19៖ ជប៉ុន បញ្ជាក់ករណីស្លាប់ទី១ និងជាករណីទី២នៅក្រៅប្រទេសចិន រដ្ឋមន្ត្រីសុខាភិបាលជប៉ុន Katsunobu Kato (AFP)
× ជប៉ុន នៅយប់ថ្ងៃព្រហស្បតិ៍ ទី១៣ កុម្ភៈនេះ បានបញ្ជាក់ករណីស្លាប់ព្រោះជំងឺ COVID-19 លើកដំបូងរបស់ខ្លួន។ នេះបើតាមការបញ្ជាក់របស់រដ្ឋមន្ត្រីសុខាភិបាលជប៉ុន Katsunobu Kato ។
ប្រាប់សន្និសីទព័ត៌មានមួយ លោករដ្ឋមន្ត្រីជប៉ុនរូបនេះ អះអាងថា ជនរងគ្រោះ គឺជាស្ត្រីជនជាតិជប៉ុនវ័យ៨០ឆ្នាំ ក្នុងតំបន់ Kanagawa ដែលមានព្រំដែនជាប់ក្រុងតូក្យូ ។ បើតាមការចុះផ្សាយរបស់ទូរទស្សន៍ជប៉ុន NHK លោក អះអាងទៀតថា៖«ទំនាក់ទំនងរវាងកូរ៉ូណាវីរុសប្រភេទថ្មី និងការស្លាប់របស់មនុស្សម្នាក់នេះ គឺនៅតែមិនទាន់ច្បាស់។ ក៏ប៉ុន្តែ នេះគឺជាស្លាប់លើកទី១របស់មនុស្សដែលបានធ្វើតេស្តវិជ្ជមាន»។
ជប៉ុន គឺជាប្រទេសទី២ហើយ ដែលបានរកឃើញករណីស្លាប់ព្រោះជំងឺផ្លូវដង្ហើមបង្កឡើងដោយកូរ៉ូណាវីរុសប្រភេទថ្មី (COVID-19) ។ កាលពីថ្ងៃទី ២ កុម្ភៈ ប្រទេស ហ្វីលីពីន បានប្រកាសករណីស្លាប់ទី១របស់ខ្លួន ដោយជនរងគ្រោះគឺជាបុរសជនជាតិចិនអាយុ៤៤ឆ្នាំម្នាក់ ដែលបានធ្វើដំណើរទៅកាន់ប្រទេសហ្វីលីពីន ពីក្រុង វូហាន ប្រទេសចិន៕
Tag:
ជប៉ុន
កូរ៉ូណាវីរុស
COVID-19
© រក្សាសិទ្ធិដោយ thmeythmey.com